İDMAN
Qadın həndbolçular arasında Azərbaycan çempionatına start verilib
Bakı, 21 noyabr, AZƏRTAC
Qadın həndbolçular arasında Azərbaycan çempionatına start verilib.
Azərbaycan Həndbol Federasiyasının mətbuat xidmətindən AZƏRTAC-a bildiriblər ki, “AHF Arena”da keçirilən yarışın ilk oyun günündə meydançaya əvvəlcə “İdman Akademiyası” və “Azəryol” komandaları çıxıblar.
Görüşün favoriti sayılan son ölkə çempionu “Azəryol” fasiləyə 6 topluq üstünlüklə yollanıb – 15:9. “İdman Akademiyası” ikinci hissədə də rəqibin təhlükəli həmlələrini dəf etməyə çalışsa da, ustalıq səviyyəsi öz sözünü deyib. Oyun 37:22 hesabı ilə “Azəryol”un xeyrinə nəticələnib.
Günün ikinci matçında “Azərsu” U-16 ilə qarşılaşıb. Bu oyunda da imkanları daha yüksək qiymətləndirilən “Azərsu” inamlı qələbə qazanıb – 22:10.
İkinci turun görüşlərində də favoritlər növbəti qələbələrini qazanıblar.
“Azəryol” “İdman Akademiyası”na 40:23, “Azərsu” U-16 komandasına 30:15 hesabı ilə qalib gəlib.