SİYASƏT
Politoloq: Prezident İlham Əliyev “CNN Türk”ə müsahibəsində Azərbaycanın regiondakı sülh təşəbbüslərinə mane olmağa çalışan qüvvələrə mesaj verdi
Bakı, 17 avqust, AZƏRTAC
Prezident İlham Əliyev “CNN Türk” televiziya kanalına verdiyi dolğun müsahibəsində regionda baş verən əhəmiyyətli proseslərə toxunmaqla yanaşı, bir çox istiqamətlərdə önəmli mesajlar da verdi.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin sədri, politoloq Xəyal Bəşirov deyib.
Politoloq diqqətə çatdırıb ki, 44 günlük İkinci Qarabağ müharibəsi dönəmində dünyanın aparıcı media qurumları və televiziya kanalları Prezident, Silahlı Qüvvələrin Müzəffər Ali Baş Komandanı İlham Əliyevdən müsahibələr almaq üçün növbəyə durmuşdular. Onların əksəriyyətinin məqsədi həqiqətləri işıqlandırmaq deyil, müharibənin ilk günlərindən dağıdıcı zərbələr alan Ermənistana görə narahat olmaları idi. Azərbaycan Prezidenti bu fürsəti çox yüksək dəyərləndirərək, keçmiş Qarabağ münaqişəsinin əsl mahiyyətini, Ermənistanın işğalçılıq və təcavüzkar siyasətinin reallıqlarını elə ermənipərəst televiziya kanalları vasitəsilə bütün dünyaya çatdırmağa nail oldu.
Bu prosesin Prezident İlham Əliyevin rəhbərliyi ilə müharibə meydanında Ermənistanın darmadağın edilməsi ilə paralel getdiyini vurğulayan X.Bəşirov bildirib: “Biz düşmənə siyasi, diplomatik və informasiya cəbhəsində həlledici zərbələr vururduq. Həmin zərbələrin təsirindən Ermənistan və ümumilikdə, barəsində süni şəkildə mif formalaşdırılmış dünya erməniliyi hələ də çıxa bilməyib. Ancaq 2020-ci il noyabrın 10-da Ermənistan dövlətinin rəsmi kapitulyasiyasını və Azərbaycanın möhtəşəm qələbəsini özündə ehtiva edən Bəyanatın imzalanmasından sonra demək olar ki, bu müsahibələrin davamı gəlmədi. Çünki, həmin sənədlə Ermənistan dövləti tam məhv olmaqdan xilas olundu. Azərbaycan Prezidentinin müxtəlif televiziya kanallarına verdiyi müsahibələrdə otuzillik həqiqətləri olduğu kimi dünya ictimaiyyətinin diqqətinə çatdırması çoxlarını ciddi şəkildə narahat edirdi”.
O qeyd edib ki, müharibədən sonra postmüharibə dövrü ilə əlaqədar regionda baş verən regional əhəmiyyətli proseslərin daha çox işıqlandırılmasına və beynəlxalq ictimaiyyətə çatdırılmasına ehtiyac duyulduğu bir məqamda həmin nəhəng media qurumlarından indi səs çıxmır. Azərbaycanın regionda formalaşdırdığı və təkcə region ölkələrinin və qonşu dövlətlərin deyil, əksər dünya dövlətlərinin də dəstək verdiyi sülhü, təhlükəsizliyi və stabilliyi təmin edəcək geosiyasi reallığı dünyaya çatdırmaq istəyən media qurumları demək olar ki, çox azdır. “Prezident İlham Əliyevin təşəbbüskarı olduğu sülh və regionun iqtisadi inkişafını təmin edəcək regional kommunikasiyaların bərpası prosesinə Ermənistanın açıq şəkildə qarşı çıxmasını isə demək olar ki, dünyanın heç bir kanalı işıqlandırmaqda maraqlı görünmür. Ancaq qalib Azərbaycan tərəfinin Ermənistanın da daxil olduğu regionun canlanmasında əhəmiyyətli rol oynayacaq bütün müsbət təşəbbüslərinə özünün təxribatçı, məkrli və atəşkəsi pozmaqla müşayiət olunan antisülh addımları ilə cavab verən Nikol Paşinyanın özü barədə sülh təşəbbüskarı obrazını yaratmaq cəhdlərinə dəstək verənlər var. Bu məqamda, məşhur və önəmli televiziya kanallarından olan “CNN Türk” televiziya kanalının hazırda baş verən prosesləri işıqlandırmaq cəhdi təqdirəlayiqdir. Prezident İlham Əliyev həmişə olduğu kimi, bu müsahibəsində də fikirlərini məntiqi ardıcıllıqla və baş verənləri tam şəkildə əhatə etməklə əsaslandırılmış çıxış etdi”, - deyə X.Bəşirov əlavə edib.
