Bakı, 27 mart, AZƏRTAC

Azərbaycana rəhbərliyinin birinci dövründə ölkəmizin keçmiş SSRİ-də geridə qalan bir respublikadan inkişaf edən, qabaqcıl respublikaya çevrilməsində Heydər Əliyevin siyasi, əmək, təşkilatçılıq fəaliyyəti mühüm rol oynadı. Hazırda Ümummilli Lider Heydər Əliyev elə bir siyasi dövlətçilik məktəbi qoyub ki, o məktəb əbədi yaşayacaq. Eyni zamanda, Ulu Öndərin həyat məktəbində azərbaycançılığa lazım olan bütün universal meyarlar cəmləşmişdi. Bu baxımdan da hər kəs məhz bu məktəbi daha da dərindən öyrənməli və təbliğ etməlidir.

Ümummilli Lider Heydər Əliyevlə bağlı xatirələrim çoxdur. Hələ 1979-cu ilin martında Gəncəyə polis rəisi kimi təyin olunanda Ulu Öndər mənə bəzi tövsiyələrini verdi. Mən Moskvada SSRİ Daxili İşlər Nazirliyinin İdarəetmə Akademiyasında aspiranturada oxuduğum zaman onun xəstəxanada müalicə olunması barədə öyrəndim. Ona xəstəxanada baş çəkməyi özümə mənəvi borc bildim. Ulu Öndərlə görüşəndə Azərbaycanın keçmiş təhsil naziri Lidiya Rəsulova da orada idi. Heydər Əliyev Lidiya xanımı mənə göstərərək dedi: “Vaxtilə yüksək vəzifə verdiyim insanlar gəlib məni axtarmırlar, əleyhimə cinayətkar dəstə yaradırlar. Amma bu qadın xəstə olmasına rəğmən mənə baş çəkir”.

Bu barədə AZƏRTAC-a müsahibəsində hüquq elmləri doktoru, professor, Müharibə, Əmək və Silahlı Qüvvələr Veteranları Təşkilatının sədrinin müşaviri, Azərbaycan Ağsaqqallar Şurasının İdarə Heyətinin üzvü İbrahim Quliyev Ümummilli Lider Heydər Əliyevlə bağlı xatirələrini bölüşərkən deyib.

Qeyd edib ki, Azərbaycanda bəzi nankor qüvvələr Heydər Əliyevin zəhmətini yerə vuraraq populist çıxışları ilə onun nüfuzuna xələl gətirməyə çalışırdılar: “Eyni zamanda, 1990-cı ildə xəstəxanadan yeni çıxmış Ulu Öndər 20 Yanvar hadisələri zamanı Azərbaycanın Moskvadakı daimi nümayəndəliyində soydaşlarımızla görüşüb və mətbuat konfransı keçirib. Mən ictimai asayişi qorumaq məqsədilə nümayəndəlikdə idim. Mətbuat konfransı başlandıqdan sonra Ulu Öndər Heydər Əliyev sovet qoşunlarının Bakıya yeridilməsini və SSRİ-nin ovaxtkı rəhbəri Mixail Qorbaçovun siyasi səhvini, xalqımıza qarşı soyqırımının törədilməsini açıq-aşkar bəyan etdi. Lakin onun çıxışı zamanı iki xanım Ulu Öndərin sözünü kəsməyə cəhd göstərdi. Mən qadınları zaldan kənarlaşdırdım. Belə çətin günlərdə xalqımızın haqq səsini dünyaya çatdırmağa gəlmiş dahi şəxsiyyətə mane olmaq üçün SSRİ-nin xüsusi xidmət orqanlarının millətimizdən olan insanları öyrədərək nümayəndəliyə göndərməsi Ümummilli Liderə qarşı böyük təxribat idi. Amma Ulu Öndər çıxışını sonadək davam etdirdi və bu həmin dövrdə xalqımıza bir təsəlli oldu”.

