Bakı, 2 dekabr, Abdulla Suvar, AZƏRTAC

Azərbaycan xalqının müstəqillik tarixinin ana səhifəsinə çevrilmiş, tariximizə Qanlı Yanvar faciəsi kimi daxil olmuş 1990-cı ilin 20 Yanvar hadisəsi poetik düşüncəmizdə, teatr səhnəmizdə, bədii-publisistikamızda bir-birindən maraqlı əsərlərlə öz əksini tapsa da, hələ də ekran həyatını yaşamayıb. Azərbaycan xalqının əsrlər boyu qəlbində yaşatdığı milli azadlıq və istiqlal istəyindən geri çəkilməyəcəyini, bu müqəddəs amal uğrunda hətta canından belə keçməyə hazır olduğunu bütün dünyaya nümayiş etdirəcək bədii filmin ekranlaşdırılması olduqca təqdirəlayiq hadisədir.

Dekabrın 2-də “Kempinski Badamdar” otel kompleksində son illərin kino həyatında böyük əks-səda doğurmuş “Xoca” filminin müəllifi, rejissor Vahid Mustafayevin “Qanlı Yanvar” bədii filminin yaradıcı və işçi heyəti ilə keçirilən görüş də bu baxımdan unudulmazdır.

AZƏRTAC xəbər verir ki, görüşdə 20 Yanvar hadisələrinin 25-ci ildönümünə həsr olunmuş “Qanlı Yanvar” filminin çəkilişində iştirak edən dünya şöhrətli amerikalı aktyor Lane Devies, türk kinosunun canlı əfsanəsi Nəbahət Çehrə, habelə İrandan dəvət olunmuş tanınmış kino-operator Afşin Əlizadənin başçılıq etdiyi çəkiliş qrupu və yerli azərbaycanlılardan ibarət heyət iştirak edib.

Tədbirdə Vətən torpaqlarının azadlığı uğrunda canlarından keçmiş oğul və qızlarımızın xatirəsi bir dəqiqəlik sükutla yad edilib.

Rejissor Vahid Mustafayev bildirib ki, qarşımızda çox ağır və məsuliyyətli vəzifə dayanır. Çalışacağıq ki, bu vəzifənin öhdəsindən layiqincə gələk. O vurğulayıb ki, filmin çəkilişində iştirak edən kollektiv beynəlmiləl heyətdir. Burada Azərbaycan ilə yanaşı, Amerika, İran, rus və türk aktyorları birgə çalışırlar. Bu, onunla bağlıdır ki, çəkdiyimiz film təkcə Azərbaycana deyil, bütün dünyaya çox tanış və doğma olan bir mövzudur. Filmdə bu beynəlmiləl kollektivin iştirakı sözsüz ki, bu ekran əsərini Azərbaycan çərçivəsindən çıxarıb, beynəlxalq səviyyəyə qaldırır.

Bildirilib ki, 1990-cı ilin yanvar ayında Bakıda sovet imperiyasına qarşı başlanan narazılıq dalğası ilə inqilabi əhval-ruhiyyəni əks etdirən tarixi əhəmiyyətli “Qanlı Yanvar” filminin əsas süjet xəttində real hadisələr lentə alınıb. Bir neçə rol qəhrəmanının timsalında bütöv bir xalqın əbədiyaşar müstəqillik ruhundan doğan mübarizənin canlandırıldığı film artıq ərsəyə gəlməkdədir. Filmin 60 faizi çəkilib və yaradıcı heyət dayanmadan bu ekran əsəri üzərində çalışır.

Vurğulanıb ki, təqdimatının 20 Yanvar faciəsinin 25-ci ildönümü ərəfəsində keçirilməsi planlaşdırılan, qorxmazlıq və mübarizəni canlandıran filmin çəkilişləri davam edir. Yeni ekran əsərinin bir çox ölkələrdə nümayiş olunacağını, festivallarda iştirak edəcəyini bildirən Vahid Mustafayev həmin ölkələrdə tamaşaçıların filmdə təkcə Azərbaycanın müstəqillik mücadiləsini deyil, eyni zamanda, öz ölkələrində baş vermiş müstəqillik uğrunda mübarizəni də hafizələrində canlandıracağını bildirib.

Filmin çəkilişlərinə yaradılan şəraitə görə Prezident İlham Əliyevə bütün heyət adından minnətdarlığını bildirən Vahid Mustafayev diqqətə çatdırıb ki, bu ekran əsəri bir çox xarici dillərə tərcümə olunaraq geniş coğrafiyada yayımlanacaq.

Filmdə rol alan tanınmış aktrisa Nəbahət Çehrə deyib: “Bu təklifi alanda qürur hissi keçirdim. Türkiyə və Azərbaycan qardaş ölkələrdir. Ağrı-acılarımız da birdir. Bu səbəbdən filmdə yaşananları qəlbən hiss edirəm. Filmdə iki övladını itirən ana rolunu canlandırıram. İnanıram ki, bu film beynəlxalq səviyyədə yüksək qiymətə layiq görüləcək”.

Məşhur aktyor Leyn Devis bildirib ki, 20 Yanvar hadisəsi barədə ətraflı məlumat aldıqdan sonra çox təsirləndim. O, bunun böyük bir inqilabi hərəkat olduğunu bildirib. Aktyor belə bir tarixi hadisəni əks etdirən filmdə çəkilmək üçün dəvət almasından çox məmnun olduğunu deyib.

Filmdə xarici jurnalist rolunu yaratdığını söyləyən Leyn Devis bildirib ki, azadlıq və müstəqillik həmişə böyük mücadilə bahasına əldə olunur. İnanıram ki, bu film ən yaxşı tarixi ekran əsəri olacaq.

Tanınmış kino-operator Afşin Əlizadə vurğulayıb ki, Bakı 25 il bundan əvvəlki şəhər deyil. Azərbaycan paytaxtı ötən müddət ərzində demək olar ki, tamamilə dəyişib. Mən bu dəvəti alanda düşünürdüm ki, 25 il bundan əvvəl baş vermiş bir hadisəni ekranlaşdırmaq olduqca çətinlik yaradacaq. Lakin Vahid Mustafayevin sayəsində hər şey asanlıqla öz həllini tapdı. Biz çalışırıq ki, tez bir zamanda bu işi yekunlaşdıraq, tamaşaçılara maraqlı bir ekran əsəri təqdim edək.

Sonda jurnalistlərin çoxsaylı sualları cavablandırılıb.