REGİONLAR


Polis veteranları gənc nəslin vətənpərvər ruhda yetişməsində fəal iştirak etməlidirlər

Daxili İşlər Nazirliyi Veteranlar Şurasının ümumi yığıncağı keçirilib

Naxçıvan, 27 yanvar, AZƏRTAC

Naxçıvan Muxtar Respublikası Daxili İşlər Nazirliyində Daxili İşlər Nazirliyi Veteranlar Şurasının 2021-ci ilin yekunu üzrə ümumi yığıncağı olub.

AZƏRTAC-ın Naxçıvan bürosunun verdiyi məlumata görə, Naxçıvan Muxtar Respublikası daxili işlər nazirinin müavini, nazir vəzifələrini icra edən polis polkovniki Rəşad İsmayılov açıb. Naxçıvan Muxtar Respublikası Daxili İşlər Orqanları Veteranlar Şurasının sədri, istefada olan polis polkovniki Yusif Həsənov bildirib ki, 2021-ci il ərzində 107 təqaüddə olan polis əməkdaşı, ümumilikdə isə Veteranlar Şurası fəaliyyətə başlayandan bu günə qədər 643 nəfər birgə fəaliyyətə cəlb olunub. Beləliklə, muxtar respublika ərazisində yaşayan 1000-ə yaxın polis veteranının 60 faizdən çoxu polis orqanları ilə birgə fəaliyyət göstərməyə başlayıb.

Qeyd olunub ki, hesabat dövründə 30-dan artıq polis veteranı daxili işlər orqanlarına yeni xidmətə qəbul olunmuş gənc əməkdaşlarla hamilik işinin təşkili və peşə vərdişinin aşılanmasında öz köməkliklərini göstərib, həmçinin daxili işlər orqanlarında xidmətə qəbula namizədlərin öyrənilməsində yaxından iştirak edib. Veteranlarımız tərəfindən hesabat dövründə müxtəlif xarakterli 78 inzibati xəta faktı aşkar edilərək müvafiq tədbirlər görülüb. Veteranlar hesabat dövründə müxtəlif məqsədlərlə həyata keçirilən 50-dən artıq reyddə iştirak ediblər.

Vurğulanıb ki, Naxçıvan Muxtar Respublikası daxili işlər nazirinin müvafiq əmri ilə 2 nəfər nazirliyin fəxri fərmanı ilə təltif edilib, 20 nəfər polis veteranına isə təşəkkür elan olunub. Qarşılıqlı fəaliyyətin bərpasından bu günə kimi isə ümumilikdə, 80 nəfər mükafata layiq görülüb.

Məruzə ətrafında rayon polis şöbələri Veteranlar Şurası sədrlərinin çıxışları dinlənilib.

Şura üzvlərinin və polis veteranlarının səs çoxluğu ilə istefada olan polis polkovniki Yusif Həsənov Naxçıvan Muxtar Respublikası Daxili İşlər Nazirliyi Veteranlar Şurasının sədri seçilib.

Naxçıvan Muxtar Respublikası daxili işlər nazirinin müavini, nazir vəzifələrini icra edən polis polkovniki Rəşad İsmayılov bildirib ki, Ali Məclisin Sədri Vasif Talıbovun rəhbərliyi ilə aparılan məqsədyönlü dövlət siyasəti nəticəsində muxtar respublikanın ictimai-siyasi və sosial-iqtisadi həyatında əldə olunan uğurlar sosial himayəyə ehtiyacı olan həssas kateqoriyalı insanların, o cümlədən veteranların da maddi rifah halını yaxşılaşdırıb. Hazırda muxtar respublikada yaşayan müxtəlif kateqoriyalardan olan veteranların sosial vəziyyətinin gücləndirilməsi və sağlamlıqlarının qorunması daim nəzarətdə saxlanılır.

Azərbaycan Vətən müharibəsi veteranları, xidməti vəzifələrinin icrası zamanı sağlamlıq imkanları məhdudlaşmış şəxslər və digər sosial himayəyə ehtiyacı olan insanlar hərtərəfli dövlət qayğısı ilə tam əhatə olunublar. Onlara mənzillər verilir, müalicəyə göndərilir, təqaüdləri artırılır. Bu isə Vətən qarşısında borclarını layiqincə yerinə yetirən, vətənpərvərlik nümunəsi göstərən insanların fəaliyyətinə dövlətimizin verdiyi qiymətdir.

Vurğulanıb ki, polis veteranları cəmiyyətdə aparıcı qüvvə kimi gənc nəslin vətənpərvər ruhda yetişməsində fəal iştirak etməlidirlər. Veteran şuraları və ərazi polis orqanlarının müvafiq xidmətləri daxili işlər orqanlarından təqaüdə buraxılmış polis əməkdaşlarının birgə fəaliyyətə cəlb olunması tədbirlərini ardıcıl davam etdirməli və onların hamısı ilə qarşılıqlı əlaqə yaradılmalıdır.

Diqqətə çatdırılıb ki, veteranlar göstərilən ali diqqət və qayğını lazımınca dəyərləndirməli, bundan sonra da daxili işlər orqanları ilə sıx əlaqədə fəaliyyət göstərməli, qarşıya qoyulan vəzifələrin layiqincə yerinə yetirilməsində səylə çalışmalıdırlar.

Sonra yığıncağın qərar layihəsi qəbul olunub.

Naxçıvan Muxtar Respublikası Daxili İşlər Nazirliyinin qarşısına qoyulmuş vəzifələrin icrasında qarşılıqlı fəaliyyəti, həmçinin anadan olmasının 65-ci ildönümü münasibətilə istefada olan polis polkovnik-leytenantı Məhərrəm Həsənov nazirliyin fəxri fərmanı ilə təltif edilib.

Naxçıvan Muxtar Respublikası daxili işlər nazirinin müavini, nazir vəzifələrini icra edən polis polkovniki Rəşad İsmayılov Veteranlar Şurasının yeni üzvlərini təbrik edib, polis veteranlarına fəaliyyətlərində uğurlar arzulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.