Bakı, 11 aprel, AZƏRTAC

Ölkəmizin ictimai-siyasi həyatında əhəmiyyətli rol oynayan 2018-ci ilin 11 aprel seçkilərindən bir il ötür. Seçkilərdə İlham Əliyev seçici səslərinin 86,03 faizini qazanaraq yenidən ölkə rəhbəri seçildi. Bu seçim “Güclü dövlət, yüksək rifah” tezisini fəaliyyətinin əsas prinsipi kimi qəbul edən Prezidentimizə milyonların sevgisinin, dəstəyinin növbəti təzahürü oldu.

Bunu AZƏRTAC-a açıqlamasında Milli Məclisinin deputatı, Yeni Azərbaycan Partiyası Ağdaş rayon təşkilatının sədri Cavid Osmanov deyib.

Onun sözlərinə görə, bu qələbə son 15 ilin uğurlarına söykənir: “Hələ 2003-cü ilin prezident seçkilərindən sonra keçirilən andiçmə mərasimində qarşıdakı illərdə görüləcək işləri açıqlayan dövlətimizin başçısı demişdir ki, “Azərbaycanı qüdrətli dövlətə çevirmək üçün ən başlıcası, ölkədə Heydər Əliyevin siyasəti davam etdirilməlidir. Bu gün yüksək kürsüdən çıxış edərkən mən Azərbaycan xalqına söz verirəm ki, bu siyasətə sadiq qalacağam, heç vaxt bu yoldan dönməyəcəyəm, Heydər Əliyevin siyasətini davam etdirəcəyəm”. Dövlətimizin başçısının verdiyi vədləri yerinə yetirməsi Azərbaycanın davamlı inkişafını təmin edib, eyni zamanda, 2008-ci, 2013-cü və 2018-ci illərdə keçirilən prezident seçkilərindəki qələbəsini də şərtləndirib”.

Bir il ərzində bütün sahələrdə əldə olunan uğurların son 15 ildə görülən işlərin davamı olduğunu vurğulayan C.Osmanov bildirib ki, bu, hər bir Azərbaycan vətəndaşında böyük qürur hissi yaradır.

Milli Məclisin deputatı deyib: “Son bir ilə nəzər salsaq görərik ki, bu ilin hər ayı, hər günü mühüm hadisə ilə tarixə yazılıb. Belə ki, 11 aprel prezident seçkilərindən sonrakı növbəti ayda Səngəçal terminalında Cənub Qaz Dəhlizinin rəsmi açılış mərasiminin keçirilməsi Azərbaycanın dünyanın enerji təhlükəsizliyinin təminatında artan rolundan xəbər verir. Həmçinin bu dəhliz ölkəmizə əlavə siyasi, iqtisadi, maliyyə imkanları yaradacaq, eləcə də zəngin təbii qaz resurslarımızın dünya bazarlarına bundan sonra onilliklər ərzində ixracını təmin edəcək, valyuta axını artacaq, dayanıqlı inkişafımız daha da möhkəmlənəcəkdir. Bu mühüm hadisənin ardınca iyun ayında Cənub Qaz Dəhlizinin əsas seqmentlərindən olan TANAP-ın Türkiyənin Əskişəhər şəhərində açılış mərasimi keçirildi. TANAP-ın istismara verilməsi Türkiyə-Azərbaycan qardaşlığının növbəti təzahürü oldu. Bu uğurların davamı olaraq ötən ilin oktyabrında SOCAR-ın həyata keçirdiyi investisiya layihələrindən olan “Star” neft emalı zavodu istifadəyə verildi. Son 30 ildə həyata keçirilən ən böyük real sektor sərmayəsi olan “Star” neft emalı zavodu Avropa, Yaxın Şərq və Şimali Afrika bölgələrində ən böyük neft müəssisələrindən biri olaraq uğurla fəaliyyət göstərir. Enerji sektorunda uğurlarımız davamlıdır və davam edəcəkdir”.

Cavid Osmanovun sözlərinə görə, neft siyasətinin uğurlu nəticəsidir ki, bu gün iqtisadiyyatın şaxələndirilməsi istiqamətində ölkəmizdə davamlı addımlar atılır. “Son bir ilin mühüm addımlarından biri kimi də Prezident İlham Əliyevin Fərmanı ilə təsdiqlənmiş sayca dördüncü “Azərbaycan Respublikası regionlarının 2019–2023-cü illərdə sosial-iqtisadi inkişafı Dövlət Proqramı”nın qəbulunu qeyd etməliyik. 2018-ci ildən bəri bölgələrə 28 səfər edən Prezident İlham Əliyev bu səfərlər zamanı həm görülən işlərə nəzarət edir, həm də yerlərdə vətəndaşlarla görüşür, onları narahat edən problemlərin həlli istiqamətində göstərişlər verir. Rayonların sosial-iqtisadi durumunun yaxşılaşdırılması, həmçinin infrastruktur layihələri ilə əlaqədar biri-birindən önəmli sərəncamlar imzalanıb. Hər bir rayonun sosial-iqtisadi inkişafının sürətləndirilməsi üçün əlavə tədbirlər planının təsdiqlənməsi və Prezidentin Ehtiyat Fondundan vəsaitlərin ayrılması da qeyri-neft sektorunun inkişafının prioritet olmasından xəbər verir”, - deyə deputat qeyd edib.

