Bakı, 3 iyul, AZƏRTAC

Azərbaycan Milli Mətbuatının 145 illik yubileyinin keçirilməsi haqqında Prezident İlham Əliyevin Sərəncamı bir daha təsdiqlədi ki, müstəqil mətbuatın inkişafı dövlət başçısının diqqət mərkəzində saxladığı prioritet sahələrdəndir. Sərəncama əsasən, Azərbaycan Respublikasında milli mətbuat ənənələrinin qorunması və təbliğ edilməsi məqsədilə, kütləvi informasiya vasitələrinin ölkəmizin ictimai-siyasi həyatındakı yerini və müasir cəmiyyət quruculuğu prosesində rolunu nəzərə alaraq, koronavirus (COVID-19) pandemiyası ilə əlaqədar ölkə ərazisində tətbiq edilən xüsusi karantin rejiminin tələbləri və Azərbaycan Respublikasının Nazirlər Kabineti yanında Operativ Qərargahın tövsiyələri nəzərə alınmaqla, yubiley tədbirlərinin keçirilməsinin təmin edilməsi mətbuatın inkişafına göstərilən diqqətin bariz nümunəsidir.

Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov bildirib.

K.Seyidov deyib: “Bu gün hər bir kəsə bəllidir ki, Prezident İlham Əliyevin humanist siyasətində mətbuata diqqət və qayğı, həmçinin azad sözün inkişafına dəstək prioritet təşkil edir. Bunu dünyada analoqu olmayan sosial layihənin ilk dəfə Azərbaycanda reallaşdırılması da təsdiqləyir. Jurnalistlər üçün tikilmiş binaların açılış mərasimlərində iştirak edən ölkə Prezidenti bir daha vurğuladı ki, müstəqil medianın inkişafı, azad və demokratik fikrin qorunması dövlətimiz üçün prioritet məsələdir.

Bu, bir faktdır ki, ölkəmizdə müstəqil mətbuatın inkişafına, insanlara öz fikirlərini sərbəst ifadə etmək azadlığına 1993-cü ilin ikinci yarısından sonra şərait yaradılıb. Həmin vaxtdan başlayaraq, respublikamızda bu istiqamətdə qətiyyətli addımlar atılıb. Demokratiyanın əsasını təşkil edən müstəqil mətbuatın və azad sözün inkişafı dövlət siyasətinin əsasını təşkil edib. Bu, Ulu Öndərin rəhbərliyi ilə 1995–ci il noyabrın 12-də referendum yolu ilə qəbul edilən Azərbaycan Konstitusiyasında da öz əksini tapdı. Konstitusiyanın əsas prinsiplərindən birini Azərbaycan dövlətində söz, fikir və mətbuat azadlığı, hər kəsin məlumat almaq və yaymaq hüququ, KİV üzərində senzuranın yolverilməzliyi dövlətin əsas prinsipi olması təşkil edir.

1998-ci il avqustun 6-da ulu öndər Heydər Əliyevin Fərmanı ilə mətbuat üzərində senzura ləğv olundu. Senzuranın ləğvi və bu qəbildən olan digər tədbirlər müstəqil mətbuatın inkişafını, vətəndaşların beynəlxalq hüquq normaları və Azərbaycan Konstitusiyası ilə təsbit olunmuş söz, məlumat və fikir azadlığını təmin edir. Bu qərar demokratik cəmiyyət quruculuğu yolunu seçən Azərbaycanın beynəlxalq aləmə inteqrasiyasını daha da sürətləndirdi. 2000-ci ildə Mətbuat və İnformasiya Nazirliyinin ləğvi ilə kütləvi informasiya vasitələrinin təsis olunması daha da asanlaşdı. Ulu Öndərin 11 may 2002-ci il tarixli “Kütləvi informasiya vasitələri haqqında” Azərbaycan Respublikası Qanununda dəyişikliklər və əlavələr edilməsi barədə” Fərmanı qəzet və jurnalların təsis edilməsini və ondan istifadə imkanlarını qat-qat asanlaşdırdı. Bütün bunlar Ulu Öndərin demokratik prinsiplərin inkişafına verdiyi dəyərin nümunəsidir.

2003-cü ildən başlayaraq ölkəmiz bütün sahələr üzrə yeni inkişaf mərhələsinə qədəm qoydu. Həmin vaxtdan ölkəyə rəhbərlik edən Prezident İlham Əliyevin söz və mətbuat azadlığını daim diqqət mərkəzində saxlaması ölkəmizin beynəlxalq aləmdəki əlaqələrini daha da genişləndirdi. Dövlət başçısı respublikada mətbu nəşrlərin sərbəst fəaliyyətinə, jurnalistlərin öz iradələrini azad şəkildə ifadə etmələrinə bütün imkanların yaradılmasını əməli işi və qəbul etdiyi qərarlarla təsdiqlədi.

Azərbaycan Milli Mətbuatının yaranmasının 130, 135 və 140 illik yubileylərinin dövlət səviyyəsində qeyd edilməsi, yubiley münasibətilə mətbuat işçilərinin təltif edilməsi, onlara fəxri adların verilməsi, habelə kütləvi informasiya vasitələrinə maliyyə yardımının göstərilməsi dövlət başçısının bütövlükdə, jurnalistikaya göstərdiyi qayğının göstəricisi idi. Prezident İlham Əliyevin “Azərbaycan Respublikasında kütləvi informasiya vasitələrinə birdəfəlik maliyyə yardımı göstərilməsi haqqında”, eləcə də “Azərbaycan Respublikasında kütləvi informasiya vasitələrinin inkişafına dövlət dəstəyi konsepsiyasının təsdiq edilməsi haqqında” sərəncamları mətbuatın inkişafını daha da stimullaşdırdı.

Jurnalistikaya göstərilən diqqət və qayğıdan söhbət düşəndə jurnalistlərə dövlət hesabına hər cür şəraiti olan mənzilin verilməsi xüsusi qeyd edilməlidir. Çünki indiyə qədər dünyanın heç bir ölkəsində belə humanitar addım atılmayıb. Bu təşəbbüs yalnız dövlətimizin başçısı cənab İlham Əliyevə məxsusdur. Dövlətimizin başçısı bunu çıxışında da vurğulayıb: “Mənim jurnalistlərlə çoxsaylı görüşlərim, səmimi söhbətlərim bunu göstərir. Xüsusilə jurnalistlər üçün binaların tikilməsi də bu siyasətin bir təzahürüdür. Bu təşəbbüs bir neçə il bundan əvvəl irəli sürülmüşdü, jurnalistlər belə məsələ qaldırmışdılar, mən də buna müsbət reaksiya verdim və nəticə etibarilə artıq biz burada ikinci binanın açılışını qeyd edirik. Xatırlayıram 4 il bundan əvvəl birinci binanın açılışında mən demişdim ki, yəqin gələcəkdə bu əraziyə “Jurnalistlər şəhərciyi” deyiləcək və bu, belə də oldu. Artıq bu gözəl yer “Jurnalistlər şəhərciyi”dir, burada üçüncü bina da tikiləcək. Əlbəttə ki, biz jurnalistlərin məişət problemlərinin həlli üçün gələcəkdə əlavə tədbirlər görəcəyik”.