Bakı, 25 yanvar, Anar Allahverdi, AZƏRTAC

Azərbaycanda gənclərə dövlət tərəfindən yüksək səviyyəli diqqət və qayğı göstərilir. Buna misal kimi, gənclərin müxtəlif sahələrdə dövlət tərəfindən himayə olunmasını göstərmək olar. Azərbaycanda gəncliyin inkişafı ilə bağlı müxtəlif dövlət proqramlarının həyata keçirilməsi, eyni zamanda, davamlı şəkildə dövlət idarəçiliyinə gənc kadrların cəlb edilməsi bu siyasətin bariz nümunəsidir. Dövlətin gənclərə dəstək və diqqəti Azərbaycan gəncliyində özünə, öz gücünə, istedadına inam hissini daha da artırıb.

Bu siyasətin həyata keçirilməsinin təbii əsasları var. Belə ki, əhalinin son iyirmi ildə təbii artım tempi ölkənin sosial identifikasiyasının yenilənməsinə və əhalinin sayında gənc nəslin payının artmasına səbəb olub. Əgər müstəqilliyin ilk illərində ölkə əhalisinin sayı yeddi milyon idisə, artıq bu say on milyonu ötüb. Əhalinin təbii artımı özündə dövlət və cəmiyyət üçün müsbət imkanlar yaratmaqla yanaşı, sosial-iqtisadi cəhətdən bir çox risklərin meydana çıxmasına səbəb olan amildir. Bu mənada, baş verə biləcək proseslərin uğurla idarə olunması ciddi təhlillərə söykənən dövlət siyasətinin həyata keçirilməsini şərtləndirir. Müstəqilliyin müxtəlif dövrlərinin təhlili hər bir dövrün özünəməxsus xarakterini müəyyən etməyə imkan verir.

Son dövrlər gənc nəsildən olan yaxşı təhsil almış, müasir baxışlı yeni insanların dövlət idarəçiliyinə cəlb edilməsi və bu kadrların dövlət idarəçiliyi iyerarxiyasında ön sıralara çəkilməsi dövlət siyasətinin tərkib hissəsidir. Bu, eyni zamanda, dövlətin maraqlarının ən müasir siyasi, elmi, texnoloji əsaslarla təmin olunmasına imkan verən strateji xəttin tərkib hissəsidir. Prezident İlham Əliyev bu məsələyə Davos Dünya İqtisadi Forumunun “Strateji baxış: Avrasiya” mövzusunda panel iclasında ona ünvanlanmış sualları cavablandırarkən də toxunub. Dövlət başçısı hökumətin tərkibində köklü dəyişikliklərin ölkə üçün müəyyənləşdirilmiş siyasətin tərkib hissəsi olduğunu bildirib. Hökumətə yaxşı təhsil almış, müasir baxışlı yeni insanlar dəvət edildiyini və bu dəyişikliklərin zamanla ayaqlaşmanın tərkib hissəsi olduğunu qeyd edib. Gənc kadrlar nəinki təkcə hökumətə, eyni zamanda, Prezident Administrasiyasına da gətirilib. Eyni zamanda, bu ilin fevral ayında keçiriləcək parlament seçkiləri islahatların qanunvericilik müstəvisində də reallaşdırılması imkanının yaradılmasına hesablanıb və bunu ölkənin siyasi səhnəsinin cavanlaşdırılması istiqamətində cəmiyyətə verilmiş yeni bir şans kimi də dəyərləndirmək olar. Prezidentin fəaliyyəti barədə ictimai rəyin öyrənilməsi məqsədilə Sosial Tədqiqatlar Mərkəzi tərəfindən aparılan araşdırmalar da göstərir ki, kadr və struktur islahatları respondentlərin böyük əksəriyyətinin gözləntilərini doğruldub və onların əsas gözləntiləri gənc nəsil üçün yeni perspektivlərin və imkanların yaradılması olub. Bu mənada, hökumətdə təmsil olunan yaşlı nəslin daha gənc kadrlarla əvəz olunmasının da respondentlər tərəfindən müsbət qarşılanması həyata keçirilən siyasətin uğurundan xəbər verir. Beləliklə, ölkə Prezidentinin fəaliyyətində ictimai rəyin rolunun yüksək olması sorğunun nəticələri ilə öz təsdiqini tapıb.

Prezident İlham Əliyevin seçkilərdən sonra parlamentin də həyata keçirilən islahatların mühüm hissəsi olacağına əmin olduğunu bildirməsi bu istiqamətdə baş verəcək dəyişikliklərə siyasi rəhbərliyin maraqlı olduğunu göstərir.