Qadın cüdoçularımız Sarayevoda böyüklər arasında Avropa kuboku yarışında iştirak edəcəklər

Bakı, 7 may, AZƏRTAC

Mayın 7-də Bosniya və Herseqovinanın paytaxtı Sarayevoda böyüklər arasında cüdo üzrə Avropa kuboku yarışı start götürəcək.

AZƏRTAC xəbər verir ki, Azərbaycanı yarışda 6 qadın idmançı təmsil edəcək. Belə ki, məşqçi Vüqar Hüseynovun rəhbərliyi ilə turnirdə Aytac Qardaşxanlı, Nərgiz Hacıyeva, Diana Şoranova (63 kq), Südabə Ağayeva, Günel Həsənli (70 kq), Aytəkin Paşazadə (78 kq) mübarizə aparacaqlar.

İki gün davam edəcək yarışda dünyanın 27 ölkəsindən 250-yə yaxın idmançı medallar və reytinq xalları uğrunda mübarizə aparacaqlar.