Bakı, 12 mart, AZƏRTAC

Martın 12-də Təhsil Nazirliyinin təşkilatçılığı ilə Qazax şəhəri 2 nömrəli tam orta məktəbdə “100 yaşlı maarif işığı: Qazax Müəllimlər Seminariyası” mövzusunda növbəti “Novruz mühazirəsi” keçirilib.

Təhsil Nazirliyindən AZƏRTAC-a bildiriblər ki, tədbirdə bu qurumun əməkdaşları, rayonun pedaqoji ictimaiyyəti, media nümayəndələri iştirak ediblər.

Əvvəlcə mühazirə iştirakçıları 2 nömrəli tam orta məktəbin həyətində Qazax Müəllimlər Seminariyasının 100 illiyi münasibətilə 100 ağac əkiblər.

2 nömrəli tam orta məktəbdə keçirilən tədbirdə Təhsil Nazirliyinin şöbə müdirinin müavini Əsgər Quliyev Qazax Müəllimlər Seminariyasının elm və təhsilin inkişafında xüsusi xidməti olduğunu vurğulayıb. O bildirib ki, Qazax tarixən maarifçilik ənənələri ilə tanınıb, bu ənənə indi də davam edir. Azərbaycan Prezidenti İlham Əliyev tərəfindən Qazax Müəllimlər Seminariyasının 100 illik yubileyinin qeyd olunması haqqında Sərəncam verildiyini diqqətə çatdıran Ə.Quliyev Sərəncama uyğun olaraq, Təhsil Nazirliyinin Tədbirlər Planının təsdiq olunduğunu bildirib.

Qazax Rayon İcra Hakimiyyətinin başçısı Rəcəb Babaşov seminariyanın 100 illik yubileyinin qeyd edilməsinin əhəmiyyətini vurğulayıb, ölkə rəhbərinin təhsilin inkişafına göstərdiyi qayğıdan, həyata keçirilən islahatlardan danışıb. Qeyd edilib ki, seminariya Azərbaycan kəndlərində savadsızlığın aradan qaldırılmasında böyük əhəmiyyətə malik olub.

Sonra akademik Nizami Cəfərov tərəfindən “100 yaşlı maarif işığı: Qazax Müəllimlər Seminariyası” mövzusunda “Novruz mühazirəsi” təqdim olunub.

Nizami Cəfərov Qori Müəllimlər Seminariyasının Azərbaycan şöbəsi və onun varisi olan Qazax Müəllimlər Seminariyasının fəaliyyəti barədə ətraflı məlumat verib. Bildirib ki, Qazax Müəllimlər Seminariyasının təşkili Azərbaycanın maarif salnaməsinin ən parlaq səhifələrindən biridir.

Məruzəçi qeyd edib ki, görkəmli ədəbiyyatşünas, tanınmış maarifpərvər və ictimai xadim Firidun bəy Köçərlinin rəhbərliyi ilə fəaliyyətə başlayan Qazax Müəllimlər Seminariyası bütün fənlərin tədrisinin ana dilində mütərəqqi üsullarla aparıldığı yeni təhsil ocağı kimi Azərbaycanda elmin, maarifin və mədəniyyətin inkişafına misilsiz töhfələr verib. Azərbaycanın bölgələri ilə yanaşı, qonşu ölkələr üçün də uzun illər yüksəkixtisaslı pedaqoji kadrlar hazırlamış seminariyanın yetirmələri sırasında adları təhsil, elm və mədəniyyət tarixinə həkk olunmuş çox sayda tanınmış simalar var.

N.Cəfərov diqqətə çatdırıb ki, Qazax Müəllimlər Seminariyası fəaliyyət göstərdiyi illər ərzində 2862 nəfər pedaqoji mütəxəssis hazırlayıb.

Bakı Avrasiya Universitetinin professoru Ədalət Tahirzadə, seminariyanın 90 yaşlı məzunu Nuşirəvan Xəlilov, “Şərq” qəzetinin baş redaktoru Akif Aşırlı, “Ayna.az” saytının təsisçisi Elçin Şıxlı qeyd ediblər ki, Qazax Müəllimlər Seminariyası müstəqil Azərbaycan Respublikasının təhsil işçilərinə gənc nəslin azərbaycançılıq məfkurəsi ruhunda yetişdirilməsi üçün zəngin irs qoyub. Natiqlər, həmçinin “Novruz mühazirələri”nin belə vacib məsələlərə həsr edilməsinin əhəmiyyətini diqqətə çatdırıb, seminariyanın xalqımızın milli özünüdərkinin formalaşmasındakı rolunu vurğulayıblar.

Sonra Təhsil Nazirliyi və Qazax Rayon İcra Hakimiyyəti tərəfindən “Novruz mühazirəsi” çərçivəsində Qazax Müəllimlər Seminariyasının məzunlarına bayram hədiyyələri təqdim edilib. Əmək və Əhalinin Sosial Müdafiəsi Nazirliyinin Novruz bayramı ilə əlaqədar tənha, ahıl və yaşlı insanları əhatə edən bayramlaşma kampaniyası çərçivəsində seminariyanın məzunları olan Ağakişi İsmayılova, Nəbi Nəbiyevə, Sürəyya Qurbanovaya, Nuşrəvan Xəlilova və Nümayəndə Hüseynovaya “DOST Xonçası” təqdim olunub.

Tədbir iştirakçıları tərəfindən rayondakı Şəhidlər xiyabanı ziyarət edilib.

Mühazirə iştirakçıları seminariyanın ilk binası ilə tanış olublar. Tədbir çərşənbə tonqalının qalanması ilə başa çatıb.

Təhsil Nazirliyi 2016-cı ildən etibarən “Novruz mühazirələri” keçirir. Mühazirələrdə Milli Məclisin deputatları, tanınmış alimlər, beynəlxalq və yerli təhsil ekspertləri tərəfindən Azərbaycanın tarixi, elmi, mədəniyyəti və təhsili üzrə müxtəlif məsələlər ictimaiyyətə çatdırılır.