Bakı, 29 sentyabr, AZƏRTAC

Pirallahı rayonunda Azərbaycan Prezidenti İlham Əliyevin 27 Sentyabr - Anım Gününün təsis edilməsi haqqında 2020-ci il 2 dekabr tarixli Sərəncamının icrası, eyni zamanda, 44 günlük Vətən müharibəsi şəhidlərinin əziz xatirəsinin yad edilməsi məqsədilə rəsmi anım tədbiri keçirilib.

AZƏRTAC xəbər verir ki, Pirallahı Rayon İcra Hakimiyyətinin (RİH) başçısı Vasif İmanovun, rayonun hüquq-mühafizə orqanlarının, rayon ərazisində fəaliyyət göstərən müəssisə və təşkilatların rəhbərlərinin, Pirallahı rayonundan 44 günlük Vətən müharibəsində iştirak etmiş veteranların, qazilərin və şəhid ailələrinin iştirakı ilə keçirilən tədbir Vətən uğrunda abidə kompleksi qarşısında təşkil olunub.

Tədbirdə əvvəlcə Azərbaycanın ərazi bütövlüyünün bərpa edilməsi, torpaqlarımızın işğaldan azad olunması uğrunda şəhadətə qovuşan Pirallahı şəhidlərinin əziz xatirəsi ehtiramla yad olunub, Gürgən qəsəbə qəbiristanlığında yerləşən məzarları rayon rəhbərliyi, idarə-müəssisə, təşkilat rəhbərləri və şəhid ailələri tərəfindən ziyarət olunaraq üzərinə gül dəstələri düzülüb.

Sonra rayon icra hakimiyyətinin başçısı tərəfindən təsdiq edilmiş Tədbirlər Planına uyğun olaraq Vətən uğrunda abidə kompleksinin ətrafı və mərkəzi yolboyu ağacəkmə aksiyası təşkil edilib, şəhidlərimizin əziz xatirəsinə 150 ədəd müxtəlif növ ağac və gül kolları əkilib.

Aksiya başa çatdıqdan sonra RİH başçısı və qonaqlar tədbirin keçiriləcəyi abidə kompleksinin qarşısına gəlib və ümumrayon tədbiri açıq elan olunub. Tədbir Vətən müharibəsi şəhidlərinin əziz xatirəsinin bir dəqiqəlik sükutla yad edilməsi, Azərbaycanın Dövlət Himninin səsləndirilməsi və Pirallahı şəhidlərinin şəkillərinin əks olunduğu abidə kompleksinin qarşısına gül dəstələrinin qoyulması ilə başlayıb.

Pirallahı Rayon İcra Hakimiyyətinin başçısı Vasif İmanov açılış nitqi ilə çıxış edərək sentyabrın 27-nin xalqımızın müstəqillik dövrünün ən vacib günlərindən biri və 30 illik işğalın, zülmün, qanunsuzluğun sonunun başlanğıcı günü olduğunu bildirib. Bununla yanaşı, RİH başçısı 44 günlük müharibədə iştirak edərək şücaət göstərmiş, qəhrəmanlıqla həlak olmuş və ya sağlamlığını itirmiş hər bir vətəndaşın öz adlarını Azərbaycan xalqının şanlı tarixinə əbədi yazdığını və onların hər birinin daim dövlət qayğısı ilə əhatə olunduğunu vurğulayıb. Həmin günlərdə Pirallahı rayonunun gənclərinin də Vətənin müdafiəsi üçün ayağa qalxdığını bildirən V.İmanov Pirallahı rayonundan yüzlərlə gəncin ordu sıralarına yazılmaq üçün müraciət etdiyini və ümumilikdə 97 rayon sakininin Vətən müharibəsində qəhrəmanlıqla iştirak etdiyini vurğulayıb.

Vasif İmanov sentyabr ayının 13-də Ermənistan silahlı qüvvələrinin Azərbaycanın Kəlbəcər, Laçın, Daşkəsən və Zəngilan rayonları istiqamətində törətdiyi genişmiqyaslı təxribatları xatırladaraq, həmin günlərdə Ordumuzun göstərdiyi şücaətin bizləri qürurlandırdığını, ancaq təəssüf ki, əks-hücum əməliyyatları zamanı 80 hərbi qulluqçumuzun şəhid olduğunu ifadə edib. V.İmanov onu da diqqətə çatdırıb ki, onların qisası bu dəfə də artıqlaması ilə alınıb.

Sonra Vətən müharibəsi iştirakçısı, Azərbaycan Prezidentinin müvafiq sərəncamları ilə “Laçının azad olunmasına görə”, “Qubadlının azad olunmasına görə” və “Cəbrayılın azad olunmasına görə” medalları ilə təltif olunmuş Kazımov Anar İlqar oğlu çıxış edərək bildirib ki, Müzəffər Ali Baş Komandan İlham Əliyevin rəhbərliyi, xalqımızın mətanəti və hərbçilərimizin qəhrəmanlığı nəticəsində əldə edilən möhtəşəm Qələbə Azərbaycanın şanlı tarixinə əbədi olaraq həkk olunub. A.Kazımov dövlətimizin daim şəhid ailələrinə, qazilərə, müharibə iştirakçılarına diqqət və qayğı ilə yanaşdığını və hər bir şəxsin bu diqqəti öz üzərində hiss etdiyini diqqətə çatdırıb. Anar Kazımov bunun üçün bütün Vətən müharibəsi iştirakçıları, qaziləri və şəhid ailələri adından Müzəffər Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlığını ifadə edib.

Daha sonra Pirallahı rayon Ağsaqqallar Şurasının üzvü Fazil Məhəmmədov bu möhtəşəm Qələbə ilə Azərbaycan dövlətçiliyinin böyük bir imtahandan şərəflə çıxdığını bildirib. O vurğulayıb ki, bu parlaq Qələbənin əldə olunmasında ən böyük amillər Azərbaycan Prezidenti, Müzəffər Ali Baş Komandan İlham Əliyevin möhkəm siyasi iradəsi, Ordumuzun rəşadəti və xalqımızın Ali Baş Komandanın arxasında bir yumruq kimi birləşməsi idi. F.Məhəmmədov onu da diqqətə çatdırıb ki, ölkəmizdə yüksək vətənpərvər ruhlu gənc nəsil formalaşıb. Bunun başlıca səbəbi əsası ulu öndər Heydər Əliyev tərəfindən qoyulan və Prezident İlham Əliyev tərəfindən davam etdirilən uğurlu gənclər siyasətidir. Fazil Məhəmmədov Azərbaycan gəncliyinin qarşısında bundan sonra da mühüm vəzifələr dayandığını, gənclərin dövlətimizin başçısının yüksək etimadını doğrultmağa, qarşıya qoyduğu vəzifələri layiqincə yerinə yetirməyə çalışmalı olduğunu qeyd edib.

Tədbirdən sonra rayon icra hakimiyyətinin başçısı Vasif İmanov Vətən müharibəsi iştirakçılarının, şəhid ailələrinin qayğıları ilə maraqlanıb, onların hər birinin daim ölkə rəhbərliyinin xüsusi diqqətində olduğunu bildirib.