SİYASƏT
Politoloq: Döyüş meydanında əldə olunan uğurlar Azərbaycan dövlətinin məqsədyönlü siyasətinin nəticəsidir
Bakı, 24 oktyabr, Səadət Hakıyeva, AZƏRTAC
Döyüş meydanında əldə olunan uğurlar Azərbaycan dövlətinin apardığı məqsədyönlü siyasətin nəticəsidir. İslahatlar proqramını uğurla həyata keçirən Azərbaycan bütün sahələrdə böyük inkişafa nail olub. Təsadüfi deyil ki, Azərbaycan Prezidenti İlham Əliyev beynəlxalq aləmdə islahatçı rəhbər kimi tanınır. 2018-ci ildən bu yana həyata keçirilən islahatların səmərəsini biz indi daha aydın görürük.
Bu fikirləri AZƏRTAC-a açıqlamasında politoloq Tofiq Abbasov söyləyib.
Politoloq deyib: “Təbii ki, hamımız üçün ağrılı olan Qarabağ məsələsində dövlət başçısının öz planları vardı. Şübhəsiz ki, Prezident İlham Əliyev əlverişli şəraitin yaranmasını gözləyirdi və eyni zamanda, Azərbaycan xalqının iradəsinə, mətinliyinə və torpaq sevgisinə arxalanırdı. Prezident həmişə çıxışlarında torpaqlarımızın azad olunacağını vurğulayırdı. Azərbaycan Ordusunun bu gün dünyanın 50 ən güclü ordusu sırasında olması heç də təsadüfi deyil və bunu bu gün ordumuz döyüş meydanında sübut edir. Çünki bunun üçün yüksək səviyyədə ordu quruculuğu işləri aparılıb. Prezident İlham Əliyev məsələyə konseptual münasibət göstərməklə, həm də silahlı qüvvələrimizi səviyyəli bir orduya çevirdi. Ordumuzun maddi-texniki bazası kifayət qədər möhkəmdir və peşəkarlıq yüksək səviyyədədir. Azərbaycan Ordusunun gücü sayəsində düşmən geriləyir və silah sursatını qoyub qaçır. Ordumuz BMT-nin qətnamələrinin icrasını özü yerinə yetirir və heç bir qüvvə buna mane ola bilməz. Çünki Azərbaycan əsgəri öz ərazisində, əz torpaqları uğrunda vuruşur”.
Politoloq Azərbaycan Prezidentinin informasiya sahəsində də düşmənə sarsıdıcı zərbələr endirdiyini bildirib. Onun sözlərinə görə, dövlətimizin başçısı həqiqətləri dünyaya çatdıraraq, uzun müddət münaqişəyə biganə münasibət bəslədikləri üçün dünya birliyinə, beynəlxalq təşkilatlara, sosial institutlara haqlı olaraq irad tutur. Prezidentin müsahibələrindən sonra ictimai fikir artıq Azərbaycanın xeyrinə çox dəyişib. Bir sözlə, İlham Əliyev düşmənin informasiya istehkamını da dağıtmağa müvəffəq olub.
Politoloq deyib: “Vətənin azadlığı uğrunda haqq mübarizəmizdə bizi dəstəkləyənlər də oldu, qınayanlar da. Qardaş Türkiyə hər zaman olduğu kimi, Azərbaycanın yanında oldu, haqq işimizdə bizi dəstəklədi. Pakistan da yanımızda oldu. Mənəvi və siyasi dəstək verən ölkələr ədalətin yanındadırlar. Biz bu yoldan dönməyəcəyik. Ərazi bütövlüyümüz bərpa olunana qədər mübarizəmiz davam edəcək”.
Tofiq Abbasov Ermənistanda vəziyyətin çox gərgin olduğunu da diqqətə çatdırıb. Onun sözlərinə görə, işğalçı ölkədə parçalanma və dağılma prosesi sürətlənib. Burada iqtisadi, sosial və hərbi amillərin təsiri böyükdür: “Paşinyan hakimiyyəti uçurumun astanasındadır. Əziyyəti isə sadə xalq çəkir. Ermənistan siyasi hakimiyyəti seçim qarşısındadır və düzgün seçim etməlidir. Necə deyərlər, zərərin yarısından qayıtmaq da xeyirdir.
Ermənistan anlayır ki, bu müharibəni artıq uduzub. İşğalçı ölkənin prezidenti Armen Sarkisyanın NATO ilə danışıqlar aparmaq arzusu da puça çıxdı. Qurumun baş katibi onlara öz yerini göstərdi və bildirdi ki, Azərbaycanın daxili işlərinə qarışa bilməz. Əslində, heç bir qurumun rəhbəri və heç bir ölkə başçısı bizə təzyiq göstərmək hüququna malik deyil. Biz öz müqəddəratımızı özümüz həll edirik. Çünki ərazi bütövlüyümüz uğrunda müharibə aparırıq”.
Politoloq vurğulayıb ki, Azərbaycanın dünyada hər zaman nüfuzu yüksək olub və indi də belədir. Bu, Prezident İlham Əliyevin müdrik diplomatiyasının nəticəsidir. Tom Hanks, Robert De Niro kimi məşhur dünya aktyorları Azərbaycanın səsinə səs verdilər. Ədalətli insanlar Kim Kardaşyandan fərqli olaraq, bizim haqq işimiz dəstəkləyirlər. Ermənistan isə öz riyakar siyasəti ilə özünü dünyanın gözündən salıb. Dünya şahid oldu ki, ermənilər onlara edilən yardımları Dağlıq Qarabağda istehkamlar qurmağa sərf ediblər. Məğlubiyyət acısı yaşayan və saman çöpünə əl atan düşmən bizi ləkələmək üçün milli azlıqlardan istifadə etməyə cəhd edir. Amma faydasızdır. Azərbaycanda yaşayan bütün azlıqların nümayəndələri bəyanat verərək Vətən müharibəsində vuruşmağa hazır olduqlarını və Azərbaycanın ərazi bütövlüyünü dəstəklədiklərini bildirdilər.
“Biz çox gözlədik ki, BMT-nin qətnamələri yerinə yetirilsin. Uzun müddət gözləməkdən bezən Azərbaycan bu qətnamələri özü yerinə yetirməyə başladı. Bunun üçün ölkəmizin kifayət qədər gücü var. İndi hamı gördü ki, Azərbaycan Prezidentinin seçimi düzgün seçimdir. Müzəffər Ali Baş Komandanımızın rəhbərliyi ilə Azərbaycan Ordusu XX əsrin yeni hərbi təcrübəsini nümayiş etdirdi. Azərbaycanın inkişafının qarşısını alan Ermənistana biz mütləq dərs verməliydik və veririk. Əminik ki, Vətən müharibəsi bizim tam qələbəmizlə başa çatacaq və müstəqil Azərbaycan daha böyük uğurlara imza atacaq. Qarabağ Azərbaycandır!”, - deyə Tofiq Abbasov bildirib.