ELM VƏ TƏHSİL
Professor Aytən Mustafazadə: İnsan hüquqlarının qoruması cəmiyyətin inkişafının özülünü təşkil edir
Bakı, 18 iyun, AZƏRTAC
İnsan hüquqlarının qoruması davamlı, dayanıqlı, inkuliziv cəmiyyətin inkişafının özülünü təşkil edir. Hüquqların qorunması, möhkəmləndirilməsi, səmərəli tətbiqi hər zaman dövlətin uzunmüddətli sabitliyinin təminat göstəricisidir. Beynəlxalq qurumlara, təşkilatlara üzv olan, beynəlxalq arenada özünə yer tutmaq istəyən dövlətlər bilir ki, demokratik cəmiyyətə yalnız ədalətin bərqərar olunması, insan hüquqlarına hörmət edilməsi, maraqların, azadlıqların qorunması ilə nail olmaq mümkündür. Elə bu səbəbdəndir ki, inkişaf etmiş və inkişaf etməkdə olan dövlətlər insan hüquqlarının müdafiəsini ali məqsəd hesab edirlər. Bu ali məqsədə çatmaq üçün hüquq sistemində, insan hüquqlarının müdafiəsi istiqamətində islahatlar aparan dövlətlərdən biri də Azərbaycandır.
Bu fikirləri AZƏRTAC-a açıqlamasında AMEA-nın Hüquq və İnsan Haqları İnstitutunun direktoru, hüquq üzrə elmlər doktoru, professor Aytən Mustafazadə deyib.
O bildirib ki, Azərbaycan dövləti öz vətəndaşının, insanının, xalqının konstitusion hüquqlarını həmişə prioritet dəyər, meyar kimi qəbul edib. Bu missiya ulu öndər Heydər Əliyevin adı və əməli fəaliyyəti ilə birbaşa bağlıdır.
Ümummilli Liderin apardığı misilsiz daxili və xarici siyasət hər bir vətəndaşın ən ali insan hüquqlarını təmin etmək, rifahını yaxşılaşdırmaq amalı daşıyıb.
Heydər Əliyev bütün ömrünü xalqına həsr edərək, qarşısına qoyduğu məqsədlərə çatmaq üçün mühüm addımlar atıb. Hüquqi dövlətin, demokratik cəmiyyətin inkişafı üçün insan hüquqları istiqamətində misilsiz islahatların təşəbbüskarı olub. Ölüm cəzasının ləğv edilməsi, ədalət mühakiməsini həyata keçirən yeni məhkəmələrin yaradılması, orqanlar üzərində nəzarət mexanizminin gücləndirilməsi ilə dayanıqlı inkişafın bir növ yol xəritəsini hazırlayıb.
Dövlətimizin qurucusu Heydər Əliyev siyasətinin, uzaqgörənliyinin layiqli davamçısı İlham Əliyev demokratik, hüquqi, dünyəvi idarəçilik yolunu seçib və bu yolda uğurla irəliləyən dövlətin inkişafı, müstəqilliyinin əbədi olması, insan hüquqlarının müdafiəsi üçün öz siyasi iradəsini, prinsipiallığını ortaya qoyub.
Azərbaycan Respublikasında insan hüquq və azadlıqlarının qorunması əsaslarının möhkəmləndirilməsi Prezident İlham Əliyevin daim diqqət mərkəzindədir. İnsan hüquqlarının Azərbaycan Respublikası üçün necə mühüm dəyərə malik olduğunun göstəricisi olaraq İlham Əliyev 2007-ci il 18 iyun tarixli Sərəncamı ilə hər il iyun ayının 18-nin ölkəmizdə İnsan hüquqları günü kimi qeyd edilməsini müəyyən edib. Həmin tarixdən keçən bu illər ərzində insan hüquqları sahəsində xarici dövlətlərin belə həsəd aparacağı səviyyədə irəliləyişlərə nail olunub, müxtəlif qanunvericilik aktları qəbul edilib, ziddiyyət təşkil edən hallar, kolliziyalar aradan qaldırılıb.
Hazırda bütün dünyada yayılan, hətta bir çox dövlətlərin baş çıxarmaqda, mübarizə etməkdə acizlik çəkdiyi, COVID-19 insan hüquqlarına təsirsiz ötüşmür.
Dünya dövlətləri pandemiyanın qarşısının alınması, tələfatların azaldılması üçün bütün səylərini ortaya qoyublar. Bu məqsədlə bir sıra dövlətlərdə fövqəladə hal elan edilib, bəzi dövlətlərdə isə xüsusi karantin rejimi tətbiq olunub və bununla da xeyli insan hüquqları məhdudlaşdırılıb.
Lakin həyatın, ömrün şirin olduğunu dərk edən insanlar bu qadağaların, məhdudiyyətlərin məhz onların xeyrinə olduğunu başa düşərək görülən tədbirlərə qarşı çıxmayaraq təhlükəsizliklərinin təminində maraqlı olduqlarını göstərirlər. Pandemiyaya qarşı mübarizədə dövlətlə birgə prinsipial mövqe sərgiləyərək, mübarizə apararaq dövlətin onun qoruyacağına inanırlar.
Tam əminliklə deyə bilərik ki, Azərbaycan Respublikasında insan hüquqlarının qorunması, onun aliliyinin təmin edilməsi hər zaman, sabitlikdə də, müharibə, fəlakət, epidemiya vaxtı da diqqət mərkəzində dayanıb. COVID-19 pandemiyası dövründə biz bunun əyani şahidi oluruq.
Ölkəmizdə pandemiyaya qarşı mübarizə üçün xüsusi tədbirlər görülüb. Zərurətdən yaranan məhdudiyyətlər, qadağalar tətbiq edilib. Lakin onu da xüsusilə qeyd etmək lazımdır ki, bu məhdudiyyətlərə ədalətlilik, humanistlik prizmasından yanaşılıb.
İnsan hüquqlarının kobud şəkildə pozulmaması üçün, görülən tədbirlərin qanuni səviyyədə təmini məqsədilə bir sıra qanunvericilik aktlarına əlavə və dəyişikliklər edilib, yeni və vacib layihələr müzakirəyə çıxarılıb.
Hazırda ölkəmizdə insan hüquqları istiqamətində görülən işlər, atılan uğurlu addımlar, hətta pandemiyanın hökm sürdüyü bu günlərdə də insan hüquqlarının aliliyinin təmini, pozulmasının qarşısının alınması məqsədilə aparılan islahatlar Prezident İlham Əliyevin siyasi iradəsini əks etdirməklə həm Azərbaycan xalqı, həm xarici dövlətlər, həm də beynəlxalq təşkilatlar tərəfindən yüksək qiymətləndirilir.
Azərbaycan xalqı Prezident İlham Əliyevin vətəndaşlar üçün, insanlıq üçün gördüyü və görməkdə olduğu işləri, əldə olunan naliyyətləri nəzərə alaraq Azərbaycanda hər zaman insan hüquqlarının aliliyinin qorunacağına inanır.