SİYASƏT


QHT sədri: Prezident İlham Əliyev Qarabağı cənnətə çevirməklə dağıdıcı ermənilərlə qurucu azərbaycanlıların fərqini dünyaya bir daha göstərəcək

Bakı, 28 aprel, AZƏRTAC

Azərbaycan Prezidenti İlham Əliyev və birinci xanım Mehriban Əliyevanın Cəbrayıl və Zəngilan rayonlarına son səfərini kifayət qədər məhsuldar adlandırmaq olar. Bu səfər zamanı bir sıra yeni obyektlərin açılışlarının şahidi olduq. Dövlətimizin başçısı hər zaman verdiyi vədləri öz real addımları və fəaliyyəti ilə sübut edib, bu dəfə də belə oldu.

Bunu AZƏRTAC-a açıqlamasında Azərbaycan-Amerika Gəncləri İctimai Birliyinin sədri Vüqar Əhmədov deyib.

Torpaqlar işğaldan azad olunan gündən bəri Prezident İlham Əliyevin bu ərazilərə həyatın yenidən qayıdacağını və bütün sosial-iqtisadi infrastrukturun bərpa ediləcəyini vurğuladığını deyən QHT sədri bildirib: “Bu gün biz bunun canlı şahidiyik. İşğaldan azad edilən əksər bölgələrdə geniş quruculuq və abadlıq işləri həyata keçirilir, böyük sayda işçi qüvvəsi bu prosesə cəlb olunub. Prezident İlham Əliyevin işğaldan azad olunan ərazilərə ardıcıl səfərləri, infrastruktur obyektlərinə baş çəkməsi və işlərin gedişi ilə şəxsən yaxından maraqlanması dövlətin bu prosesə diqqətinin bariz nümunəsidir”.

Onun sözlərinə görə, bölgədə aparılan işlərin digər özəlliyi orada yeni innovativ əsasda yaşayış məntəqələri və istehsal sahələrinin, sosial xidmətlər, ağıllı kənd təsərrüfatı və alternativ enerji sisteminin qurulmasıdır. Bu işlər Azərbaycana dost ölkələrin şirkətləri ilə birgə əməkdaşlıq şəraitində həyata keçirilir. Prezident İlham Əliyev Qarabağ bölgəsini cənnət məkana çevirməklə dünyaya dağıdıcı ermənilərlə qurucu azərbaycanlıların fərqini bir daha nümayiş etdirəcək. Sözsüz ki, işğaldan azad olunan rayonlarda bu cür müasir infrastrukturun qurulması bölgəni həm xarici sərmayələr, həm də turizm üçün cəlbedici məkana çevirir. Bunun üçün bütün zəruri infrastruktur, dəmir yolu və hava limanlarının da inşası aparılır. Səfər çərçivəsində Zəngilanda yeni hava limanının əsasının qoyulması buna bariz nümunədir.

V.Əhmədov vurğulayıb ki, hələ də reallıqla barışmaq istəməyən ermənilərin həzm edə bilmədiyi məhz Azərbaycanın onların viran qoyduğu bir məkanda bu cür quruculuq işlərini həyata keçirməsidir. “Qeyd etmək lazımdır ki, bu işlərin həyata keçirilməsində Prezident İlham Əliyevin diqqət yetirdiyi əsas məqamlardan biri də bu qədər müasirliyə rəğmən, şəhərlərin tarixi görkəminin qorunub saxlanmasıdır. Cəbrayıl rayonunun girişində “Xoş gəlmişsiniz” lövhəsinin əvvəlki görkəmdə bərpasını buna misal olaraq göstərmək olar. Bu onu göstərir ki, dövlətimizin başçısı tarixi irsin qorunub saxlanmasına daim diqqət yetirir. Onun işğaldan azad olunmuş bölgələrə hər səfərində, eləcə də Cəbrayıl və Zəngilan rayonlarına son səfəri zamanı tarixi-dini abidələrə baş çəkərək onların bərpası işləri ilə maraqlanması, əvvəlki görkəmini qaytarmaq üçün göstərişlər verməsi buna əyani sübutdur”, - deyə o bildirib.

QHT sədri diqqətə çatdırıb ki, vacib məqamlardan biri də dövlətimizin başçısı və Heydər Əliyev Fondunun Prezidenti Mehriban Əliyevanın Zəngilan məscidinin bərpası ilə maraqlanmasıdır. Bu, öz növbəsində Azərbaycanın milli-mənəvi dəyərlərinin qorunması istiqamətində atılan ən önəmli addımlardandır. Bu səfər zamanı göstərilən reallıqlar tarixi-dini abidələrə qarşı erməni vəhşiliyinin nəticəsini bir daha nümayiş etdirir. Sirr deyil ki, Qarabağ həm də gözəl və əsrarəngiz təbiətə malikdir. Mənfur düşmən hər nə qədər bu bölgədə flora və faunanı məhv etməyə çalışsa da, bu bölgənin təbiəti gözəlliyini qoruyub saxlaya bilib.

Zəngilan rayonunun geostrateji əhəmiyyətindən, bərpa olunacaq dəmir yolu xəttindən danışan Vüqar Əhmədov vurğulayıb ki, dövlətimizin başçısı bizim qəhrəman döyüşçülərimizin bu bölgə uğrunda şiddətli döyüşlər aparmasını xatırlatdı. Sözsüz ki, ölkəmizin ərazi bütövlüyünün bərpası məsələsində sərhədlərin etibarlı qorunması dövlətin qarşısında duran əsas vəzifələrdəndir. Prezident İlham Əliyevin səfərini bu baxımdan da kifayət qədər əhəmiyyətli hesab etmək olar. Cəbrayıl rayonu ərazisində Dövlət Sərhəd Xidmətinin yeni hərbi hissəsinin açılışı və müasir texnika ilə təchiz olunması, Azərbaycan-İran sərhədinin 132 kilometrlik sərhədinin tam bərpa edilməsi, sərhəd boyunca bütün lazımi istehkam, mühafizə işlərinin görülməsi və hərbi hissənin fəaliyyətə başlaması Qarabağ bölgəsinin etibarlı mühafizəsini göstərən amillərdəndir.

QHT sədrinin sözlərinə görə, işğaldan azad olunmuş bütün bölgələrimizdə intensiv abadlıq və quruculuq işlərinin uğurlu gedişatı onu göstərir ki, Qarabağ Azərbaycanın ən inkişaf etmiş və qabaqcıl regionlarından birinə çevriləcək. Ermənistanda baş qaldıran revanşist qüvvələrin sərhəddə törətdikləri təxribatlar isə bu inkişafdan doğan qısqanclıqdır.

“Prezident İlham Əliyev onlara bir daha xəbərdarlıq etdi ki, buna oxşar cəhdlər bir daha göstərilərsə, düşmən yerindəcə məhv ediləcək. Ermənistan nə qədər tez sağlam mövqe nümayiş etdirərək, bölgədə yaranan yeni əməkdaşlıq ruhuna uyğunlaşarsa, regionun erməni əsilli Azərbaycan vətəndaşları Qarabağda qurulan yeni imkanlardan bəhrələnə biləcəklər. Əminik ki, onlar öz dağıdıcı ruhlu, işğal siyasəti yürüdən rəhbərlərindən fərqli olaraq, Azərbaycan dövlətinin və onun rəhbərinin əsas amalının qurub yaratmaq və inkişaf etdirmək olmasının fərqindədirlər”, - deyə Vüqar Əhmədov fikirlərini yekunlaşdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.