REGİONLAR
Qazaxda “Milli Qurtuluşdan Zəfərə doğru” devizi altında kütləvi vətənpərvərlik bayramı keçirilib VİDEO
Qazax, 14 iyun, Famil Quliyev, AZƏRTAC
Qazaxda Müdafiə Nazirliyi və rayon icra hakimiyyətinin birgə təşkilatçılığı ilə ümummilli lider Heydər Əliyevin Azərbaycanda hakimiyyətə qayıdışının 25-ci ildönümü və Azərbaycan Respublikası Silahlı Qüvvələrinin yaradılmasının 100 illik yubileyinə həsr olunmuş kütləvi vətənpərvərlik bayramı keçirilib.
AZƏRTAC-ın bölgə müxbiri xəbər verir ki, “Milli Qurtuluşdan Zəfərə doğru” devizi altında keçirilən kütləvi vətənpərvərlik bayramının iştirakçıları əvvəlcə ulu öndər Heydər Əliyevin abidəsi önünə tər çiçək dəstələri qoyaraq, xatirəsini ehtiramla yad ediblər.
Daha sonra Azərbaycan Ordusunun ilk qurucularından olan general-mayor Cavad bəy və polkovnik Rüstəm bəy Şıxlinskilərin yaşadıqları evə vurulmuş xatirə lövhəsinin açılış mərasimi olub.
Layihənin müəllifi, Əməkdar İncəsənət Xadimi, Prezidentin fərdi təqaüdçüsü, polkovnik Abdulla Qurbani açılış mərasimində çıxış edərək Cavad və Rüstəm Şıxlinskilərin ordu quruculuğundakı xidmətlərindən danışıb, onların həyat və fəaliyyətlərinin gənc nəslə bir örnək olduğunu bildirib. Eyni zamanda, ilk general rütbəsini almış Süleyman Əfəndiyevin həyatından söz açaraq, yaxın günlərdə onun adının əbədiləşdirilməsi istiqamətində məqsədyönlü tədbirlərin görüləcəyini bildirib.
Süvari əsgərlərin tədbirə qatılması alqışlarla qarşılanıb.
Lövhənin rəmzi açılışını bildirən ağ örpək götürüldükdən sonra Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını, bütün qazaxlıları möhtəşəm bayram münasibətilə təbrik edib, keçirilən tədbirin rayon sakinlərinin yaddaşında uzun müddət silinməz iz buraxacağını deyib.
Milli Məclisin deputatları Ülviyyə Ağayeva, Kamran Nəbizadə, Bakı Dövlət Universitetinin mülki hüquq kafedrasının müdiri Məhəbbət Dəmirçiyeva, sərbəst güləş üzrə böyüklərdən ibarət Azərbaycan yığma komandasının baş məşqçisi Firdovsi Umudov çıxış edərək, bu cür tədbirlərin gənclərin hərbi vətənpərvərlik ruhunda tərbiyə olunmasında böyük əhəmiyyət daşıdığını bildiriblər.
Müdafiə Nazirliyinin Mənəvi-Psixoloji Hazırlıq və İctimaiyyətlə Əlaqələr İdarəsinin rəisi, general-mayor Rasim Əliyev müdafiə naziri Zakir Həsənovun adından tədbir iştirakçılarını təbrik edib, Qazaxda vətənpərvərlik mövzusunda keçirilən tədbirin önəmindən danışıb.
Polkovnik Rüstəm bəyin nəvəsi Rüstəm Şıxlinski çıxışında bu cür yüksək səviyyəli tədbirin keçirilməsinə görə Prezident İlham Əliyevə və təşkilatçılara ailəsi adından dərin minnətdarlığını bildirib.
Möhtəşəm bayram tədbirində Vətən uğrunda canından keçmiş igid oğul və qızlarımızın da xatirəsi yad edilib, ruhlarına dualar oxunub. “Fəxri qazaxlılar” parkı ilə tanışlıqdan sonra qonaqlar Şəhidlər xiyabanına baş çəkərək memorialın önünə gül dəstələri qoyub və şəhidlərə olan ehtiramlarını ifadə ediblər.
Daha sonra bayramsayağı bəzədilmiş Mədəniyyət Mərkəzinin qarşısında “Milli Qurtuluşdan Zəfərə doğru” devizi altında keçirilən bayram tədbirinə start verilib.
Layihə rəhbəri, polkovnik Abdulla Qurbani və Xalq Artisti Pərvanə Qurbanova bayram tədbirini açıq elan edərək bütün tədbir iştirakçılarını və qonaqları salamlayıb, Qazax elinin əsl bayram əhval-ruhiyyəsində olduğunu bildiriblər. Bu il Azərbaycan Xalq Cümhuriyyətinin 100 illik yubileyinin qeyd edilməsinin, Ulu Öndərin xalqın təkidli tələbi ilə ikinci dəfə hakimiyyətə qayıdışının 25 ilinin, Bakı şəhərinin erməni bolşeviklərindən azad edilməsinin 100 ilinin tamam olmasının xalqımız üçün əsl bayram olduğunu diqqətə çatdırıblar. A.Qurbani “Milli Qurtuluşdan Zəfərə doğru” devizi altında keçirilən hərbi vətənpərvərlik tədbirinin məqsədi, mahiyyəti və proqramı barədə ətraflı məlumat verərək bildirib ki, bu tədbirdə ümummilli lider Heydər Əliyevin Azərbaycan xalqı və dövləti qarşısında, eləcə də müstəqil Azərbaycanın ordu quruculuğunda müstəsna xidmətləri bir daha xatırlanacaq. Layihə rəhbəri qeyd edib ki, Müdafiə Nazirliyi və Qazax Rayon İcra Hakimiyyətinin birgə təşkilatçılığı ilə reallaşan teatrlaşdırılmış, kinolaşdırılmış kütləvi vətənpərvərlik bayramına on mindən çox rayon sakini, hərbi qulluqçular və qonaqlar qatılıb.
