DÜNYA
Pekində kütləvi COVID-19 testi aparılır VİDEO
Pekində kütləvi COVID-19 testi aparılır
Pekin, 25 aprel, AZƏRTAC
Çin paytaxtı Pekində son günlər COVID-19 virusuna sutkalıq yoluxmaların çoxalması səbəbindən 3,5 milyon sakini olan Çaoyan rayonunda kütləvi test prosesinə start verilib.
AZƏRTAC xəbər verir ki, aprelin 25-dən başlayan proses zamanı rayon sakinləri və ərazidə çalışanlar bir neçə dəfə test verəcəklər. Bunun üçün rayon ərazisindəki məhəllələrdə, iş yerlərində səyyar test məntəqələri fəaliyyətə başlayıb.
Sakinlər Şanxaydakı qapanma rejiminin Pekində də tətbiq olunacağından ehtiyat edərək, ərzaq və gündəlik tələbat malları almaq üçün marketlərə, bazarlara axışırlar. Bu səbəbdən bəzi marketlərdə satışa çıxarılan məhsullar qısa zamanda qurtarıb. Elektron ticarət mağazaları isə sifarişlərin çoxluğu səbəbindən işçi çatışmazlığı ilə üzləşib.
Əslində Pekində sutkalıq yoluxma göstəricisi 2 rəqəmli ifadə olunsa da, “Sıfır virus” siyasətini tətbiq olunduğu Çində yoluxuculuq qabiliyyəti yüksək olan “omikron” ştamının sürətlə yayılma ehtimalı narahatlıq doğurur. Pekin xəstəliklərə nəzarət və profilaktika mərkəzi sədrinin müavini Pan Sinhuo bildirib ki, təxminən bir həftə şəhərdə sakit yoluxmalar olub. Yoluxanların çoxu peyvənd edilməyən yaşlı insanlardır. Yüksək və orta riskli zona elan edilən 2 məhəllədə qapanma tətbiq olunur. Yoluxanlarla təmasda olanlar tibbi nəzarətə cəlb olunub. Rayon ərazisində məktəbdənkənar tədris dayandırılıb. Yaxınlaşan 1 May –Əmək bayramı ilə əlaqədar 4 günlük bayram tətilində turizm səfərlərinin çoxalmasının kənardan şəhərə virus axınına səbəb olma ehtimalı da səlahiyyətli qurumları qayğılandırıb.
Qeyd edək ki, martın əvvəlindən Çinin müxtəlif yaşayış məntəqələrində epidemik vəziyyət gərginləşib. Çinin Səhiyyə Məsələləri üzrə Dövlət Komitəsinin məlumatına əsasən, ötən sutka Çinin materik hissəsində 20 min 194 yerli yoluxma, o cümlədən 27 min 528 simptomsuz yoluxma aşkarlanıb. Yoluxmaların əksər hissəsi Şanxayda qeydə alınıb. Elə ötən sutka Çində COVID-19 virusu səbəbindən ölən 51 nəfərin hamısı Şanxay sakini olub. Bu, hazırkı “omikron” dalğasında sutkalıq ən yüksək tələfat göstəricisidir. Ötən sutka ölənlərin orta yaş həddi 84,2 olub. Onların yanaşı xəstəliklərdən əziyyət çəkdiyi və yalnız dördünün virusa qarşı peyvənd qəbul etdiyi bildirilir.
Mütəxəssislər hazırkı dalğanı Çinin Uhan böhranından sonra COVID-19 pandemiyası ilə ikinci böyük mübarizəsi hesab edirlər. “Virusla birgə həyat” strategiyasını tətbiq edərək, qapanmalar da daxil olmaqla, karantin qaydalarını maksimum dərəcədə yumşaldan bir çox ölkədən fərqli olaraq, Çin daha az hospitalizasiyaya səbəb olan “omikron” dalğasında da “Sıfır COVID” və ya “Virussuz həyat” prinsipinə sadiq qalır. “Sıfır COVID” strategiyası yoluxmalar aşkarlanan yaşayış məntəqələrində lokal qapanmaların tətbiqi və kütləvi test prosesinin icrası ilə yoluxma zəncirini dayandırmağı, bununla da virusun ölkəyə yayılmasının qarşısını ilkin mərhələdə almağı əhatə edir. Səlahiyyətli qurumlar “Virusla birgə yaşayış” prinsipinin 1,4 milyard əhalisi olan Çində tətbiq olunacağı təqdirdə, sutkalıq yoluxma sayının yarım milyona, simptomlu xəstə sayının isə 10 minə çatacağını, ölkənin səhiyyə sisteminin bu yükü qaldıra bilməyəcəyini, nəticədə fəlakətli vəziyyətin yarana biləcəyini güman edir.
Şahin Cəfərov
AZƏRTAC-ın xüsusi müxbiri
Pekin