İQTİSADİYYAT


Pul nişanlarının saxtalaşdırılmasına qarşı mübarizəyə dair seminarlar təşkil olunub

Bakı, 12 aprel, AZƏRTAC

Ölkədə fəaliyyət göstərən kredit təşkilatları tərəfindən fiziki və hüquqi şəxslərə nağd pulla bağlı göstərilən xidmət səviyyəsinin yüksəldilməsi və bu sahədə çalışan kredit təşkilatlarının əməkdaşlarının potensialının gücləndirilməsi məqsədilə Azərbaycan Mərkəzi Bankı (AMB) 2019-cu il üzrə "Təlim Proqramı" təsdiq edib.

Bankdan AZƏRTAC-a bildirilib ki, "Təlim Proqramı" çərçivəsində birinci rüb ərzində AMB tərəfindən kredit təşkilatlarının paytaxtda və regionlarda, o cümlədən Gəncə və Naxçıvan şəhərlərində çalışan əməkdaşlarına 15 təlim keçirilib və bu təlimlərdə kredit təşkilatlarının 200-dək nümayəndəsi iştirak edib.

Təlimlər zamanı Mərkəzi Bankın əməkdaşları tərəfindən pul nişanlarının saxtalaşdırılmasına qarşı mübarizə, milli pul nişanlarının dizayn və mühafizə elementləri, bank sistemində pulların ekspertizasının aparılması mövzularında seminarlar təşkil edilib və mövzularla bağlı geniş müzakirələr aparılıb.

Həmçinin təlimlər kredit təşkilatlarının nağd pulla əməliyyat aparan əməkdaşlarının milli pul nişanlarının mühafizə elementləri üzrə bilik səviyyəsinin artırılmasına və əhalinin nağd pulla bağlı müraciətləri zamanı pulların ilkin ekspertizasının aparılmasına effektiv təsirini göstərib.

Belə təlimlər pulların saxtalaşdırılmasının qarşısının alınmasında təsirli rol oynayır. Təsadüfi deyil ki, Mərkəzi Bank ilə kredit təşkilatları və hüquq mühafizə orqanları arasında birgə əməkdaşlıqla həyata keçirilən müvafiq tədbirlər nəticəsində beynəlxalq təcrübə ilə müqayisədə pullarımızın saxtalaşdırılması səviyyəsi əhəmiyyətli dərəcədə aşağıdır.

"Təlim Proqramı"na uyğun olaraq növbəti rüblərdə də Mərkəzi Bank həm paytaxtda, həm də regionlarda müvafiq təlimlər keçirəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.