SİYASƏT


Qardabanidə Azərbaycan Ordusuna dəstək aksiyası keçirilib

Tbilisi, 9 oktyabr, AZƏRTAC

Gürcüstanın Kvemo Kartli–Borçalı bölgəsinin Qardabani rayonunun mərkəzində yerli azərbaycanlılar “Qarabağ Azərbaycandır!” adlı dəstək aksiyası keçiriblər.

AZƏRTAC xəbər verir ki, əllərində Azərbaycan, Gürcüstan və Türkiyənin bayraqlarını tutan aksiya iştirakçıları “Yaşa, yaşa Azərbaycan!”, “Azərbaycan!”, “Ya Qarabağ, ya ölüm!”, “Şəhidlər ölməz, Vətən bölünməz!” şüarları səsləndiriblər.

Qardabani şəhərinin mərkəzində davam edən aksiyada Gürcüstanın Azərbaycanlı Ağsaqqalları Şurası sədrinin müavini Mayak Nemətov, Qardabani rayon 3 saylı məktəbin müəllimi Firdövsi İsgəndərov, Eldar Qarayazılı və başqaları çıxış edərək erməni işğalçılarının torpaqlarımızda törətdikləri vəhşiliklərdən danışıb, Azərbaycan Ordusunun əks-hücum əməliyyatlarını və qazandığı uğurları yüksək qiymətləndiriblər.

Gürcüstanda yaşayan soydaşlarımız tarixi vətənləri Azərbaycanın, onun Prezidentinin və şanlı Ordusunun yanında olduğunu dəstəklədiklərini bildiriblər.

Aksiya çərçivəsində avtomobil karvanı ilə yürüş də təşkil olunub.

Üzərində Azərbaycan, Gürcüstan və Türkiyənin bayraqları dalğalanan avtomobillər şəhərin küçələrindən keçərək Azərbaycan Ordusuna dəstək nümayiş etdiriblər.

Xətayi Əzizov

AZƏRTAC-ın xüsusi müxbiri

Tbilisi 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.