REGİONLAR


Qazançı körpüsündə bərpa işləri aparılır

Culfa, 7 avqust, AZƏRTAC

Bu ilin iyul ayının əvvəllərindən muxtar respublikanın Culfa rayonunun ərazisində yerləşən XVI-XVII əsrlərə aid Qazançı körpüsündə bərpa işlərinə başlanılıb. Hazırda çayın kənarlarında beton istinad divarlar bərkidilir.

AZƏRTAC-ın Naxçıvan bürosu xəbər verir ki, bu işlərin həyata keçirilməsi yolun kənarlarında sürüşmənin qarşısını alacaq, güclü sel daşqınları zamanı körpünün təhlükəsizliyini təmin edəcək. Körpünün bərpası zamanı onun orijinallığının qorunması da diqqətdə saxlanılır.

Qeyd edək ki, Qazançı körpüsü Culfa rayonunun Qazançı kəndindən şimalda, Əlincəçay üzərində inşa edilmiş tarixi-memarlıq abidəsidir. Körpü xalq arasında “Qozbel körpü” adı ilə də məşhurdur. XVI-XVII əsrlərdə Şərq memarlıq üslubunda tikilib. Böyük İpək Yoluna xidmət edən bu körpü vasitəsi ilə vaxtilə Qazançı kəndindən şərq istiqamətdə uzanan və Ordubad ərazisində əsas yola birləşən karvan yolları keçib. Körpü nisbətən yaxşı qalsa da, nəqliyyat üçün yararsızdır. Bununla belə o, Azərbaycanın biraşırımlı körpülərinin ən yaxşı nümunəsi sayılır. Körpünün eni 3,55, uzunluğu 10,85, hündürlüyü 8,8 metrdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.