MƏDƏNİYYƏT


QAQAUZ ŞAİRİNİN “ANA DİLİM” KİTABI AZƏRBAYCAN DİLİNDƏ NƏŞR OLUNMUŞDUR

Bakı, 13 mart (AZƏRTAC). TÜRKSOY-un “Türk ləhcələri arasında uyğunlaşdırma çalışmalarının bugünkü durumu və qarşılaşılan problemlər” mövzusunda İstanbulda keçirilmiş simpoziumunun tövsiyələrinə uyğun olaraq, tanınmış qaqauz şairi, dramaturqu, publisisti, ictimai xadimi Todur Zanetin “Ana dilim” kitabı Azərbaycan dilində nəşr etdirilmişdir.

Todur Zanet 1999-cu ildən qaqauz qəzeti “Ana sözü”nün və “Kırlanğaç” (Qaranquş) jurnalının baş redaktorudur. Onun yazdığı Qaqauz Milli Himni Qaqauz Konqresi tərəfindən respublikanın himni kimi qəbul olunmuşdur.

Kitabı Azərbaycan dilinə uyğunlaşdıran və tərtib edən filologiya elmləri doktoru Ramiz Əsgər yeni nəşrə yazdığı ön sözdə Todur Zanetin həyat və yaradıcılığından geniş söhbət açmışdır. Qeyd edilmişdir ki, T.Zanetin bədii yaradıcılığı, xüsusilə poeziyası zəngin və çoxşaxəlidir. Kitaba daxil edilmiş şeirləri iki əsas qrupa bölmək olar: sosial-siyasi şeirlər və məhəbbət lirikası. İlk qrupa daxil olan əsərlərində şair doğma xalqının şərəfli və keşməkeşli tarixini, onun yaşadığı faciə və fəlakətləri, xoşbəxt həyat və azadlıq uğrunda mübarizəsini, verdiyi qurbanları vətəndaş qeyrəti və yanğısı ilə təsvir etmiş, qaqauzların gələcəyi, dili, mədəniyyəti ilə bağlı düşüncə və arzularını qələmə almışdır. Bu baxımdan onun “Qaqauzluq yox olmaz”, “Kiminmiş bu torpaq”, “Yaşa xalqım”, “Ana dilim”, “Mən bilirəm” və sair şeirləri daha xarakterikdir.

T.Zanetin poeziyasına xas olan bir cəhət də ondan ibarətdir ki, o, qafiyədən az istifadə edir, cinas işlətmir. Bu, bir tərəfdən çağdaş qaqauz poeziyasının inkişaf meyilləri ilə əlaqədardırsa, digər tərəfdən onun Avropa və türk şeiri ilə bağlılığının məhsuludur.

Qeyd edək ki, bu, T.Zanetin Azərbaycanda çap olunan ilk kitabıdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.