CƏMİYYƏT


Qazilər üçün yaradılan təsərrüfatlara baxış olub

Bakı, 29 iyul, AZƏRTAC

Əmək və əhalinin sosial müdafiəsi naziri Sahil Babayev Qobustan Rayon İcra Hakimiyyətinin başçısı Adil Məmmədovla birgə həmin rayonda qazilər üçün özünüməşğulluq proqramı üzrə yaradılan təsərrüfatlara baxış keçirib.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, proqram iştirakçıları ilə görüşündə nazir vurğulayıb ki, Prezident İlham Əliyevin tapşırığına əsasən, postmüharibə dövründə icra olunan sosial dəstək paketinin bir istiqaməti kimi şəhid ailələri və qazilərdən ibarət 8 min şəxs üçün özünüməşğulluq proqramı çərçivəsində kiçik biznes sahələri, təsərrüfatlar qurulub. Məqsəd onların kiçik biznesə yiyələnmələrinə, bununla sahibkarlığa çıxışına şərait yaradılmasıdır. Hazırda da həmin proses davam edir.

Vətən müharibəsi veteranı Orxan Rəsulovun özünüməşğulluq proqramı çərçivəsində verilmiş avadanlıqlarla qurduğu “mebellərin kənar bantlanması” sexinə və Vətən müharibəsi əlili Ülvi Niftalıyev üçün proqram çərçivəsində yaradılmış maldarlıq təsərrüfatına baxış olub.

Dövlət başçısının sərəncamları ilə O.Rəsulov “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə”, Ü.Niftalıyev isə “Füzulinin azad olunmasına görə”, “Şuşanın azad olunmasına görə”, “Qubadlının azad olunmasına görə” medalları ilə təltif olunublar. Onlara müvafiq sosial ödənişlər də təyin olunub.

Hər iki müharibə iştirakçısı göstərilən diqqət və qayğıya görə Prezident İlham Əliyevə minnətdarlıqlarını ifadə edib, verilmiş aktivlərdən düzgün istifadə edərək kiçik bizneslərini inkişaf etdirmək üçün çalışdıqlarını bildiriblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.