Tədbirdə ümummilli lider Heydər Əliyevin və şəhidlərin xatirəsi bir dəqiqəlik sükutla yad olunduqdan sonra dövlət himni səslənib.
“Azərbaycan fanforası” hərbi orkestr tərəfindən ifa olunub. Ulu öndər Heydər Əliyevin həyat və fəaliyyətini, hakimiyyətə gəldiyi anları, xalqla görüşlərini, Azərbaycan xalqı naminə göstərdiyi misilsiz xidmətləri, ordu quruculuğu sahəsində əldə edilən nailiyyətləri özündə əks etdirən kadrlar monitor vasitəsilə nümayiş etdirilib.
Sonra Qazax Rayon İcra Hakimiyyətinin başçısı Rəcəb Babaşov çıxış edib. Qeyd edib ki, 1993-cü ildə ümummilli lider Heydər Əliyevin xalqın təkidli tələbi ilə hakimiyyətə qayıdışı ölkəni xaosdan və dövlətçiliyini itirmək təhlükəsindən xilas etdi. 1994-cü ilin oktyabr, 1995-ci ilin mart hadisələrində Heydər Əliyev özünün siyasi yenilməzliyi və qətiyyəti ilə Azərbaycan dövlətçiliyini ağır faciələrdən qurtardı. 1995-ci ildə müstəqil Azərbaycanın ilk parlamentinə keçirilən seçkilər isə dövlət müstəqilliyinin möhkəmləndirilməsi prosesinin hüquqi bazasının yaradılmasına geniş imkanlar açdı. Beləliklə, Azərbaycanın beynəlxalq arenada özünəlayiq yer tutması, beynəlxalq münasibətlərin subyektinə çevrilməsi istiqamətində qlobal işlərə start verildi.
Rəcəb Babaşov deyib: “Ən böyük xoşbəxtlik ulu öndər Heydər Əliyevin müəyyən etdiyi dövlət idarəçiliyi strategiyasının bu gün onun ideyalarına sadiq olan Prezident İlham Əliyev tərəfindən uğurla davam etdirilməsidir. Ulu Öndərin vaxtilə dediyi fikirlər bu gün öz təsdiqini bir daha tapır: “İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.
Sonra səhnə incəsənət adamlarının ixtiyarına verilib. Silahlı Qüvvələrin mahnı və rəqs ansamblının ifasında nümayiş olunan ədəbi-bədii xoreoqrafik kompozisiya tədbirə toplaşanlar tərəfindən alqışlarla qarşılanıb.
Əməkdar Artist Aybəniz Haşımova və “Bülbüllər” qrupunun ifasında səslənən “İgid oğlum haydı gəl” mahnısı tədbirə toplaşanlarda əsl bayram əhval-ruhiyyəsi yaradıb.
Xalq Artisti Samir Cəfərovun “Lələtəpə fatehləri” mahnısının sədaları altında Aprel şəhidləri kapitan Orucov Mühüd Qurban oğlunun, baş leytenant Namazov Elvin Məmməd oğlunun və əsgər Əliyev Orxan Məhəmməd oğlunun göstərdikləri şücaətdən danışılıb, əziz xatirələri bir daha yad edilib.
Əməkdar artistlər Nuriyə Hüseynovanın, Cahangir Qurbanovun, Xalq Artisti Alim Məmmədovun bir-birindən şən-şux hərbi vətənpərvərlik mahnıları tədbirə əsl bayram əhval-ruhiyyəsi qatıb.
İlk topoqraf İbrahim ağa Vəkilovun, "Artilleriyanın Allahı" adlandırılan Əliağa Şıxlinskinin, Azərbaycan Xalq Cümhuriyyəti hərb naziri, general Səməd bəy Mehmandarovun, Osmanlı ordusunun generalı, Qafqaz İslam Ordusunun komandanı Nuru Paşanın, general-mayor Süleyman Əfəndiyevin, Azərbaycan Ordusunun ilk qurucularından olan general-mayor Cavad bəy və polkovnik Rüstəm bəy Şıxlinskilərin meydana təşrif buyurması tədbirə toplaşanlarda qürur hissi oyatdı. Aktyorların ifasında səhnəyə daxil olan tarixi şəxsiyyətlərin səhnədə görünmələri tədbir iştirakçıları tərəfindən alqışlarla qarşılandı.
Tədbir Silahlı Qüvvələrin mahnı ansamblının ifasında səslənən “Vətən marşı” mahnısı ilə başa çatıb.