Peşəkar Futbol Liqası azarkeş limiti ilə bağlı dəyişiklik edib

Bakı, 29 mart, AZƏRTAC

Ölkədə epidemioloji vəziyyətin yaxşılaşması ilə əlaqədar xüsusi karantin rejimi çərçivəsində yumşalma tədbirlərinin növbəti mərhələsinin tətbiqi ilə əlaqədar Nazirlər Kabineti yanında Operativ Qərargahın son qərarlarını nəzərə alan Peşəkar Futbol Liqası azarkeş limiti ilə bağlı dəyişiklik edib.

AZƏRTAC Peşəkar Futbol Liqasının (PFL) rəsmi saytına istinadla bildirir ki, ümumi məsləhətləşmələrdən sonra martın 30-dan aprelin 1-dək keçiriləcək I Divizionun XIX və aprelin 2-3-də təşkil olunacaq Premyer Liqanın XXI turunun oyunlarından etibarən stadionlarda azarkeş tutumunun 100 faiz olmasına icazə verilib.

Eyni zamanda, jurnalistlərin fəaliyyətinin yaxşılaşdırılması ilə əlaqədar miks zonaların təşkili (qapalı məkanda olacaqsa, qoruyucu maskalardan istifadə olunmaq şərti ilə) bərpa olunacaq.