Peru dövlət televiziyasında Ulu Öndər Heydər Əliyevdən və Müstəqillik Günündən bəhs edilib

Bakı, 25 may, AZƏRTAC

Azərbaycanın Perudakı səfiri Məmməd Talıbov həmin ölkənin ən nüfuzlu dövlət televiziyası sayılan “TV Peru”nun məşhur “Conecta Peru” verilişinin qonağı olub, canlı yayımda aparıcıların suallarını cavablandırıb, Azərbaycanın tarixi və reallıqları barədə ətraflı məlumat verib.

Səfirlikdən AZƏRTAC-a bildirilib ki, verilişin əvvəlində ölkəmizin tanıtım videoçarxı yayımlanıb. Videoçarxda Azərbaycanın müsəlman Şərqində ilk demokratik parlamentli respublika olduğu, dünyada tolerantlıq və multikulturalizm mərkəzlərindən biri kimi tanındığı, 30 illik işğala son verərək öz ərazi bütövlüyünü bərpa etdiyi və həmin ərazilərdə genişmiqyaslı yenidənqurma işləri apardığı xüsusi vurğulanıb.

Səfir M.Talıbov bu il müasir Azərbaycanın banisi, Ümummilli Lider Heydər Əliyevin anadan olmasının 100 illiyinin qeyd edilməsi ilə əlamətdar olduğunu diqqətə çatdırıb. Azərbaycanın 1918-ci ildə bütün Şərqdə, о cümlədən türk-İslam dünyasında ilk demokratik, hüquqi və dünyəvi dövlət nümunəsi qurmaqla adını tarixə yazdırdığı, Xalq Cümhuriyyətinin cəmi 23 ay yaşamasına baxmayaraq, xalqımızın dövlətçilik tarixində misilsiz rol oynadığı qeyd olunub.

1991-ci ildə Azərbaycan müstəqillik qazandıqdan sonra sosial-iqtisadi tənəzzül və dövlət suverenliyinin itirilməsi təhlükəsi ilə üzləşdiyi bir vaxtda Ulu Öndər Heydər Əliyevin öz xilaskarlıq missiyası ilə Azərbaycanın müstəqilliyini qorumasından, ölkədə tüğyan edən ictimai-siyasi böhranı aradan qaldıraraq dinamik inkişafın təməlini qoymasından bəhs olunub. Bildirilib ki, Heydər Əliyevin məqsədyönlü siyasəti nəticəsində bu gün Azərbaycan beynəlxalq müstəvidə güclü və nüfuzlu dövlətə, mühüm energetika və nəqliyyat qovşağına çevrilib, ölkəmizin təşəbbüsü və liderliyi ilə çox mühüm transmilli layihələr reallaşdırılıb və müasir Azərbaycan inkişaf yolunda əmin addımlarla irəliləyir.

Veriliş zamanı, həmçinin Azərbaycanın multikulturalizm dəyərlərindən, zəngin turizm potensialından, əcnəbi vətəndaşlar, eləcə də perulu gənclər üçün ölkəmizdə mövcud olan təhsil və təqaüd imkanlarından bəhs edilib.