SİYASƏT
QAFQAZ MÜSƏLMANLARI İDARƏSİNİN QAZILAR ŞURASI VƏ ELMİ-DİNİ ŞURASININ AZƏRBAYCAN DİNDARLARINA MÜRACİƏTİ
Bismillahir-rəhmanir-rəhim!
Biz Qafqaz Müsəlmanları İdarəsinin Qazılar Şurası və Elmi-Dini Şurasının üzvləri, bu müraciətimizi Azərbaycanın bütün din xadimlərinə, ölkəmizdə təmsil olunmuş dinlərin nümayəndələrinə ünvanlayır və bildiririk ki, Allah təbarəkə və təala insanı faili-muxtar, ixtiyar və seçim sahibi yaratmış və onu məhz bu seçkisi üçün məsuliyyətli etmişdir.
Azərbaycan Respublikasının Prezidenti möhtərəm Heydər Əliyev həzrətlərinin Referendum haqqında fərmanı bütün azərbaycanlılar kimi ölkəmizin dindarlarını da məsuliyyətli seçim qarşısında qoymuşdur. Azərbaycanın gələçək inkişafı, dünya dövlətləri sırasında məqamı, xalqımızın rifahı Referendumun nəticələrindən çox asılı olacaqdır. Belə hesab edirik ki, Referenduma çıxarılan məsələlər son dərəcə aktual və mühüm məsələlərdir və bu məsələlərlə bağlı Konstitusiyaya dəyişikliklər edilməsi vətəndaşların hüquq və azadlıqlarının, o cümlədən etiqad azadlığının da genişlənməsinə, Azərbaycanda hüquqi-demokratik dövlət quruculuğunun sürətlənməsinə xidmət edəcəkdir.
Xüsusilə qeyd olunmalıdır ki, 24 avqust 2002-ci il Referendumu Azərbaycanın Avropa Şurası qarşısında götürdüyü öhdəliklər və ölkənin İnsan Hüquqları və Əsas Azadlıqların Müdafiəsi haqqında Avropa konvensiyasına qoşulmasından irəli gələn tələblərlə bağlıdır və Azərbaycan Respublikasının Konstitusiyasına, həmçinin Referendum haqqında Qanuna müvafiq olaraq keçirilir.
Dindarların nəzərinə belə bir önəmli cəhəti çatdırmaq istərdik ki, Referendumda Konstitusiyaya dəyişikliklərlə bağlı məsələləri möhtərəm Prezidentimiz Heydər Əliyev müəyyən etmiş və irəli sürmüşdür. Qəti əminik ki, bu cəhət, inşaallah, Referendumun nəticələrinə müsbət təsir göstərəcəkdir. Çünki 1993-cü ildə də, 1998-ci ildə də Prezidenti dəstəkləyən, onun seçilməsində fəal iştirak edən – respublika əhalisi ilə bərabər, onun ayrılmaz hissəsi olan biz dindarlar olmuşuq və inanmışıq ki, Allah onu bizdən ötrü bəyənib seçmiş, bilik və siyasətcə ona üstünlük vermişdir, çünki Allah Öz mülkünü istədiyinə verər. Bu məsələdə dindarların mövqeyi Qurani-Kərimin belə bir hökmünə əsaslanır: “Ey iman gətirənlər! Allaha, Peyğəmbərə və özünüzdən olan ixtiyar sahiblərinə itaət edin!..” (ən-Nisa, 59).
Həyat özü göstərir ki, Prezidentin təklifi əsasında taleyüklü məsələlərin həlli ilə bağlı dövlət sənədlərində edilən dəyişikliklər sayəsində ölkədə hərc-mərcliyin və özbaşınalığın qarşısı alınmış, sabitlik bərqərar olunmuş, beynəlxalq aləmdə respublikamızın imiçi yüksəlmiş, iqtisadiyyatımızda nailiyyətlər əldə edilmiş və xarici siyasətimizdə uğurlar qazanılmışdır. Dini etiqad azadlığı haqqında Qanuna Prezidentin təşəbbüsü və təklifi ilə edilən əlavə və dəyişikliklər bunun ən gözəl nümunələrindən biridir.
Bir sözlə, ömrünü, bütün varlığını xalqa xidmətə, doğma Azərbaycanımızın çiçəklənməsinə həsr edən, zəmanəmizin ən müdrik və dünya miqyaslı siyasətçiləri sırasında özünəməxsus yer tutan cənab Heydər Əliyevin bu təklifləri də, şübhəsiz ki, ümumxalq mənafeyinə yönəldiyi üçün təsirli və faydalı olacaqdır.
Müraciətimiz dindarlara yönəlmiş olduğundan belə bir cəhəti diqqətə çatdırmaq istəyirik ki, Referendumun keçirilməsi bütün səmavi dinlərin, o cümlədən müqəddəs dinimiz olan İslamın da demokratik ənənələrinə tam cavab verir, xüsusilə İslamın Şura prinsipi ilə həmahəng səslənir. Bu prinsip Allah-təbarəkə və təalanın Öz Kitabında Peyğəmbəri Mühəmmədə - səlləlahu əleyhi və alihi və səlləm – belə bir əmri ilə bağlıdır ki, bütün işlərdə xalq ilə məsləhətləşsin, məşvərət etsin, insanların fikrini öyrənsin, sonra isə Allaha təvəkkül edərək iş görsün (Ali-İmran, 159). Qurani-Kərimdə Allaha iman gətirib namaz qılanlar “işlərini öz aralarında məsləhət-məşvərətlə görənlər” kimi səciyyələndirilirlər (əş-Şura, 38). Müasir şəraitdə Referendum belə bir ümumxalq məsləhətləşməsinin əyani təzahürü ola bilər.
Referendumun keçirilməsi İslamın “yaxşılıq əmr etmək və pislikdən çəkindirmək” prinsipinə də müvafiqdir. Bu prinsipə əsasən yaxşını pisdən ayırmaq, ətrafdakı hadisələrə münasibətini bildirmək müsəlmanın borcudur.
Qafqaz Müsəlmanları İdarəsinin Qazılar Şurası və Elmi-Dini Şurası ürəklərində Allah, Peyğəmbər və Vətən sevgisi olan bütün yurddaşlarımızı Azərbaycanda demokratik dövlətçilik ənənələrinin möhkəmlənməsi, haqqın-ədalətin təntənəsi, gələcək nəsillərimizin asudəliyi və səadəti naminə Referendumda hamılıqla və fəal iştirak etməyə çağırır və əmin olduqlarını bildirirlər ki, Referendum, inşaallah, ölkədə sabitliyin qorunub saxlanması, Azərbaycanın qabaqcıl inkişaf etmiş demokratik dövlətlər sırasında özünə layiq yer tutması yolunda daha bir uğurlu addım olacaqdır.
Vəs-səlamu əleykum və rəhmətullahi və bərəkatuhu!
Bakı, 1 avqust 2002-ci il