İQTİSADİYYAT
“Petlim” Əliağa bölgəsi üzrə indiyədək ən böyük konteyner gəmisini qəbul edəcək
Bakı, 9 dekabr, Nihad Budaqov, AZƏRTAC
SOCAR-ın Türkiyənin İzmir şəhərinin Əliağa rayonunda tikdiyi “Petlim” konteyner limanı dekabrın 23-də indiyədək bu bölgə üzrə ən böyük konteyner gəmisini qəbul edəcək.
AZƏRTAC xəbər verir ki, bu barədə limanı idarə edən Hollandiyanın “APM Terminals” şirkəti məlumat yayıb.
Qeyd edək ki, “Petlim”in səhmlərinin 70 faizi “Petkim PetroKimya Holding A.Ş.”yə, 30 faizi isə “Goldman Sachs”a məxsusdur. 2013-cü il fevralın 22-də Hollandiyanın yük terminalı əməliyyatlarında və idarəçiliyində lider olan “APM Terminals” şirkəti ilə əməliyyat müqaviləsi imzalanıb. Müqaviləyə əsasən, liman ilk 28 il müddətində “APM Terminals” şirkəti tərəfindən idarə ediləcək və Egey bölgəsində ən böyük konteyner limanı olacaq. Hazırda “Petlim” layihəsinin ikinci mərhələsi üzrə tikinti işləri davam etdirilir. Həmin işlərin 2017-ci ilin ilk rübündə başa çatdırılması planlaşdırılır. Bu mərhələ tamamlandıqdan sonra “Petlim”in ümumi tutumu 1,5 milyon TEU təşkil edəcək.
“Petlim” limanı layihəsinin ümumi dəyəri təxminən 282 milyon ABŞ dollarıdır. Tələb olunan sərmayənin 212 milyon dolları kreditlə, 70 milyon dolları isə səhmdarlar tərəfindən maliyyələşdirilir.
“APM Terminals” şirkəti “Petlim”ə operatorluq müqaviləsi çərçivəsində limanın inşası bitənə qədər 65 milyon dollar, layihə işə düşdükdən sonrakı 15 il ərzində illik 47,6 milyon dollar sabit və qarantiyalı ödəniş, eləcə də izafi gəlirin 45 faizi həcmində ödəniş, 16-cı ildən isə məcmu gəlirin 35 faizi həcmində ödəniş edəcək. 28 illik müqavilə bitdikdən sonra isə operator şirkət ilə məcmu gəlir 70 faiz (“Petlim”) və 30 faiz (operator) nisbətində bölünəcək.
“Petlim”in iri konteyner gəmilərinin yan alacağı körpü hissəsində və manevr meydanında dəniz dibinin kartoqrafik ştrixlərinin hazırlanması işləri isə yaxın vaxtlarda tamamlanacaq. Bu işlər başa çatdıqdan sonra suyun 16 metr dərinliyinə nüfuz etmək mümkün olacaq. “Petlim” layihəsində ayrıca bir yük körpüsü də yer alıb. SOCAR-ın sərmayə qoyduğu digər bir struktura – “Star” neft emalı zavoduna aid ağır yüklərin də bu körpüdən yüklənməsi effektiv qənaətə imkan yaradacaq. Liman tam gücü ilə işə başladıqda Mərmərə, Egey və Aralıq dənizlərində 11 min konteyner gücü olan gəmilərin rahatlıqla yanaşa biləcəyi yeganə liman olacaq.