ELM VƏ TƏHSİL


Pedaqoji Universitet əməkdaş və tələbələrinin ingilis dili bacarıqlarını qiymətləndirir

Bakı, 8 may, AZƏRTAC

Azərbaycan Dövlət Pedaqoji Universitetinin (ADPU) Elmi Şurasının 2021-ci il dekabrın 30-da qəbul edilmiş “Azərbaycan Dövlət Pedaqoji Universitetinin 2022-ci il üçün prioritet istiqamətlər üzrə Fəaliyyət Planı”nın 2.1. bəndinə əsasən “akademik heyət və tələbələrin intensiv ingilis dili kurslarına cəlb edilməsi və ingilis dilinin mənimsənilməsi üçün uyğun mühitin yaradılması” fəaliyyət istiqaməti üzrə ardıcıl tədbirlər çərçivəsində ingilis dili bacarıqlarının yüksək olduğunu düşünən 280 nəfərədək əməkdaş və tələbənin ödənişsiz olaraq ingilis dili bacarıqlarının qiymətləndirilməsi prosesinə başlanılıb.

ADPU-dan AZƏRTAC-a bildirilib ki, universitetin Xarici Dillər Mərkəzi ilə birlikdə Azərbaycan Respublikasının Təhsil Nazirliyi və ABŞ-ın Azərbaycandakı səfirliyinin İngilis dili üzrə proqramının mütəxəssisi Nancy Ackles ilə aparılmış məsləhətləşmələr nəticəsində mayın 7-də ADPU-da imtahana müraciət edənlərin B1 və B2 səviyyələrinin qarışığından ibarət kağızəsaslı yazılı ilkin pre-test imtahanı təşkil olunub.

ADPU-nun Bakıdakı əsas binasında Monitorinq və qiymətləndirmə şöbəsi tərəfindən təşkil edilən imtahanlarda 190 nəfər, filiallarında isə 90 nəfərədək namizəd iştirak edib.

Proqram ümumilikdə Amerikalı mütəxəssis Nancy Ackles, Universitetin Filologiya fakültəsinin dekan müavini Könül Həsənova, Xarici Dillər Mərkəzinin müdiri Ülviyyə Hacıyeva, müdir müavini Günay Alıyeva, mərkəzin əməkdaşları Mirvari Qasımova, Yasəmən Babayeva və Bənövşə Əsgərovanın daxil olduğu Müsabiqə Komissiyası tərəfindən hazırlanıb və koordinasiya olunur.

Pre-testdə mümkün 100 baldan 71 və daha çox bal toplayan şəxslər ikinci mərhələdə Xarici Dillər Mərkəzinin əməkdaşlarından ibarət Müsabiqə Komissiyasında şifahi imtahanlarda iştirak edəcəklər. Hər iki mərhələdən uğurla keçmiş şəxslər müvafiq istiqamətverici təlimlərdən sonra IELTS imtahanlarına qatılacaqlar.

Həmçinin hər iki mərhələni keçməmiş şəxslər üçün uzunmüddətli onlayn ingilis dili kurslarının təşkili nəzərdə tutulub.

Qeyd edək ki, Müsabiqə Komissiyasının üzvləri və ADPU-nun Monitorinq və qiymətləndirmə şöbəsinin müdiri Asəf Kazımov imtahan prosesinin gedişini yerində izləyərək iştirakçılara uğurlar arzulayıblar.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.