SİYASƏT
Prezident İlham Əliyev Ermənistan-Azərbaycan münaqişəsinin həlli məsələsində ölkəmizin qəti mövqeyini bir daha ifadə etdi
Bakı, 8 iyul, AZƏRTAC
İyulun 6-da Prezident İlham Əliyev və birinci xanım Mehriban Əliyeva Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalının açılışında iştirak ediblər. Tibb ocağında yaradılan şəraitlə tanışlıqdan sonra dövlətimizin başçısı Azərbaycan Televiziyasına, İctimai Televiziyaya və “Xəzər” Televiziyasına müsahibə verib. Dövlət başçısı müsahibəsində ölkəmizi əhatə edən bütün məsələlərdən, o cümlədən Ermənistan–Azərbaycan Dağlıq Qarabağ münaqişəsindən, bu istiqamətdə görülən işlərdən, işğalçı ölkədəki son vəziyyətdən, hazırda orada faşist ideologiyasına göstərilən hüsn–rəğbətdən söhbət açıb.
Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov dövlətimizin başçısının müsahibəsi ilə əlaqədar AZƏRTAC-a açıqlamasında deyib: “Prezident İlham Əliyev həmişəki kimi, bu dəfə də münaqişənin nizamlanması ilə əlaqədar qəti mövqeyini ortaya qoydu və bildirdi ki, bizim mövqeyimizdə hər hansı bir dəyişiklik yoxdur, ola da bilməz. Çünki bizim mövqeyimiz haqq-ədalət mövqeyidir və tarixi ədalətə, eyni zamanda, beynəlxalq hüquqa əsaslanır. Prezident bu məsələ ilə bağlı kifayət qədər açıqlamalarının olduğunu xatırlatdı və bunları beynəlxalq tədbirlər çərçivəsində səsləndirdiyini bildirdi. Prezident bir daha bəyan etdi ki, münaqişə ölkəmizin ərazi bütövlüyü çərçivəsində həll olunmalıdır. Heç vaxt Azərbaycan torpağında ikinci erməni dövlətinin yaranmasına icazə verilməyəcək. İşğal edilmiş bütün torpaqlar işğalçılardan azad edilməlidir, Azərbaycan vətəndaşları öz dədə-baba torpaqlarına qayıtmalıdırlar. Bu, prinsipial mövqedir və dünya birliyi bu mövqeyi dəstəkləyir.
Prezident ölkəmizin ərazi bütövlüyü ilə əlaqədar bütün aparıcı beynəlxalq təşkilatların müxtəlif dövrlərdə, o cümlədən son vaxtlar açıq-aydın ifadələr işlətdiyini, qərarlar, qətnamələr qəbul etdiklərini bir daha diqqətə çatdırdı. Bununla əlaqədar BMT, onun Təhlükəsizlik Şurasının, Baş Assambleyasının, Qoşulmama Hərəkatının, ATƏT-in, İslam Əməkdaşlıq Təşkilatının, Avropa Parlamentinin, Avropa İttifaqının, Avropa Şurası Parlament Assambleyasının, NATO və digər təşkilatların qətnamələr qəbul etdiyini xatırlatdı.
Bütün beynəlxalq təşkilatlarda, o cümlədən Münhen Təhlükəsizlik Konfransında münaqişənin yaranma səbəbləri, tarixi ədalət barəsində kifayət qədər açıqlamalar verilib. Artıq dünyanın əksər dövlətləri və nüfuzlu beynəlxalq qurumlar Ermənistanı rəsmən işğalçı ölkə kimi tanıyırlar. Bu, ilk növbədə, respublikamızın tarixi diplomatik qələbəsidir.
K.Seyidov bildirib ki, Ermənistanın baş naziri Nikol Paşinyanın tez-tez Azərbaycanın işğal altında olan ərazilərinə səfər etməsi və "Qarabağ Ermənistandır” deməsi onun beynəlxalq məsələlərdən bixəbər olmasından xəbər verir. Dövlətimizin başçısı da işğalçı ölkənin baş nazirinin bu sərsəm fikrinə cavab verib: “Qarabağ Azərbaycandır, nida işarəsi”. Təəssüf edirik ki, hələ də ikili standartlar “xəstəliyindən” sağala bilməyən və siyasi riyakarlıqdan əl çəkmək istəməyən bir sıra beynəlxalq təşkilatlar işğalçı ölkənin baş nazirinin bu sərsəm bəyanatlarına laqeyd münasibət göstərir, işğalçını öz adı ilə çağırmağa cəsarət etmirlər.
Ermənistan–Azərbaycan Dağlıq Qarabağ münaqişəsinin nizamlanmasında vasitəçilik missiyasını üzərinə götürmüş ATƏT-in Minsk qrupunun həmsədrlərinin susqunluq nümayiş etdirmələri də təəccüb doğurur. Dövlətimizin başçısı yerli telekanallara müsahibəsində də bu məsələni diqqətə çatdıraraq dedi ki, Minsk qrupu niyə buna cavab vermir? Bu ifadə, əslində, Minsk qrupunun formalaşdırdığı danışıqların mahiyyətini alt-üst edir, danışıqları faktiki olaraq əhəmiyyətsiz edir. Ölkə başçısı Ermənistan tərəfinin iki ildir danışıqların formatını dəyişmək istəyini, Nikol Paşinyanın “Azərbaycan qondarma Dağlıq Qarabağın qondarma, saxta, “liderləri” ilə danışıqlar aparmalıdır” cəfəng iddiasını diqqətə çatdırdı. Bu vaxta qədər işğalçı ölkənin beynəlxalq hüququn normalarına zidd olan bu tələbinə cavab verilməməsi siyasi riyakarlığın və ikili standartların nəticəsidir.
Təbii ki, Ermənistanın baş nazirinin “Qarabağ Ermənistandır” deməklə onun danışıqların mahiyyətini tamamilə yerə vurmasının qarşısı dərhal alınmalı idi. Onun “Formatı dəyişmək lazımdır” fikri isə danışıqları əhəmiyyətsiz etdi. Göründüyü kimi, bu adam beynəlxalq məsələlərdən, xüsusilə Ermənistan–Azərbaycan Dağlıq Qarabağ münaqişəsinin tarixindən tamamilə bixəbərdir. Dövlət başçısı ikili standartlar nümayiş etdirən beynəlxalq təşkilatları sərt tənqid etdi. Dedi ki, qondarma “Dağlıq Qarabağ respublikası”nın saxta “prezidenti” Şuşada andiçmə mərasimi keçirib. Niyə bu özbaşınalıqlara, beynəlxalq hüquqa hörmətsizliyə adekvat reaksiya verilmir? Axı bu, açıq-aydın təxribatdır. İndiyədək heç kim tərəfindən tanınmayan bu kriminal Dağlıq Qarabağ rejiminin bir neçə “seçkisi” olub, Şuşada toy-bayram keçirilib. Buna adekvat cavab verilir? Verilmir! Bəli, bəzi mücərrəd sözlərlə, nala-mıxa vurmaqla cavab verilir.
“Dövlət başçısı bir daha vurğuladı ki, Azərbaycan haqqın tərəfindədir. Biz haqlı olmağımızı həm beynəlxalq arenalarda, həm də döyüş meydanında göstərmişik. Yəqin ki, 2016- cı ilin Aprel döyüşləri Ermənistanın yadından çıxmayıb. Görünür, Ermənistan tərəfi hələ də dərk etmir ki, bu dəfə Azərbaycan Ordusundan canını qurtara bilməyəcək”, - deyə partiya sədri bildirib.