SİYASƏT


“Prezidentimizin Cəbrayıl şəhərinin və kəndlərinin işğaldan azad olunduğunu elan etməsi bizi sevinc göz yaşlarına bürüdü” – AZƏRTAC Cocuq Mərcanlıdan xəbər verir FOTO VİDEO

Cəbrayıl, 6 oktyabr, Aydın Yavər, AZƏRTAC

Cocuq mərcanlılılar şanlı Azərbaycan Ordusunun zəfər xəbərlərini 4 il əvvəl qayıtdıqları doğma torpaqlarında böyük sevinclə qarşılayırlar. Cəbrayıl şəhərinin və rayonun kəndlərinin azad olunması bu sevinci daha da artırıb.

AZƏRTAC-ın cəbhə bölgəsinə ezam olunmuş müxbiri xəbər verir ki, rəşadətli Azərbaycan Ordusu qarşısında aciz qalan erməni faşistləri Cocuq Mərcanlını da ağır artilleriyadan atəşə tutub. Lakin kənd sakinləri düşmənin bu təxribatından qorxmurlar və kənddə hər kəs öz gündəlik işi ilə məşğuldur. Hazırda düşmənin dinc sakinləri hədəf alması nəticəsində mülki obyektlərə dəyən zərər hesablanır, infrastruktur bərpa olunur.

Erməni təxribatı nəticəsində sentyabrın 27-dən başlayan döyüşlər zamanı Cocuq Mərcanlının da hədəf alındığını bildirən kənd sakini Mətləb Həziyev deyib ki, bu təxribat nəticəsində evlərə və infrastruktura ciddi ziyan dəyib: “Düşmənin təxribatının məqsədi aydındır. Onlar dinc sakinləri qorxudaraq, bizi buradan çıxarmaq istəyirdilər. Lakin bu niyyətləri qursaqlarında qaldı. Heç kim öz evini tərk etmədi. Şanlı Azərbaycan Ordusu onlara elə zərbə vurur ki, bir də çətin özlərinə gələ bilələr. Prezidentimizin Cəbrayıl şəhərinin və kəndlərinin işğaldan azad olunduğunu elan etməsi bizi sevinc göz yaşlarına bürüdü”.

Söhbət etdiyimiz kənd sakini Vasif Quliyev də hər kəsin əhval-ruhiyyəsinin yüksək olduğunu deyib. “Torpaqlarımızın işğaldan azad edilməsi bizim üçün ən böyük hədiyyədir. İnanırıq ki, lap yaxın vaxtlarda bayrağımız Şuşada, Laçında, Kəlbəcərdə dalğalanacaq”, - deyə o əlavə edib.

“Müharibə başlayandan biz öz kəndimizdəyik, erməni faşistləri bizim kəndi də hədəf aldı, amma niyyətləri həyata keçmədi”, - deyən kənd sakini Zamin Həziyevin sözlərinə görə, Aprel döyüşlərində Lələtəpə azad edildikdən sonra Prezident İlham Əliyevin xüsusi diqqət və qayğısı ilə yenidən qurulan Cocuq Mərcanlı düşmənə göz dağı idi: “Ona görə də, onlar bu kəndi hədəf almışdılar. Raket atsalar da, torpağımızdan çıxmadıq. Əsgərlərimiz onların payını artıqlaması ilə verdilər. Hər bir Cocuq Mərcanlı sakini əsgərlərimizin bu uğurlarına sevinir və ordumuzla bərabərdir”.

Kəndin tarix müəllimi İsmət Həziyev isə Cəbrayıl şəhərinin və kəndlərin azad edilməsinin sakinlərdə yaratdığı ruh yüksəkliyindən danışıb. “Biz öz doğma torpaqlarımızdayıq. Bu gün Cocuq Mərcanlının hər bir sakinində qələbə əzmi, döyüş ovqatı və böyük ruh yüksəkliyi var. Düşmən bizə qarşı bir çox təxribatlar törətsə də, niyyətləri geçəkləşmədi. Ordumuz onların cavabını layiqincə verdi. O gün olsun ki, ən qısa vaxtda Böyük Qələbəmizi qeyd edək, - deyə o bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.