Bakı, 19 may (AZƏRTAC). Murmansk vilayət universal elmi kitabxanasında insanın kosmosa ilk uçuşunun 50 illiyinə həsr olunmuş tədbirlər çərçivəsində “Qaqarin bürcü altında...” adlı ədəbi gecə və kitab sərgisi keçirilmişdir.

Kitabxananın diyarşünaslıq və saam ədəbiyyatı şöbəsinin mütəxəssisləri, “Orion” astronomiya cəmiyyətinin fəalları ədəbi gecə üçün “Yuri Qaqarin və Kola Şimalı” adlı təqdimat hazırlamışlar. Bəlkə də çoxları bilmirlər ki, Yuri Qaqarinin kosmosa yolu Zapolyaryedən başlanmışdır. Kitabxana əməkdaşları ilk kosmonavtın bu həyat səhifəsindən bəhs edən zəngin material toplamışlar. Qaqarinin burada cəmi 26 ay hərbi xidmət keçməsinə baxmayaraq o, Kola diyarını sevmiş və onu öz evi hesab etmişdir.

Əfsanəvi həmvətənimiz Kərim Kərimov da kosmosla bağlıdır. Kosmonavtlar uçuşa hazır olduqları və kosmik tapşırığı uğurla yerinə yetirdikləri barədə məhz Kərim Kərimova raport verirdilər. Lakin bu yaxınlara qədər Kərim Kərimovun şəxsiyyəti “məxfidir” qrifi altında idi.

1961-ci ilin aprel ayı. İnsanın kosmik məkana uçuşuna hazırlıq gedir. Kərim Kərimov o vaxt general-mayor idi. Müdafiə Nazirliyinin Baş Raket Silahı İdarəsində Kosmik İdarəetmə rəisi, Dövlət Komissiyasının üzvü idi. Komissiyanın tərkibinə nazir K.Rudnev, marşal K.Moskalenko, akademiklər S.Korolyov, V.Qluşko, N.Pilyuqin, V.Barmin, V.Kuznetsov, dövlət strukturlarının, konstruktur və elmi müəssisələrin bir çox digər nümayəndələri daxil idilər. Qaqarinin kosmosa uçuşu uğurla keçdi. Bu, bəşəriyyətin kosmosun öyrənilməsinə dair yeni dövrə böyük sıçrayışı oldu.

Sovet və Rusiya kosmonavtikasının əfsanəsi general-leytenant Kərim Kərimov 1966-cı ildən 1991-ci ilədək pilotlu uçuşlar üzrə Dövlət Komissiyasının sədri oldu. Onun səyləri ilə bəşəriyyətə indi də xidmət edən kosmonavtikanın əsası yaradıldı. General Kərimov bu illər ərzində Sosialist Əməyi Qəhrəmanı adına, Stalin, Lenin və SSRİ Dövlət mükafatlarına layiq görülmüşdür.

Murmansk vilayət sərgisində nümayiş etdirilən nəşrlər sırasında Yekaterina Beloqlazovanın “Tam məxfi general” kitabında Kərim Kərimov haqqında ehtiramla söhbət açılır. Kitabda Kərim Kərimovun kosmonavtlarla və dövlət xadimləri ilə birgə çoxsaylı fotoşəkilləri vardır. Kitabda, həmçinin Rusiya Federasiyası və Azərbaycan Respublikası Prezidentlərinin təbrik teleqramları, akademik Arif Mehdiyevin, general-polkovnik Vladimir İvanovun, təyyarəçi-kosmonavt Pavel Popoviçin, “Ümumrusiya Azərbaycan Konqresi”nin sədrinin müşaviri Eldar Quliyevin, Rusiya Elmlər Akademiyasının akademiki Boris Çertokun, general-leytanant Yevgeni Pançenkonun, Sosialist Əməyi Qəhrəmanı Nikolay Baybakovun və başqalarının Kərim Kərimov haqqında xatirələri verilmişdir.