Bakı, 13 may, Aytac Haqverdiyeva, AZƏRTAC

Mayın 13-də “Azərbaycanda xidmət göstərənlər üçün keçirilən psixososial dəstək təlimləri ilə qazilərin gücləndirilməsi layihəsi”nin ikinci mərhələsinin başa çatması ilə bağlı tədbir keçirilib.

AZƏRTAC xəbər verir ki, tədbirdə İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, TƏBİB-in İdarə Heyəti sədrinin vəzifələrini müvəqqəti icra edən Vüqar Qurbanov, Türkiyə Respublikasının İctimai İnkişaf Mərkəzinin Təhsil və Sosial Həmrəylik Dərnəyinin (TOGEM-DER) İdarə Heyətinin sədri Füsun Türken Uysal, Ankara Universitetinin Sağlamlıq elmləri fakültəsinin dekanı Əminə Özmete, Türkiyənin ölkəmizdəki səfiri Cahit Bağcı və Türkiyə Böyük Millət Məclisinin Ərizə Komissiyasının sədri, millət vəkili Mihrimah Belma Satır çıxış ediblər.

İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev layihənin ərsəyə gəlməsində dəstək olan Türkiyə qurumlarına təşəkkür edib və bu təcrübənin iştirakçılar üçün faydalı olacağına əminliyini ifadə edib. O əlavə edib ki, Agentlik qardaş ölkə ilə əlaqələrin inkişaf etdirilməsində maraqlıdır: “Biz daim Türkiyənin müvafiq səhiyyə qurumları ilə əməkdaşlığın genişləndirilməsinə çalışır, icbari tibbi sığorta və səhiyyə sahəsində Türkiyə təcrübəsinin öyrənilməsi istiqamətində mütəmadi olaraq qarşılıqlı səfər və görüşlər təşkil edir, birgə layihələr icra edirik”.

İdarə Heyətinin sədri, həmçinin müharibə iştirakçılarının və şəhid ailəsi üzvlərinin daim dövlətin qayğısı ilə əhatə olunduğunu və Agentliyin bu istiqamətdə tədbirlər gördüyünü vurğulayıb: “2022-ci ilin yanvar-aprel ayları ərzində 6500-ə yaxın Vətən müharibəsi iştirakçısı və şəhid ailəsi üzvünə icbari tibbi sığorta çərçivəsində 47 mindən çox tibbi xidmət göstərilib”.

TƏBİB-in İdarə Heyəti sədrinin vəzifələrini müvəqqəti icra edən Vüqar Qurbanov isə Türkiyənin daimi dəstəyini diqqətə çatdırıb: “Heç şübhəsiz ki, haqq savaşımızda qəhrəmanlıqla vuruşmuş qazilərimizin sağlamlıqlarına qovuşmasında türkiyəli həkimlərin rolu danılmazdır. Bu günə qədər birgə əməkdaşlıq çərçivəsində “YAŞAT” Fondu tərəfindən Türkiyəyə əməliyyat üçün göndərilmiş onlarla qazimiz qardaş ölkədə öz sağlamlıqlarına qovuşaraq vətənimizə qayıdıb”.

Türkiyənin ölkəmizdəki səfiri Cahit Bağcı isə iki ölkə arasındakı əlaqələrin inkişafından və layihənin əhəmiyyətindən danışıb: “Sevindirici haldır ki, belə əhəmiyyətli layihəmizin bağlanış mərasimi Türkiyə və Azərbaycan arasında diplomatik əlaqələrinin qurulmasının 30-cu ildönümünə təsadüf edir. Bu kimi sosial layihələrin isə davamlı olması üçün əlimizdən gələni əsirgəməyəcək, Türkiyədəki digər universitetlərin və sosialyönümlü qeyri-hökumət təşkilatlarının bu işə cəlb olunmasına çalışacağıq”.

Digər çıxış edənlər iki ölkə qurumlarının belə vacib bir layihədə əməkdaşlıq etməsindən məmnunluqlarını ifadə edib, layihənin müharibə iştirakçıları və şəhid ailəsi üzvləri üçün faydalı olacağına inandıqlarını bildiriblər.

Tədbirin sonunda təlimçilərə və iştirakçılara müvafiq olaraq təşəkkürnamələr və sertifikatlar təqdim olunub.

Qeyd edək ki, layihə Səhiyyə Nazirliyi, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi, Sosial Xidmətlər Agentliyi, TOGEM-DER, Türkiyənin Xarici İşlər və Mədəniyyət və Turizm nazirlikləri, Ankara Universiteti və Ankara Ticarət Palatasının təşəbbüsü və təşkilatçılığı ilə ərsəyə gəlib.

Layihənin əsas məqsədi ölkəmizdə şəhid və qazi ailələrinə sahə xidməti göstərən psixoloq, psixiatr və sosial işçilərin bilik və bacarıqlarını artırmaq və bunun sayəsində müharibə iştirakçıları və şəhid ailəsi üzvlərinin ruhi və psixoloji vəziyyətinin yaxşılaşmasına nail olmaqdır.

Layihənin cari ilin martında keçirilmiş birinci mərhələsində vebinarlar təşkil edilib. Mayda Bakıda keçirilən üçgünlük təlimlərdə isə öyrənilən bilik və bacarıqlar təkmilləşdirilib. Layihəyə 70-dən çox əməkdaş cəlb olunub.