Professor bildirib ki, onun Ulu Öndərlə ən çox təmasları cənub bölgəsində baş vermiş hadisələr zamanı olub: "O vaxtlar mən Astarada hərbi komendant təyin olunmuşdum. 1993-cü ildə separatçı Əlikram Hümbətov tərəfindən qeyri-qanuni yaradılmış və böyük diviziyanı ələ keçirmiş silahlı dəstələr “Talış-Muğan Respublikası” ideyası ilə ölkəmizi parçalamağa çalışırdılar. Bu, dözülməz hal idi, çünki cənub bölgəsinin insanları hər zaman dövlətçiliyə sadiq olub. Mən isə Lənkəran şəhərindəki mərkəzi meydanda həmin qeyri-qanuni silahlı dəstələr tərəfindən girov götürüldüm. Girov götürülməyim barədə Ulu Öndər Heydər Əliyevə məlumat verildi və o, dərhal cənub bölgəsinin ziyalıları ilə görüş keçirdi. Azad olunduğumdan bir neçə gün sonra Ümummilli Lider məni qəbul etdi. Mən ona cənubdakı vəziyyətlə bağlı məruzə etdim. Ümumiyyətlə, o vaxt Lənkəranda insanlar kütləvi şəkildə həmin silahlı dəstələrə qarşı qətiyyətli mübarizə aparırdılar. Lənkərandakı hadisələr zamanı üç nəfər dünyasını dəyişdi. Ulu Öndərimizin müvafiq Sərəncamı ilə onların hər üçünə də Milli Qəhrəman adı verildi. Ulu Öndər həmin vaxtlar mənə zəng edərək bildirdi ki, mərhum Dilruba Camalovanın Lənkəran Şəhər İcra Hakimiyyətinin, mənim isə Astara Rayon İcra Hakimiyyətinin başçısı vəzifəsinə təyin edilməm barədə Fərman imzalayıb. Ümummilli Lider tapşırdı ki, biz bütün imkanlarımızdan və nüfuzumuzdan istifadə edərək bölgədə qan tökülməsinin qarşısının alınması və əmin-amanlıq yaradılması üçün ictimai-siyasi sabitliyi təmin edək. Hesab edirəm ki, Heydər Əliyev o zaman hakimiyyətə gəlməsəydi, Azərbaycan parçalanacaqdı. Çünki belə oxşar proseslər şimal bölgəsində də gedirdi. Məhz dahi şəxsiyyətin müdrikliyi nəticəsində xalqımız bu bəlalardan xilas oldu”.

Ağsaqqallar Şurasının İdarə Heyətinin üzvü İbrahim Quliyev Ulu Öndərin ölkə həyatının bütün sahələrində davamlı inkişafa diqqət göstərdiyini vurğulayaraq deyib: "Astarada işlədiyim müddətdə Ümummilli Lider iki dəfə cənub bölgəsinə səfər etdi. Mənim həmişə onunla səmimi söhbətlərim olub. Dahi şəxsiyyət məsələlərə öz münasibətini bildirməklə yanaşı, konkret lazımi köməyi də göstərib. Hesab edirəm ki, "Heydər Əliyev İli"ndə Ulu Öndərin ideyalarını bütün respublikada, xüsusilə bölgələrdə təbliğ etməliyik. Məni bu gün narahat edən məsələlərdən biri də gənclərimizin ideya tərbiyəsi, ictimai təfəkkürüdür. Bu baxımdan, məhz ictimai təşkilatları təmsil edən insanlar öndə olmalı və öz vətəndaşlıq missiyasını yerinə yetirməli, ziyalılar gənc nəslə tövsiyələrini verməlidir. İllər ötsə də, Ulu Öndərimizin xatirəsi insanların qəlbində daim yaşayacaq. Çünki Heydər Əliyev yalnız Azərbaycanda deyil, eyni zamanda, dünyada tanınmış müdrik şəxsiyyətdir”.

Respublika Veteranlar Təşkilatının sədrinin müşavirinin sözlərinə görə, bir çox tanınmış siyasətçilər də dəfələrlə vurğulayıblar ki, Ulu Öndər yüksək təşkilatçılıq bacarığına malik olub. Ümummilli Liderin layiqli davamçısı Prezident İlham Əliyev onun siyasi məktəbinin məzunu kimi müstəqil Azərbaycan dövlətinin gücünü 44 günlük Vətən müharibəsində nümayiş etdirdi. Müzəffər Ordumuz 44 günlük müharibədə bütün dünyaya sübut etdi ki, məğlubedilməzdir, xalqımız isə yenilməzdir və biz bununla fəxr edirik. Hazırda hər birimizin üzərinə düşən əsas vəzifə Ulu Öndərin həm siyasi, həm də yüksək humanistlik məktəbini daha da təbliğ edərək yaşatmaq və xalqımızın qüdrətini gücləndirməkdir.