ELM VƏ TƏHSİL


Pedaqoji forum: Müasir struktur biologiyası və gələcək perspektivlər

Bakı, 5 sentyabr, AZƏRTAC

Sentyabrın 5-də Azərbaycan Dövlət Pedaqoji Universitetinin (ADPU) himayəsi ilə təşkil edilən pedaqoji forumun (PF) növbəti - beşinci dinləməsi keçirilib.

ADPU-dan AZƏRTAC-a bildirilib ki, tədbirdə tanınmış azərbaycanlı alim, Böyük Britaniyanin York Universitetinin MRC Molekulyar Biologiya Tədqiqat İnstitutunun, Kembric Universitetinin qrup rəhbəri, professor Qərib Mürşüdov “Müasir struktur biologiyası və gələcək perspektivlər” mövzusunda məruzə ilə çıxış edib.

Q.Mürşüdov çalışdığı institutun fəaliyyəti barədə ətraflı məlumat verib. Alim bildirib ki, 1962-ci ildə yaradılan institut struktur biologiyanın müxtəlif istiqamətləri ilə məşğul olur. İnstitutda böyük elmi-tədqiqat işləri həyata keçirilir. Alınan elmi nəticələr istehsalata, sənayeyə tətbiq olunur. İnstitutun malik olduğu böyük maliyyə vəsaitinə ciddi nəzarət var və bu vəsaitdən səmərəli istifadə edilir. Burada əlverişli elmi mühit formalaşdırılıb, uzunmüddətli strateji planlar işlənib-hazırlanır, gənc alimlərlə işləməyə xüsusi önəm verilir.

Təqdimatında struktur biologiya haqqında danışan alim qeyd edib ki, bu elm sahəsi bioloji prosesləri, zülalların və molekulların quruluşunu öyrənir. Struktur biologiya ötən əsrin 30-cu illərində yaranıb, son illər bu sahədə böyük uğurlar əldə edilib. Biologiya sahəsinə aid olan dərsliklər beşildənbir yenidən yazılmalıdır. Yeni dərsliklər yazılarkən müasir elmi nəticələrə əsaslanılmalıdır. Bu, struktur biologiyanın inkişafından irəli gələn tələbdir. Struktur biologiya geniş perspektivlərə malikdir və gələcəkdə daha sürətlə inkişaf edəcək.

Tədbirdə çıxış edən təhsil eksperti təqdimatla bağlı fikir və mülahizələrini bölüşüblər.

Rektor Cəfər Cəfərov bildirib ki, xalqın, millətin, dövlətin gələcəyi təhsillə bağlıdır. Müəllim hazırlığı strateji əhəmiyyət daşıyır. Son illər müəllim peşəsinə maraq xeyli artıb.

Qeyd edək ki, professor Q.Mürşüdov bioinformatika sahəsində tanınmış mütəxəssis kimi Böyük Britaniyanın Kembric Universitetinə dəvət olunmuş ilk azərbaycanlı alimdir. Alimin “Makromolekulyar rentgen kristalloqrafiyası və zülalverilənlər bankı: etibarlı informasiyanın toplanması və istifadəsi” əsəri bioinformatika üzrə ən çox istinad olunan vəsaitlərdəndir. O, bu kitabı ilə bioinformatikanın müasir biologiya elminin zirvəsi olduğunu Avropaya sübut edə bilib. Məşğul olduğu sahə riyaziyyat və kompüter elmlərinin molekulyar biologiyada və əsasən də makromolekulların rentgen kristal strukturunun öyrənilməsində tətbiqidir. Onun proqramlarından makromolekulların strukturu ilə məşğul olan tədqiqatçılar geniş istifadə edirlər. Q.Mürşüdov 60-dan çox elmi məqalənin, bir neçə kitabın və toplunun müəllifi və həmmüəllifidir. Ümumən məqalələrinə, o cümlədən proqramlarına olan akademik istinadların sayı 20 mindən çoxdur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.