Qazi: Biz gənclər döyüş meydanında, Prezident İlham Əliyev isə siyasi arenada vuruşurdu

Bakı, 2 fevral, AZƏRTAC

Sevinirik ki, Prezident İlham Əliyevin bizə olan etimadını doğrultduq. Vətən müharibəsində Zəfər qazanaraq ərazilərimizi özümüzə qaytardıq. Bundan sonra da Vətənimizin keşiyində canla-başla dayanmağa hazırıq.

AZƏRTAC xəbər verir ki, bu fikirləri Vətən müharibəsi qazisi Elçin Əhmədov fevralın 2-də Gənclər Günü münasibətilə Milli Məclisdə “Heydər Əliyev - müasir Azərbaycan gənclər siyasətinin banisi” mövzusunda keçirilən ictimai dinləmədə söyləyib.

“Biz gənclər döyüş meydanında düşmənlə, Prezident, Müzəffər Ali Baş Komandan İlham Əliyev isə siyasi arenada bütün dünya ilə, bizi istəməyən qüvvələrlə vuruşurdu. Biz bir yumruq olduq və şanlı Zəfər çaldıq”, - deyə Vətən müharibəsinin qazisi vurğulayıb.

Elçin Əhmədov dövlətimizin şəhid ailələrini, qaziləri hər zaman diqqətdə saxladığını da qeyd edib.