SİYASƏT
QİƏT ÜZVÜ OLAN ÖLKƏLƏRİN XARİCİ İŞLƏR NAZİRLƏRİ ŞURASININ 9-CU İCLASI ÖZ İŞİNƏ BAŞLAMIŞDIR
Şuranın sədri, Azərbaycanın xarici işlər naziri Vilayət Quliyev iclası açaraq qonaqları salamlamış və onlara uğurlar arzulamışdır. Bu iclasın ölkəmizdə əlamətdar bir günə təsadüf etdiyini vurğulayan nazir, oktyabrın 15-də keçirilən seçkilərdə böyük üstünlüklə qələbə qazanmış Azərbaycan Prezidenti İlham Əliyevin məhz bu gün təntənəli andiçmə mərasimi olduğunu diqqətə çatdırmış, bütün iştirakçıları mərasimə dəvət etmişdir.
Sonra Vilayət Quliyev Azərbaycanın quruma sədrliyi dövründə görülən işlərlə bağlı hesabat vermişdir. Natiq demişdir ki, ötən altı ay ərzində Azərbaycan QİƏT ölkələri arasında, xüsusən də regionda nəqliyyat və energetika sahələrində əməkdaşlığın inkişaf etdirilməsinə çalışmışdır. Neft və qaz kəmərlərinin çəkilməsi, Qara dəniz və Xəzəryanı ölkələrdə nəqliyyat şəbəkəsinin gücləndirilməsi məqsədi ilə xüsusi sənədlər imzalanmış, bir sıra vacib addımlar atılmışdır. Turizm sahəsinin inkişafı üçün də layihələr hazırlanmışdır. Azərbaycan hesab edir ki, turizm təkcə biznesin deyil, bütün sahələrdə əlaqələrin inkişafı üçün vacibdir. QİƏT-in inkişafı üçün daha səmərəli addımlar atılmalıdır. Təşkilatla Avropa Birliyi, Dünya Bankı, eləcə də digər siyasi və maliyyə qurumları arasında əməkdaşlıq gücləndirilməlidir. Bir sıra layihələrin həyata keçirilməsi üçün güclü maliyyə yardımlarına ehtiyac vardır. Bundan başqa, QİƏT-in rəhbərliyinin, xüsusən də Baş katibinin statusu gücləndirilməli, ona əlavə səlahiyyətlər verilməlidir.
Vilayət Quliyev bir sıra problemlərin regional əməkdaşlığa əngəl yaratdığını da qeyd etmişdir.
Sonra QİƏT-in Baş katibi Valeri Çeçelaşvili çıxış etmişdir. Təşkilata rəhbərliyi dövründə Azərbaycanın rolunu yüksək qiymətləndirən baş katib demişdir ki, bir sıra regional layihələrin həyata keçirilməsində, inkişafın davamlılığının təmin olunmasında Şuranın indiki rəhbərinin xüsusi əməyi olmuşdur. O, Azərbaycanın quruma daha altı ay sədrlik edəcəyini bildirmişdir.
Türkiyə Respublikası Baş nazirinin müavini, dövlət naziri Əbdüllətif Şənər də öz çıxışında bir sıra layihələrin həyata keçirilməsində və təşkilatın çiçəklənməsində Azərbaycanın rolunu xüsusi qeyd etmişdir.
Sonra regionda enerji, nəqliyyat sahələrinin, cinayətkarlığa qarşı mübarizənin gücləndirilməsi, viza sənədləşmələrinin sadələşdirilməsi, fövqəladə vəziyyətlərdə kömək göstərilməsi, regional və beynəlxalq əməkdaşlığın perspektivləri barədə çıxışlar olmuş, təkliflər səslənmişdir.
Müzakirələr zamanı Qara dəniz regionundakı münaqişələrin region ölkələrinin inkişafına vurduğu ziyan, eləcə də problemin həlli yollarına da toxunulmuşdur.
Ermənistan xarici işlər nazirinin müavini Roben Şuqanyan çıxışında bildirib ki, regional münaqişələr, o cümlədən Dağlıq Qarabağ problemi danışıqlar yolu ilə həll olunmalıdır. Azərbaycanda və Ermənistanda gedən seçkilər Dağlıq Qarabağ münaqişəsinin həlli ilə bağlı danışıqların bir qədər səngiməsinə səbəb olmuşdur. Danışıqlar Ki-Uest və Paris razılaşmaları əsasında davam etdirilməlidir.
Azərbaycanın xarici işlər naziri Vilayət Quliyev isə demişdir ki, Ermənistan-Azərbaycan, Dağlıq Qarabağ münaqişəsinin həlli ilə bağlı danışıqlar daha intensiv şəkildə davam etdiriləcəkdir. Sülh prosesi Azərbaycanın irəli sürdüyü tələblər tam nəzərə alınmaqla həyata keçirilməlidir. Ki-Uest və Parisdə heç bir razılaşma olmadığını bir daha xatırladan Vilayət Quliyev demişdir ki, danışıqlar prosesi üçün elə bir baza yaranmamışdır ki, indi də həmin nöqtədən başlanılsın. Ona görə də danışıqlar tam ağ səhifədən də başlana bilər.
Şura üzvləri təşkilati məsələyə baxaraq Azərbaycanın yenidən təşkilata sədrlik etməsini xahiş etmişlər. Qeyd olunmuşdur ki, əlifba sırası ilə Şuraya sədrlik Bolqarıstana verilməli idi. Amma Bolqarıstan gələn ildən ATƏT-ə sədrlik edəcəkdir. Bir dövlət eyni vaxtda iki beynəlxalq təşkilatda sədrlik edə bilməz. Azərbaycanın sədrliyi dövründə təşkilatın qazandığı uğurları yüksək qiymətləndirən Şura üzvləri ona görə də yenidən ölkəmizin bu təşkilata sədrlik etməsinə səs vermişlər.
Müzakirələr zamanı QİƏT-in digər qurumlarının roluna toxunulmuş, bu institutların daha da inkişaf etdirilməsi qərara alınmışdır.
İclasın sonunda QİƏT Parlament Assambleyasında qəbul olunacaq qərarların üzv dövlətlər tərəfindən baxılmasının zəruriliyinə imkan yaradan və təşkilatın parlamentariləri üçün bəzi imtiyazlar nəzərdə tutan “İmtiyazlar və immunitetlər haqqında” Protokol imzalanmışdır.
Bununla da Qara Dəniz İqtisadi Əməkdaşlıq Təşkilatı Xarici İşlər Nazirləri Şurasının Bakıda keçirilən 9-cu iclası öz işini başa çatdırmışdır.