Sumqayıt, 1 mart (AZƏRTAC). Qazaxıstanın Mangistau vilayətinin akimi Alik Aydarbayevin başçılıq etdiyi nümayəndə heyəti ölkəmizə səfər çərçivəsində martın 1-də Sumqayıtda olmuşdur.

AZƏRTAC xəbər verir ki, qonaqlar Cənubi Qafqazda unikal istehsalat kompleksində - Sumqayıt Texnologiyalar Parkında (STP) olmuşlar. Bildirilmişdir ki, Azərbaycanda qeyri-neft sahəsinin inkişafını strateji vəzifə elan edən Azərbaycan Prezidenti İlham Əliyev ölkədə texnoparkların yaradılması təşəbbüsü ilə çıxış etmişdir. Texnoparklar kiçik və orta sahibkarlığın stimullaşdırılmasını nəzərdə tutan regional innovasiya zonasının formalaşdırılması layihəsi çərçivəsində inşa edilir.

STP-nin fəaliyyəti ilə tanış olan qonaqlara bildirilmişdir ki, nisbətən qısa müddətdə 250 hektarlıq ərazidə müasir sənaye məhsulu istehsal edən iri sənaye müəssisələri kompleksi yaradılmışdır. Hazırda texnoparklar haqlı olaraq Azərbaycanda çoxprofilli innovasiyalı mühəndisliyin mərkəzi sayılır. Burada artıq 17 zavod uğurla fəaliyyət göstərir, ilin sonunadək daha iki müəssisə açılacaqdır. Parka daxil olan hər bir zavod aparıcı dünya istehsalçılarının ən müasir texnoloji avadanlığı ilə təchiz edilmişdir. Gələcəkdə STP ixrac təyinatlı məhsul istehsalı ilə məşğul olan 30 müəssisəni əhatə edəcəkdir. Hazırda 4,5 min işçi tikinti-quraşdırma və istehsalat işləri görür. Yeni zavodlar istifadəyə veriləndən sonra işçilərin sayı artaraq, 10 min nəfərdən çox olacaqdır. STP-də buraxılan məhsulun dünya standartlarına uyğunluq sertifikatı vardır.

STP-nin məhsulu iki beynəlxalq ISO standartına sahib olduqdan sonra dünya bazarlarına çıxmışdır.

Sonra qonaqlar zavodun müəssisələrinə tanışlıq ekskursiyasına çıxmış, kabel zavodunda, mis və alüminium çubuqların istehsalı sexində, plastik borular, isti sinkləmə, habelə yüksək voltlu elektrik avadanlığı, günəş kollektorları istehsal edən zavodlarda, elektron cihazlar, metal konstruksiyalar, dəqiq emal mərkəzində olmuşlar

Qazaxıstanlı qonaqlar ümumi sahəsi 2,8 hektar olan polimer məhsulu istehsal edən zavodun işi ilə tanış olmuşlar. Hazırda burada 400 nəfər işləyir. Texnologiya parkının ilk müəssisələri sırasında işə salınan zavodda əvvəlcə cəmi beş xətt fəaliyyət göstərirdi. Zavod genişləndirildikdən sonra onların sayı 25-ə çatdırılmışdır. Onların hər biri saatda 1300 kiloqram polietilen boru emal edir. Müəssisədə idarəetmə tamamilə avtomatlaşdırılmışdır. Mütəxəssislər bildirirlər ki, bu, istehsal olunan məhsulun - müasir tələblərə cavab verən alüminium örtüklü çoxtəbəqəli polietilen və polipropilen boruların keyfiyyətinə zəmanət verir.

Zavod hər gün 50 il zəmanət verilən, yüksək təzyiqə davamlı olan və korroziyaya uğramayan 396 ton polietilen boru istehsal etmək iqtidarındadır. Qaz və su təchizatında, kanalizasiya xətlərinin çəkilməsində və digər məqsədlər üçün istifadə olunan bu borulara ölkəmizdə və beynəlxalq bazarlarda böyük tələbat var. Mütəxəssislərin sözlərinə görə, zavod təkcə respublikada deyil, həm də regionda ən perspektivli müəssisədir.

Sonra STP-nin inzibati korpusunda müəssisənin təqdimatı olmuşdur. Qonaqlara bütün zavodların strukturu və fəaliyyəti barədə ətraflı informasiya verilmişdir. Bildirilmişdir ki, parkın bütün müəssisələri yüksək texnologiyalarla təchiz edilmişdir. Burada Fransa, Almaniya, Yaponiya, İsveç və s. tanınmış istehsalçılarının avadanlığı yerləşdirilmişdir. Texnologiya parkında göndərilən məhsulun keyfiyyətinə nəzarət edirlər. Qonaqlar burada istifadə olunan texnologiyaların çoxunun təkcə Azərbaycan üçün deyil, həm də bütün region üçün yenilik olması barədə məlumatı böyük maraqla qarşılamışlar. Texnoparkın mütəxəssisləri qonaqların suallarına cavab vermişlər.

Elə həmin gün A.Aydarbayev və nümayəndə heyətinin üzvləri Azərbaycan Respublikası Dövlət Neft Şirkətinin “Azərikimya” İstehsalat Birliyində (İB) olmuşlar. Qonaqları İB-nin Müşahidəçilər Şurasının sədri, Milli Məclisin deputatı Muxtar Babayev salamlamışdır. Görüşdə qonaqlara “Azərikimya” İB sistemində yenidən təşkilatlanma və quruculuq işləri barədə məlumat verilmiş, gələcəyə yönələn layihələrdən danışılmışdır. Tərəflər fikir mübadiləsi aparmış, əməkdaşlıq perspektivlərini müzakirə etmişlər.