REGİONLAR


Qazaxda uşaq bağçası əsaslı təmirdən sonra balacaların ixtiyarına verilib

Qazax, 23 yanvar, Rauf Hacıyev, AZƏRTAC

Qazax şəhər 6 saylı körpələr evi-uşaq bağçası əsaslı təmirdən sonra fidanların ixtiyarına verilib.

Mərasimdə Qazax Rayon İcra Hakimiyyətinin başçısı Rəcəb Babaşov, rayonun idarə, müəssisə, təşkilat rəhbərləri və ictimaiyyət nümayəndələri iştirak ediblər.

AZƏRTAC-ın bölgə müxbirinin verdiyi məlumata görə, tədbirdə çıxış edən Rəcəb Babaşov bildirib ki, bu gün uşaqların keyfiyyətli təhsil və qayğı ilə əhatə olunması, onlar üçün zəruri şəraitin yaradılması, böyüməkdə olan nəslin layiqli vətəndaş kimi formalaşması Azərbaycanda dövlət-uşaq siyasətinin başlıca istiqamətlərindəndir.

Rəcəb Babaşov son illərdə rayonda bu istiqamətdə həyata keçirilmiş işlərdən danışaraq qeyd edib ki, hazırda şəhər bağçalarından 1, 2, 3, 4, 5 saylı, kənd bağçalarından Qazaxbəyli kəndi ərazisində məcburi köçkünlər üçün salınmış yeni qəsəbədə yerləşən Aşağı Əskipara, Daş Salahlı kənd 2 və 3 saylı, Kosalar kənd 2 və 3 saylı, Xanlıqlar, Dəmirçilər, İkinci Şıxlı kənd 2 saylı körpələr evi-uşaq bağçaları, Cəfərli, Canalı, Quşçu Ayrım və Bala Cəfərli kənd uşaq bağçaları müasir səviyyədə əsaslı təmir edilib.

Bildirilib ki, Prezident İlham Əliyevin regionlarda uşaq bağçalarının tikintisi ilə bağlı imzaladığı 2018-ci il 12 fevral tarixli Sərəncamına əsasən 6 saylı körpələr evi-uşaq bağçasında da işlərə başlanılıb.

Qeyd edilib ki, 90 yerlik körpələr evi-uşaq bağçasında balacaların təlim-tərbiyəsi ilə peşəkar pedaqoji heyət məşğul olacaq. Burada müxtəlif yaş qrupları üçün məşğələ və yataq otaqları, rəsm, idman və musiqi zalları, yeməkxana yaradılıb.

Bağçanın həyətində xüsusi istirahət guşələri var, həmçinin müşahidə kameraları quraşdırılıb.

Hazırda Qazax rayonu üzrə 25 uşaq bağçasından 18-də müasir şəraitin yaradıldığını deyən icra hakimiyyətinin başçısı bu il digər bağçalarda da təmir işlərinin aparılacağını vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.