Bu ilin ötən aylarında dövlətimizin başçısı tərəfindən imzalanan fərman və sərəncamların əhəmiyyətinə də toxunan C.Osmanov bildirib ki, bu sənədlərin mütləq əksəriyyəti əhalinin sosial müdafiəsinin gücləndirilməsinə xidmət edir və ölkəmizdə vətəndaş amilinə nə qədər böyük dəyər verildiyinə bariz nümunədir. İqtisadi göstəricilərin yalnız rəqəmlərdə deyil, insanların gündəlik həyatında öz əksini tapmasının vacibliyini bildirən Prezident İlham Əliyev həyata keçirilən siyasətin mərkəzində Azərbaycan vətəndaşının dayandığını dəfələrlə bildirib. Bu ilin əvvəlindən əməkhaqqı və pensiyaların, təqaüdlərin, qaçqın və məcburi köçkünlər, aztəminatlı ailələr üçün nəzərdə tutulan güzəşt və müavinətlərin artırılması, problemli kreditlərlə, çoxmənzilli binaların sənədləşdirilməsi ilə bağlı sərəncamların imzalanması ölkə vətəndaşlarının sosial müdafiəsinin təminatı istiqamətində aparılan siyasətin ən bariz nümunələridir. Bu il minimum əməkhaqqı 130 manatdan 180 manata, minimum pensiyaların məbləği 116 manatdan 160 manata çatdırıldı.

Prezident İlham Əliyev şəhid ailələrinə, müharibə veteranlarına və əlillərə davamlı olaraq diqqət və qayğı göstərir. Ötən ilin prezident seçkilərindən sonra dövlətimizin başçısı tərəfindən imzalanan ilk Fərman da şəhid ailələri ilə bağlı oldu - şəhid ailələrinə birdəfəlik 11 min manat məbləğində kompensasiyanın verilməsi. Növbəti Fərmanla şəhid ailələrinə verilən müavinət 242 manatdan 300 manata, Əfqanıstanda həlak olanların ailələri üçün nəzərdə tutulan müavinət 220 manatdan 300 manata çatdırıldı. Keçən il şəhid ailələrinə 626 mənzil verilib. Bu il isə daha 800 şəhid ailəsi mənzillə təmin olunacaq. Aprelin 5-də Prezident İlham Əliyev Bakının Kürdəxanı qəsəbəsində məcburi köçkün ailələri üçün istifadəyə verilən yeni yaşayış kompleksinin açılışında iştirak etdi. Açılış mərasimində İlham Əliyev bu günə qədər bu kateqoriyadan olan vətəndaşların sosial müdafiəsinin gücləndirilməsi istiqamətində atılan addımlara diqqət yönəldilərək söylədi ki, bu, ölkə üzrə məcburi köçkünlər üçün salınan sayca 103-cü müasir yaşayış kompleksidir.

Deputat qeyd edib ki, dövlətimizin başçısının atdığı hər addım onun ölkə vətəndaşının yanında olduğunu bir daha təsdiqləyir. Prezident İlham Əliyevin bu il Şamaxı, Ağsu və İsmayıllıda baş verən zəlzələnin fəsadları ilə şəxsən tanış olması, əhaliyə lazımi kömək göstərilməsi üçün aidiyyəti qurumlara tapşırıqlarını verməsi, vurulan ziyanın dövlət tərəfindən ödənilməsi ilə bağlı imzaladığı sərəncamlar çox təqdirəlayiqdir və bu, ölkə rəhbərinin hər bir Azərbaycan vətəndaşının Prezidenti olmasına bariz nümunədir. Həmçinin Prezidentin zəlzələ bölgəsində aparılan işlərin gedişi ilə dəfələrlə maraqlanması yerli sakinlər, eləcə də ölkə ictimaiyyəti tərəfindən böyük rəğbət hissi ilə qarşılandı. Eyni addımlar Bakının Nizami rayonundakı ticarət mərkəzində baş vermiş yanğın zamanı da diqqəti çəkdi. Hər zaman ölkə vətəndaşının yanında olan İlham Əliyev yanğından dərhal sonra müşavirə keçirərək aidiyyəti qurumlara müvafiq tapşırıqlar verdi, imzaladığı Sərəncamla zərərçəkmiş sahibkarlara maddi yardım göstərilməsi məqsədilə 2019-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan İqtisadiyyat Nazirliyinə ilkin olaraq 3 milyon manat vəsait ayrıldı.

Cavid Osmanov deyib ki, “Fransanın "Opinion Way" şirkətinin Azərbaycan Prezidenti İlham Əliyevin son bir ildəki fəaliyyəti ilə bağlı açıqladığı geniş rəy sorğusunun nəticələri xalq-iqtidar birliyinin təcəssümüdür. Sorğunun nəticələri bir daha göstərdi ki, Azərbaycan xalqı Prezident İlham Əliyevin son bir ildəki fəaliyyətini, həyata keçirdiyi islahat kursunu, ölkəmizdəki mövcud ictimai-siyasi vəziyyəti, hökumətin daxili və xarici siyasətini yüksək qiymətləndirir. Rəyi soruşulanların 80 faizdən çoxunun Azərbaycandakı möhkəm və davamlı sabitliyi Prezidentin fəaliyyətinin birbaşa nəticəsi hesab etməsi isə sübut edir ki, ölkəmizdəki sabitliyin dayağı həqiqətən də xalq-iqtidar birliyidir.

“Prezident İlham Əliyevin də qeyd etdiyi kimi, iqtisadi uğurları artan, maliyyə imkanları möhkəmlənən ölkəmizdə əhalinin maddi rifah halının yüksəlməsi naminə hazırlanan “sosial paket”də daha ciddi islahatlar nəzərdə tutulur. Məhz bu addımlara söykənərək, əminliklə deyə bilərik ki, 2019-cu il bütövlükdə ölkəmiz üçün uğurlu il olacaq, - deyə Milli Məclisin deputatı vurğulayıb.