İDMAN


Qadınlar arasında Formula W seriyası iştirakçılarının ilkin siyahısı elan edilib

Bakı, 29 noyabr, AZƏRTAC

Qadınlar arasında Formula W seriyası yaradılacağı xəbəri oktyabrın ortalarında elan edilmişdi. Bu yeniliyə münasibət birmənalı olmasa da, təşkilatçılar birinci çempionata hazırlığı davam etdirirlər.

AZƏRTAC xəbər verir ki, yarışların təqvimi və bu seriyada hansı maşından istifadə ediləcəyi artıq məlumdur. Bu gün iştirakçıların ilkin heyəti elan edilib.

Təşkilatçılar bildirirlər ki, yarışlarda iştirak etmək üçün 30 ölkədən 100-dən çox müraciət daxil olub. Onların arasından seçilmiş 55 namizədin fiziki və peşəkar hazırlığını qiymətləndirmək üçün yaxın iki ay ərzində xüsusi test yoxlamaları keçiriləcək. Üç gün davam edəcək testlərin nəticələrinə əsasən seriyanın birinci mövsümü üçün 18 pilot qadın seçilməsi nəzərdə tutulur.

İştirakçılar arasında kifayət qədər məşhur adlarla yanaşı gözlənilməz namizədlər də var. Məsələn, “Lotus” komandasının keçmiş təcrübəçi pilotu 30 yaşlı Karmen Xorda və “Renault 3.5” formula yarışlarının keçmiş iştirakçısı Beytske Visser namizədlər sırasındadır. 2010-cu il Britaniya Formula yarışlarının çempionu olmuş Elis Pauell, GP3 seriyasının keçmiş iştirakçısı Samin Qomes, Britaniya Formula 3 yarışları tarixində qalib gəlmiş ilk qadın pilot Ceymi Çedvik də bu seriyaya düşməyə çalışırlar.

Eyni zamanda, seriyanın potensial iştirakçıları arasında bütün dünyadan seçilmiş gənc və o qədər də gənc olmayan pilot qadınlar da az deyil.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.