REGİONLAR


Prezidentin imzaladığı Sərəncam çayçılığın potensial imkanlarından daha səmərəli istifadə edilməsinə səbəb olacaq

Zaqatala, 13 sentyabr, Mustafa Dadaşov, AZƏRTAC

Prezident İlham Əliyevin sentyabrın 12-də imzaladığı Sərəncama əsasən həyata keçiriləcək tədbirlər sitrus meyvələri və çəltiklə yanaşı, çay istehsalının da inkişafının sürətləndirilməsinə gətirib çıxaracaq.

Bunu AZƏRTAC-a müsahibəsində Zaqatala Rayon İcra Hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri İlkin Şəfizadə deyib.

O qeyd edib ki, çayçılıq Zaqatala rayonunun kənd təsərrüfatında ənənəvi sahələrdən biri hesab olunur. Zaqatala çayı yüksək keyfiyyəti və ətri ilə həmişə alıcıların diqqətini cəlb edib. Keçən əsrin 70-80-ci illərində Zaqatala və Balakən rayonlarının ərazilərində 110 hektardan çox məhsuldar çay plantasiyaları mövcud olub. Həmin dövrdə Zaqatala çay fabrikində ildə 60-65 ton quru məxməri çay istehsal edilirdi. Ötən əsrin 90-cı illərinin əvvəllərində bu sahə diqqətdən kənarda qalmış, nəticədə çay plantasiyalarının xeyli hissəsi uzun illər istismarda olduğundan yararsız vəziyyətə düşmüş, rayonda çay istehsalı ildən-ilə azalmışdır. Şübhəsiz ki, Prezident İlham Əliyevin 2017-ci il sentyabrın 12-də imzaladığı “Azərbaycan Respublikasında sitrus meyvələri, çay və çəltik istehsalının inkişafı ilə bağlı əlavə tədbirlər haqqında” Sərəncam respublikamızın cənub bölgəsində, eləcə də Zaqatala rayonunda ənənəvi sahələrdən olan çayçılığın inkişafına, bu sahənin potensial imkanlarından daha səmərəli istifadə edilməsinə tezliklə öz müsbət təsirini göstərəcək.

İcra hakimiyyəti rəsmisinin bildirdiyinə görə, hazırda rayon ərazisində 60 hektar çay plantasiyaları var. Bu plantasiyaların yalnız 18 hektarı barverəndir. Rayonda fəaliyyət göstərən “Zaqatala-Çay” MMC-nin çay fabrikində cari ilin yaz mövsümündə 5,6 ton quru çay istehsal olunub.

Dövlətimizin başçısının imzaladığı Sərəncamın gəlirli sahələrdən olan çayçılığın inkişaf etdirilməsi istiqamətində atılan çox mühüm addım olduğunu vurğulayan İlkin Şəfizadə deyib: “Sərəncama əsasən sitrus meyvələri və çəltiklə yanaşı, çay istehsalının da inkişafının sürətləndirilməsi, bu sahənin potensial imkanlarından daha səmərəli istifadə edilməsi və məhsul istehsalına əhalinin marağının artırılması məqsədilə əkinəyararlı torpaqlar müəyyən olunaraq təsərrüfat subyektlərinə ayrılacaq. Həmçinin çay plantasiyalarının genişləndirilməsini stimullaşdırılmaq üçün təsərrüfat subyektlərinə dəstək mexanizmləri təkmilləşdiriləcək. İstehsalçılara zəruri kənd təsərrüfatı texnikası, texnoloji avadanlıqların lizinq yolu ilə icarəyə verilməsi və ya satılması, onlara texniki servis xidməti göstərilməsi, habelə dövlət büdcəsi vəsaiti hesabına alınan pestisidlərin, mineral gübrələrin, tinglərin və toxumların güzəştli şərtlərlə satılması təmin olunacaq. Bir sözlə, ənənəvi sahələrin, o cümlədən çayçılığın inkişafına göstərilən dövlət dəstəyi əhalinin məşğulluğunun təmin edilməsinə, yeni iş yerlərinin açılmasına birbaşa təsir göstərəcək, rayonun iqtisadiyyatı daha da güclənəcək, əhalinin real gəlirləri artacaq”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.