CƏMİYYƏT


Prokurorluğun gənc əməkdaşları Hərbi Qənimətlər Parkını ziyarət ediblər

Bakı, 24 iyun, AZƏRTAC

26 İyun - Silahlı Qüvvələr Günü münasibətilə Azərbaycan Respublikası Baş Prokurorluğunda nəzərdə tutulmuş tədbirlər çərçivəsində prokurorluğun gənc əməkdaşları Hərbi Qənimətlər Parkını ziyarət ediblər.

Bu barədə AZƏRTAC-a Baş Prokurorluğun mətbuat xidmətindən məlumat verilib.

Qeyd edək ki, 44 günlük Vətən müharibəsi minilliklərlə tarixi olan Azərbaycan xalqının hərb salnaməsinə yazılmış ən şanlı qələbədir. Xalqımızın ümummilli lideri Heydər Əliyevin digər sahələrlə yanaşı, ordu quruculuğu sahəsində də yürütdüyü siyasət Müzəffər Ali Baş Komandan İlham Əliyev tərəfindən müvəffəqiyyətlə davam etdirilməsi 30 ilə yaxın azadlıq həsrəti ilə yanan torpaqlarımızın erməni işğalından azad olunması ilə nəticələndi. Müasir Azərbaycan tarixinə qızıl hərflərlə həkk olunan Qələbə bütün dünyaya Azərbaycan xalqının və Silahlı Qüvvələrimizin iradəsini, əzmini və gücünü nümayiş etdirdi. Şanlı Qələbəmizin təzahürü olan Hərbi Qənimətlər Parkı Azərbaycan Respublikasının ərazi bütövlüyünün bərpası uğrunda 2020-ci il sentyabrın 27-dən noyabrın 10-dək 44 gün davam edən Vətən müharibəsi zamanı müzəffər Azərbaycan Ordusunun işğalçı Ermənistanı döyüş meydanında məğlub etməsi nəticəsində düşməndən ələ keçirdiyi hərbi qənimətlərin bir qisminin və Ermənistan ordusu tərəfindən qurulmuş müdafiə sədlərinin, o cümlədən Ermənistan silahlı qüvvələrinin terror niyyətinin və vəhşiliklərinin bütün dünyaya nümayiş olunması məqsədilə yaradılmış açıq hava muzeyidir.

İyunun 24-də gəzinti zamanı prokurorluğun gənc əməkdaşlarına şanlı Azərbaycan Ordusunun əsgərlərinin qəhrəmanlığı, o cümlədən ordumuz tərəfindən məhv edilmiş və hərbi qənimət kimi ələ keçirilmiş Ermənistan silahlı qüvvələrinə məxsus müxtəlif tipli hərbi texnikalar, silahlar, döyüş postları və müdafiə sədləri barədə ətraflı məlumat verilib. Həmçinin gənc prokurorluq işçiləri düşmənin hərbi texnikalarına məxsus nömrələrdən, eyni zamanda, düşmən qüvvələrinin Gəncə, Tərtər, Bərdə və digər şəhərlərə və sivil əhaliyə hücumunun ağır nəticələrini özündə əks etdirən fotoşəkillərdən ibarət lövhələrlə tanış olublar.

Sonda Baş Prokurorluğun kollektivi xatirə fotoşəkli çəkdirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.