Bakı, 5 avqust, AZƏRTAC

“Qarabağın işğaldan geri alınacağına inandığım kimi, sığorta ödənişlərinin veriləcəyinə də inanırdım. Çox yaxşı haldır ki, Prezident, Ali Baş Komandan İlham Əliyev humanist münasibət nümayiş etdirərək 1997-ci il avqustun 2-dək Birinci Qarabağ müharibəsində əlil olanlar və yaralananlar haqqında belə bir Fərman verdi. Əmək və Əhalinin Sosial Müdafiəsi Nazirliyi bu işdə çox böyük zəhmət çəkdi, xüsusilə qeyd etmək xoşdur ki, indiyədək həmin kateqoriyadan olanlara 12,5 min mənzil, 7, 5 minə yaxın avtomobil verilib”. Bunu AZƏRTAC-a müsahibəsində Birinci Qarabağ müharibəsində iki dəfə yaralanan, 2-ci qrup əlil, “Minadan Zərərçəkənlərin Assosiasiyası” İctimai Birliyinin sədri Rey Kərimoğlu deyib.

Qarabağ müharibəsi əlili deyib: “1997-ci ilə qədər yaralanan, əlillik statusu alan 4 min nəfərə yaxın Qarabağ əlili vəfat edib, indi həmin vəsait onların varislərinə veriləcək. Eyni zamanda, son müayinələr zamanı əlillik statusu dayandırılan Qarabağ əlillərinin də bu ödənişi əldə etmək hüququ var.

Müharibə əlillərinə Prezident İlham Əliyevin bu cür yanaşması yüksək dəyərləndirilməlidir. Çünki torpaqlarımızın işğalçılardan azad edilməsi uğrunda qan tökənlər arasında ayrı-seçkilik qoyulmur, Birinci və İkinci Qarabağ müharibələri qaziləri bir-birindən fərqləndirilmir. Birinci Qarabağ müharibəsinin qaziləri yaraları, şəhid ailələri isə itkiləri ilə yaşamağa öyrəşiblər. Vətən müharibəsinin hələ ikinci ili tamam olmayıb. 2020-ci ildə xalqımızın Zəfəri ilə başa çatan həmin ağır döyüşlərdə iştirak edən qazilərin, şəhid ailələrinin yaraları qaysaq bağlamayıb. Biz bir dövlət, millət, xalq olaraq onların yanında olmalı, ağrı-acılarını bölüşməli, dərdlərinə şərik çıxmalıyıq ki, az travma ilə ötüşsünlər”.

“Vətəni qorumaq imandandır. Ağır gündə silaha sarılmaq, üzərində dünyaya göz açdığımız torpaq, bizi böyüdən valideynlərimiz, mənsub olduğumuz millət, xalq yolunda qan tökmək, onları qorumaq borcumuzdur. Dövlətin də onu qoruyan oğullara dəstək göstərmək borcu var. Nə xoş ki, həmin borcu dövlət bu cür yüksək səviyyədə yerinə yetirir”, - deyə R. Kərimoğlu fikrini yekunlaşdırıb.

Xatırladaq ki, 1997-ci il avqustun 2-dək olan xidmət dövründə Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar hərbi xidmət vəzifələrini yerinə yetirərkən və ya həqiqi hərbi xidmət dövründə xəsarət (yaralanma, travma, kontuziya) alması və ya xəstələnməsi nəticəsində əlilliyi müəyyən edilmiş hərbi qulluqçulara, daxili işlər orqanlarının əməkdaşlarına və ya onların vərəsələrinə birdəfəlik ödəmənin verilməsinə başlanılıb.

I dərəcə əlilliyə görə - 8 min 800 manat, II dərəcə əlilliyə görə - 6 min 600 manat, III dərəcə əlilliyə görə - 4 min 400 manat verilir.