REGİONLAR
Pərvin Kərimzadə: Heydər Əliyev Fondu reallaşdırdığı layihələrlə xalqımızın gələcəyinə xidmət edir
Gəncə, 10 may, Rauf Hacıyev, AZƏRTAC
Başqalarına təmənnasız yaxşılıq etmək, xeyirxahlıq, mərhəmət, ədalət, insanpərvərlik, mənəvi saflıq kimi ülvi dəyərlər Azərbaycan Respublikasının Birinci vitse-prezidenti Mehriban Əliyevanın rəhbərliyi ilə fəaliyyət göstərən Heydər Əliyev Fondunun ana xəttini təşkil edir. Əsas missiyası Heydər Əliyevin həyat və fəaliyyətinin, ideyalarının öyrənilməsi və təbliği olan Fond yarandığı ilk gündən xeyirxahlıq, sülh, insanpərvərlik kimi bəşəri amallar uğrunda nəcib fəaliyyəti ilə ölkədə həyata keçirilən çoxşaxəli islahatlara dəyərli töhfələr verir.
Bu fikirləri AZƏRTAC-ın bölgə müxbirinə müsahibəsində Milli Məclisin deputatı, Gəncə Dövlət Universitetinin Elm və innovasiyalar üzrə prorektoru Pərvin Kərimzadə deyib.
Pərvin Kərimzadə bildirib ki, dahi şəxsiyyət Heydər Əliyevin mərhəmət, nəciblik və yüksək humanizmə əsaslanan ali ideyalarının ictimai şüurda möhkəmlənməsinə çalışan Fond yüz minlərlə insanın ümid və pənah yerinə çevrilib. Fondun prezidenti Mehriban Əliyevanın təşəbbüsü, fədakar, yorulmaz əməyi sayəsində Ümummilli Liderin ideyaları böyük əzmlə və sədaqətlə həyata keçirilməklə yanaşı təhsil, səhiyyə, mədəniyyət, idman, elm və texnologiya, ekologiya, sosial və digər sahələrdə reallaşdırılan layihələr xalqımızın gələcəyinə xidmət edir. 15 il ərzində Heydər Əliyev Fondu xeyirxahlıq, humanizm, vətənsevərlik hisslərinə, milli düşüncəyə söykənən xeyriyyə fəaliyyəti ilə ölkəmizdə, hətta dünyada bənzəri olmayan qurum olduğunu sübut edib.
Azərbaycan həqiqətlərinin - istər qaçqın və məcburi köçkünlərin üzləşdikləri çoxsaylı problemlərin, istərsə də Ermənistan-Azərbaycan Dağlıq Qarabağ münaqişəsinin, Xocalı soyqırımının dünya ictimaiyyətinə çatdırılmasında Heydər Əliyev Fondunun misilsiz xidmətləri var.
Fondun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq kampaniyası Xocalı soyqırımının dünyada tanıdılmasına, soyqırımı kimi qəbul edilməsinə əvəzsiz töhfə verir və ildən-ilə geniş vüsət alır. Kampaniya çərçivəsində dünyada yüzlərlə aksiya keçirilib.
Deputat qeyd edib ki, Heydər Əliyev Fondu hər zaman sosial imkanları məhdud, aztəminatlı vətəndaşların, əlillərin, kimsəsizlərin, məcburi köçkünlərin, təbii fəlakətlərdən zərər çəkmiş insanların yanında olub: “15 ildə elə bir əlamətdar gün olmayıb ki, Heydər Əliyev Fondu uşaq evlərində və internat məktəblərində təlim-tərbiyə alan, şəhid, qaçqın və məcburi köçkün ailələrindən olan, valideyn himayəsindən məhrum, təhsildə xüsusilə fərqlənən uşaqlar üçün bayram şənlikləri keçirməsin. Hər yeni dərs ilində Heydər Əliyev Fondu tərəfindən qaçqın və məcburi köçkün ailələrindən olan birinci sinif şagirdlərinə məktəbli ləvazimatlarından ibarət hədiyyələr təqdim edilir. Fondun “Yeniləşən Azərbaycana yeni məktəb” layıhəsinin icra olunması nəticəsində yeni məktəb binaları tikilir, maddi-texniki bazası gücləndirilir, təhsilin keyfiyyətinin yüksəldilməsinə önəmli töhfələr verilir”.
Pərvin Kərimzadə deyib ki, uşaq evləri və internat məktəblərinin məzunları üçün yaşayış binalarının inşa olunması da Fondun təşəbbüsü ilə reallaşıb. Fond ölkə vətəndaşlarının sağlamlığını da diqqət mərkəzində saxlayır, sağlamlıq müəssisələri, reabilitasiya mərkəzləri inşa edir, şəkərli diabet, talassemiyalı xəstələrlə bağlı aksiyalar keçirir.
“Heydər Əliyev Fondunun mühüm humanitar dəyərə malik, sivilizasiyalararası dialoqu təşviq edən layihələri dünyada Azərbaycanın təbliğinə xidmət edir. Bu baxımdan “Tolerantlığın ünvanı Azərbaycan” layihəsi xüsusi diqqətə layiqdir. Pakistanda, Gürcüstanda, Misirdə, Rusiyada məktəblər yenidən qurulub, Vatikanda katakombalar, Strasburqda kafedral kilsə bərpa edilib. Eyni zamanda, Pakistanda qızlar üçün məktəb tikilib, xeyriyyə tədbirləri həyata keçirilib. Versal sarayının bir hissəsinin, Luvr muzeyinin qalereyasının birinin bərpası, Rusiyada Knyaz Vladimirə abidənin ucaldılması, Həştərxanda Azərbaycan-Rusiya körpüsünün inşası, əslində Azərbaycanın zəngin ənənələrinin təbliğinə ən böyük töhfədir. Bir sözlə, ötən 15 ildə Heydər Əliyev Fondu həm ölkə daxilində, həm də xaricdə misilsiz fəaliyyəti ilə xalqımızın Heydər Əliyev ocağına, irsinə olan sevgisini daha da gücləndirib”, - deyə o bildirib.