Politoloq bildirib ki, Prezident İlham Əliyev öz müsahibəsində artıq missiyanın dəyişdiyini və qarşıya qoyulmuş yeni hədəfin Azərbaycanın təhlükəsizliyini təmin etmək, azad edilmiş əraziləri tam bərpa etmək və bütün bunlarla paralel olaraq Ermənistanda hələ də mövcud olan revanşist qüvvələrin baş qaldırmasının qarşısını qətiyyətlə almaqdır. O deyib: “Regionda formalaşdırılmış sülhün təkcə Azərbaycana deyil, ümumilikdə Cənubi Qafqaz dövlətləri, o cümlədən də, Ermənistan üçün böyük əhəmiyyət daşıdığını diqqətə çatdıran dövlətimizin başçısı qarşı tərəfin sülhə razılaşmaqdan başqa yolunun olmadığını da bildirdi. Prezident İlham Əliyevin vurğuladığı ən önəmli fikirlərdən biri Ermənistanın hansı mövqedə olmasından asılı olmayaraq, regionla bağlı siyasi leksikonun artıq tam dəyişilməsi ilə bağlı söylədikləri idi. Mövcud reallıq da bundan ibarətdir ki, Prezident İlham Əliyevin rəhbərliyi altında Azərbaycan artıq regionda “Dağlıq Qarabağ münaqişəsi”, “status” və bir sıra mənasız terminləri siyasi leksikondan çıxarıb və əvəzində Şərqi Zəngəzur və Zəngəzur dəhlizi kimi terminləri, eləcə də bütün dünyanın istinad etdiyi 10 noyabr və 11 yanvar tarixli Bəyanatları ora daxil edib. Prezident İlham Əliyev həm də, Qərbi Zəngəzur və Mehri barədə danışarkən həmin əraziləri Ermənistanın nəzarətində olan ərazilər adlandırıb. Bununla da, qarşı tərəfə subliminal mesaj verərək bildirir ki, Azərbaycanı hazırda maraqlandıran yeganə amil regionda sülhün olmasıdır. Əgər Ermənistan Azərbaycanın ərazi bütövlüyünü tanımayıb buna qarşı gedərsə, bizim regionla bağlı siyasi leksikona Qərbi Zəngəzur və Mehri iqtisadi rayonları və hətta Qərbi Azərbaycan kimi daxil edə biləcəyimiz hələ çoxlu terminlər olacaq”.
Xalqını düşünəcəyi və dövlətçiliyinin gələcəyinə görə narahat olacağı təqdirdə, Azərbaycanın sülh təşəbbüslərinə səmimi şəkildə razılıq verməklə və bununla da reallaşacaq yeni layihələrdə iştirak edib dövlətini xarici ianələrdən və yardımlardan qurtara biləcəyini Ermənistan rəhbərliyinin diqqətinə çatdırdı.
X.Bəşirov bildirib ki, dövlətimizin başçısı Cənubi Qafqazda uzunmüddətli sülhün bərqərar olacağı təqdirdə, Azərbaycanın Ermənistanla digər nəqliyyat layihələrinin və ticarət əlaqələrinin mümkünlüyü fikirlərinə də toxunub və Azərbaycanın regiondakı sülh təşəbbüslərinə mane olmağa çalışan qüvvələrə mesaj verib.
“Prezident İlham Əliyev müsahibəsində Azərbaycan dövləti və xalqı üçün ən həssas mövzulardan biri olan dost və dost olmayan dövlətlər mövzusuna da geniş yer ayırdı. Xüsusilə də, həmin ərəfədə Azərbaycandan açıq şəkildə hərtərəfli olaraq siyasi, diplomatik və mənəvi dəstəyini əsirgəməyən Pakistan və Türkiyə dövlətlərinə minnətdarlığını ifadə etdi. Türkiyə dövlətinin və onun rəhbər şəxslərinin 44 gün ərzində və ondan sonra atdığı addımları çox yüksək şəkildə dəyərləndirən Prezident İlham Əliyev müharibədən sonra imzalanan Şuşa Bəyannaməsinin əhəmiyyətindən də danışdı”, - deyə politoloq qeyd edib.