Şəmkir, 14 oktyabr, AZƏRTAC

Azərbaycan Respublikasının Prezidenti yanında Bilik Fondunun və Bakı Beynəlxalq Multikulturalizm Mərkəzinin birgə təşkilatçılığı ilə həyata keçirilən “Qafqaz Albaniyasını öyrənirik” layihəsi çərçivəsində təşkil edilən elmi turun iştirakçıları Gəncədən Şəmkirə gəliblər.

Alim və tələbələrdən ibarət tur iştirakçıları Şəmkir şəhərində yerləşən Kirxaya baxıblar. Burada qonaqlara məlumat verilib ki, kilsə XIX əsrdə Şəmkirdə məskunlaşmış almanlar tərəfindən inşa edilib. Lüteran kilsəsi almanların vaxtında 32 il dini məbəd kimi fəaliyyət göstərib. Daha sonra isə kilsə tarix-diyarşünaslıq muzeyinə çevrilib. Muzeydə Azərbaycanda çox nadir rast gəlinən orqan musiqi aləti qorunub saxlanılır. Almanların vaxtında bu alətdən dini mərasimlər keçirilən zaman istifadə olunub. Kilsənin ətrafında abidənin ümumi dizaynına uyğunlaşdırılan park salınıb. Lüteran alman kilsəsi Nazirlər Kabinetinin sərəncamı ilə qeydiyyata alınıb və bu tarixi bina dövlət tərəfindən qorunur.

Sonra rayonun Heydər Əliyev Mərkəzində “Azərbaycan multikulturalizmi” proqramı çərçivəsində “dəyirmi masa” təşkil olunub.

Bakı Beynəlxalq Multikulturalizm Mərkəzinin analitika şöbəsinin müdiri, fəlsəfə doktoru Rəşad İlyasov Kamal Abdullayevin təşəbbüsü və redaktorluğu ilə nəşr olunan “Azərbaycan multikulturalizminin ədəbi-bədii qaynaqları” kitabının və “Multikulturalizm” ədəbi-bədii, elmi-publisistik jurnalının təqdimatı ilə bağlı çıxış edib.

Tədbirdə Şəmkir Rayon İcra Hakimiyyəti başçısının müavini Məleykə Əlizadə qonaqları salamlayaraq, onları rayonda olan Alban abidələri ilə bağlı məlumatlandırıb.

Azərbaycan Respublikasının Prezidenti yanında Bilik Fondunun sektor müdiri Hacı Abdullanın moderatorluğu ilə keçirilən “dəyirmi masa”da AMEA-nın alimləri Mübariz Xəlilov, İmaş Hacıyev və Ülviyyə Hacıyeva Azərbaycan multikulturalizminin qədim laylarından olan alban abidələri haqda apardıqları araşdırmalar barədə məlumat veriblər.

Daha sonra tarix elmləri doktoru Tarix Dostiyevin qədim Şəmkir şəhərindən bəhs edən məruzəsi dinlənilib. Məruzəçi qeyd edib ki, Şəmkir rayonunun Muxtariyyə kəndində yerləşən, VI əsrdə böyük şəhərə çevrilən “Orta əsr qədim Şəmkir qala şəhəri” 2007-ci ildə Azərbaycan Milli Elmlər Akademiyası Arxeologiya və Etnoqrafiya İnstitutunun ərazidə apardığı arxeoloji qazıntılar zamanı tapılıb. Şəhərin qalıqları 30 hektar ərazini əhatə edir. Qalanın düşməndən qorunmaq üçün 8 qülləsi və 4 qapısı olub. 1236-cı ildə şəhəri ələ keçirən monqollar qədim Şəmkiri xarabalığa çeviriblər. 

Oktyabrın 15-də qədim Şəmkir şəhəri ilə tanışlıqdan sonra elmi turun iştirakçıları Ağstafa rayonuna səfər edəcəklər.