CƏMİYYƏT
Qazi Kamil Rəcəbli: Müharibənin odu-alovu, ölümün nəfəsi mənə əsl dostlar qazandırdı
Bakı, 18 oktyabr, AZƏRTAC
Vətən müharibəsində unudulmaz və çətin günlərimiz çox olub. Hərəmiz müxtəlif regionlardan gəlsək də, qısa zamanda doğmalaşdıq. Heç bir-birimizin adını bilmədən dayaq olduq, səmimi, isti münasibət yarandı. Komandirlərimiz də bizimlə böyük qardaş kimi davranırdılar. Heç birimiz təhlükələrə baxmayaraq, şəhid və yaralı döyüş yoldaşlarımızı meydanda qoyub kənara çəkilmirdik.
AZƏRTAC xəbər verir ki, bunu Vətən müharibəsi qazisi Kamil Rəcəbli deyib.
Rəcəbli Kamil Bəxtiyar oğlu 1997-ci il iyulun 26-da Bakıda anadan olub. 2015-2017-ci illərdə Beyləqanda yerləşən “N” saylı hərbi hissədə xidmət edib. Kamilin hərbi xidmət dövrü Aprel döyüşlərinə təsadüf edib. O zaman K.Rəcəbli alınan postların mühafizəsində, gücləndirilməsində iştirak edib. Hərbi xidmət dövründə atıcı vəzifəsində olan Kamil elə Vətən müharibəsində də atıcı kimi döyüşüb.
Qazi, həmçinin bildirib: “Vətən müharibəsində döyüşlərə sentyabrın 29-dan etibarən qoşuldum. Cəbrayıl, Zəngilan və Xocavənd uğrunda gedən döyüşlərdə iştirak etdim. O günləri fəxrlə xatırlayıram. Müharibənin odu-alovu, ölümün nəfəsi mənə əsl dostlar qazandırdı. Döyüş yoldaşlarımla yağışa, qara baxmayaraq, günlərlə torpağın üstündə yatdığımız olub. Heç kim bilmirdi bir neçə dəqiqədən sonra başına nələr gələcək. Hər anımızı əbədiləşdirməyə çalışırdıq. Bəzən hər kəs bir-birinə vəsiyyət də edirdi. Çox maraqlı idi, ilk dəfə gördüyün insanlarla bir neçə saat içində doğmalaşırdın. Döyüş meydanı bir insanın etibarının sınanılması üçün ən yaxşı məkandır. Çünki səni öz canı bahasına da olsa, döyüş meydanında tək qoymayan birisi demək ki, adi həyatda da hər çətinliyə baxmayaraq, yanında olacaq. Hər saniyə ölümlə üz-üzə olsaq da, əhvalımızı pozmur, hər dəqiqəmizə şükür edir, yaralılarımızın sağalması üçün dua edir, şəhid olan döyüş yoldaşlarımızı kədər və qürur hissi ilə xatırlayırdıq. Bir çörək kəsdiyin, deyib-güldüyün silahdaşının bir neçə dəqiqədən sonra şəhid olması insanı ruhən sarsıdırdı. Hər birimiz özümüzü qısa zamanda toplayıb şəhid olan silahdaşımızın qisasını artıqlaması ilə alırdıq. O günlərin hər dəqiqəsi, hər bir döyüş yoldaşım yadımdadır. Döyüş yoldaşlarımızla şəhidlərimizin ziyarətinə üzüağ gedirik. Çünki onların həm qisası alınıb, həm də uğrunda canlarını verdikləri torpaqlar düşməndən təmizlənib”.
Qeyd edək ki, Kamil Rəcəbli ölkə başçısının sərəncamları ilə “Cəbrayılın azad olunmasına görə”, “Zəngilanın azad olunmasına görə” medalları ilə təltif olunub.