Bakı, 16 oktyabr, AZƏRTAC

Artıq növbəti dəfə və fərqli bir platformada Prezident İlham Əliyevin simasında Azərbaycanın Ermənistan və onun rəhbəri Nikol Paşinyan üzərində siyasi və diplomatik qələbəsinin şahidi olduq. Əsası 2020-ci ilin fevral ayında bütün dünya ictimaiyyətinin şahidliyi ilə Münhen konfransı zamanı qoyulan bu ənənə Müstəqil Dövlətlər Birliyinin Dövlət Başçıları Şurasının oktyabrın 15-də videokonfrans formatında keçirilən iclasında da davam etdi.

Bunu AZƏRTAC-a açıqlamasında Siyasi və Hüquqi Strateji Araşdırmalar Mərkəzinin rəhbəri politoloq Xəyal Bəşirov deyib.

Politoloq bildirib ki, qalib Azərbaycanın Müzəffər Prezidentinin məntiqli, dərin təfəkkürlü və yalnız real arqumentlərə əsaslanan prinsipial mövqeli çıxışının fonunda məğlub Ermənistanın kapitulyant baş nazirin özü ilə yanaşı, çıxışı da çox məzlum və rəzil xarakterli idi. Təbii ki, Prezident İlham Əliyevin liderlik bacarıqları, natiqlik xüsusiyyətləri və peşəkar bir diplomata xas keyfiyyətləri ilə müqayisədə erməni baş nazir çox uğursuz bir rəqibdir. Ancaq bütün bu amillərlə yanaşı, qarşı tərəfin həm də başdan ayağa haqsız durumda olması və bununla belə, özünün haqlı olduğunu isbat etməyə çalışmasına uğursuz cəhdləri ona ayrıca bir rəzalət yaşadır. Məhz elə bu səbəblərdən hətta yazılanları oxuyarkən kəkələməsi, tez-tez çaşması və çıxılmaz duruma düşməsi onun iradəsindən asılı olmayaraq, Prezident İlham Əliyevin haqlı ittihamlarını təsdiq etməsinə gətirib çıxarırdı.

Dövlətimizin başçısının çıxışı zamanı digər mühüm məqamlara da toxunduğunu qeyd edən politoloq deyib: “Prezident İlham Əliyev ilk dəfə son günlərdə Fransanın ermənipərəst missiyasını üzərinə götürməyə çalışan cənub qonşumuzun anti-Azərbaycan fəaliyyətindən söz açdı. Uzun illər mehriban qonşuluq münasibəti sərgilədiyimiz, aramızdakı sərhədi dostluq sərhədi hesab etdiyimiz və eyni coğrafiya ilə yanaşı, bir çox hallarda eyni mədəniyyəti, eyni tarixi və ən əsası isə eyni dini paylaşdığımız İranın işğalçı Ermənistanla qanunsuz iş birliklərini ifşa etdi. Əslində, heç vaxt inanmayacağımız və cənub qonşumuza yaraşdırmayacağımız bir çox cinayətlərin ifşasının əsasını elə İran dövlətini idarə edənlərin son günlərdəki cəfəng hərəkətləri qoydu. İslam dünyasının mərkəzinə çevrilmək iddiasında olan İran İslam Respublikasının otuz ilə yaxın dövr ərzində faşist bir rejimin işğalı altındakı ərazilərimizdə həm də islami dəyərlərə qarşı törədilən soyqırımda iştirak etməsi onun bütün siyasətinin iflası deməkdir”.

X.Bəşirov diqqətə çatdırıb ki, bu qətiyyətli fikirlərin təsirindən, Prezident İlham Əliyevin prinsipial mövqeyindən və ya müxtəlif fikirlər arasında çaşbaş qalaraq çıxılmaz vəziyyətə düşən baş nazir Ermənistanın başqa yolu olmadığını bir daha anladı. Əslində, bu reallığı çoxdan dərk edən, sadəcə, bunu dilə gətirməyə çəkinən və elə bu səbəbdən də fikirləri ilə əməlləri arasında kəskin ziddiyyət olan Nikol Paşinyana da Prezident İlham Əliyevin bu sərt fikirləri səsləndirməsinə ehtiyac var idi. Çünki hər bir platformada bu fikirlərin Azərbaycan Prezidentinin dilindən səsləndirilməsi həmin platformadakı ermənipərəstlərin və onların sülhə maneə törətmək istəklərinin qarşısına elə Paşinyanın özü tərəfindən qoyması üçün ən kəsərli arqumentlərdir. MDB Dövlət Başçılarının bu iclasında Prezident İlham Əliyevin dolğun, məntiqli və əsaslı arqumentlərlə zəngin çıxışı, bu çıxış qarşısında erməni baş nazirin məntiqsiz və uğursuz cəhdləri postmünaqişə dövründə Azərbaycanın növbəti siyasi və diplomatik uğurudur.

“Prezident İlham Əliyev MDB-nin dövlət rəhbərlərinin və bütün dünyanın diqqətinə onu da çatdırdı ki, Azərbaycan işğala son qoymaqla həm də ümumbəşəri bəla olan çox böyük narkotrafikin şah damarını kəsmiş oldu. Buna görə bəzən bizi əsassız şəkildə ittiham edənlər, o cümlədən uzun illər dost cildinə girən qonşularımız, əslində, bizə təşəkkür etməli və bu məsələdə əks tərəfi kəskin ittiham etməlidirlər. Hesab edirəm ki, bu görüşdə də xalq və dövlət olaraq istəyimizə çatdıq, zəruri və sərt mesajlarımızı lazımi ünvanlara çatdırdıq. Onu da bəyan etdik ki, münaqişəyə son qoymaqla regionda sülhün, təhlükəsizliyin və sabitliyin təmin edilməsinə nail olmaqda israrlıyıq. Münaqişənin tarixdə qaldığını rəsmiləşdirəcək sülh sazişinin imzalanması yolunda zamandan başqa heç nə bizə mane ola bilməz”, - deyə Xəyal Bəşirov vurğulayıb.