MƏDƏNİYYƏT
“Qalaaltı” sağlamlıq və istirahət mərkəzinə infotur təşkil olunub VİDEO
Bakı, 23 may, Türkan Abdullayeva, AZƏRTAC
Mədəniyyət və Turizm Nazirliyinin dəstəyi, Azərbaycan Sağlamlıq və Termal Turizmə Dəstək Assosiasiyası və “Synergy Group”un birgə təşkilatçılığı ilə “Qalaaltı Hotel & SPA” müasir müalicə-istirahət kompleksinə infotur təşkil olunub.
AZƏRTAC xəbər verir ki, infoturda 100-dək yerli turizm şirkəti və media nümayəndələri iştirak edib. İnfoturun keçirilməsində əsas məqsəd “Qalaaltı” sağlamlıq və istirahət mərkəzinin turizm potensialının tanıdılması, eyni zamanda, ölkəmizin sağlamlıq turizminin daha geniş təbliğ olunmasıdır.
Tədbir iştirakçıları əvvəlcə “Qalaaltı Hotel & SPA” müasir müalicə-istirahət kompleksi ilə tanış olublar. Məlumat verilib ki, kompleks Azərbaycanın qədim tarixi-mədəniyyət abidələrindən olan Çıraqqalanın yaxınlığında, sıldırım qayanın altında yerləşir. Dəniz səviyyəsindən 700 metr yüksəklikdə yerləşən yeni kompleks məşhur “Qalaaltı” kurortunun bazasında inşa edilib. Təxminən 7,1 hektar sahəsi olan kompleksdə 354 nəfəri qəbul edə biləcək otel, villa və kotteclər var. Bakıdan 127 kilometr məsafədə yerləşən bu kompleksin 171 otaqdan ibarət otel binası ən müasir standartlara cavab verir.
Daha sonra “Qalalatı” sağlamlıq və istirahət mərkəzinin turizm imkanları və ölkəmizin sağlamlıq turizminə həsr olunmuş “dəyirmi masa” keçirilib. Azərbaycan Sağlamlıq və Termal Turizmə Dəstək Assosiasiyasının rəhbəri Ruslan Quliyev ölkəmizdə turizmin inkişafı istiqamətində görülən işlərdən danışıb. Bildirib ki, son illər turizm təşkilatları və media qurumları arasında yaranan peşəkar əlaqələr Azərbaycan turizminin təbliğinə və ölkəmizdə turizmin inkişafına öz töhfəsini verir: “Azərbaycanın sağlamlıq turizmi ilə bağlı ənənələri mövcuddur. Bu ənənələri yeni innovativ sistemlərin tətbiqi əsasında daha geniş coğrafiyada tanıtmaq mümkündür. Başlıca məqsədimiz ölkəmizin bu sahədə potensialını daha geniş şəkildə təbliğ etməkdir”.
Ruslan Quliyev vurğulayıb ki, ölkəmizdə sağlamlıq turizminin mirvarisi sayılan “Qalaaltı” kurortu Avropa Termal Tarixi Şəhərlər Assosiasiyasının üzvü seçilib. Ölkədə fəaliyyət göstərən sağlamlıq və istirahət mərkəzlərindən məhz “Qalaaltı”nın Avropanın termal şəhərlər xəritəsinə düşməsi onun imkanlarına və turizm axınına müsbət təsir göstərəcək. Sağlamlıq turizmini digər turizm növlərindən fərqləndirən əsas cəhət 365 gün fəaliyyət göstərə bilməsidir. Burada gecələmə müddəti 7-21 gün təşkil edir. Bu da sağlamlıq turizmindən gələn gəlirlərin daimi və yüksək olmasını təmin edir.
Assosiasiya rəhbəri Ruslan Quliyev ölkəmizdə turizm sənayesinin daha da inkişaf etdirilməsi, rəqabətədavamlı turizm sisteminin qurulması məqsədi ilə turizm haqqında yeni qanunun qəbul olunacağını qeyd edib.
“Qalaaltı Hotel & SPA” müasir müalicə-istirahət kompleksinin direktoru Turqay Arı və mərkəzin baş həkimi Vahid Vəliyev buranın fəaliyyət istiqaməti və müalicə metodları haqqında geniş məlumat veriblər. Bildirilib ki, “Qalaaltı” kompleksində tibbi mərkəz müasir avadanlıqla təchiz edilib. Laboratoriya, rentgen və ultrasəs müayinələri üçün lazımi şərait yaradılan mərkəzdə fizioterapiya, elektroterapiya, maqnitoterapiya, hidroterapiya, hidrokolonterapiya otaqları var. Burada müalicə alanlar masaj və palçıq applikasiya otaqlarından istifadə edə bilərlər. Tibbi mərkəzdə uroloji xidmətlər də göstərilir. Kosmetoloji bölmədə prosedura otağı, krioterapiya, solyarium, ozon kapsula və haloterapiya-duz otaqları var.
Mədəniyyət və Turizm Nazirliyinin turizm şöbəsinin əməkdaşı Sərxan Rəsulov diqqətə çatdırıb ki, ölkəmizdə müvafiq sahənin inkişaf etdirilməsi istiqamətində həyata keçirilən uğurlu tədbirlər nəticəsində turizm sənayesi özünün yeni inkişaf dövrünü yaşayır.