ELM VƏ TƏHSİL


Qəbələ Dövlət Peşə Təhsil Mərkəzində təlim təşkil olunub

Bakı, 21 avqust, AZƏRTAC

Qəbələ Dövlət Peşə Təhsil Mərkəzində “Qəbələ, İsmayıllı və Qax rayonlarında kənd təsərrüfatı və turizm sahəsində duala bənzər peşə təhsili və təlimi pilotlarının yaradılması” (ED VET) layihəsi çərçivəsində alman ekspert tərəfindən “Qarğıdalı əkininin müasir istehsalat texnologiyaları, qarğıdalının növləri ilə tanışlıq” mövzusunda təlim təşkil olunub.

Almaniya Beynəlxalq Əməkdaşlıq Cəmiyyətinin (GIZ) eksperti Fərrux Nəcəfov AZƏRTAC-a bildirib ki, təlimin məqsədi pilot peşə mərkəzlərinin mühəndis-pedaqoji heyətini kənd təsərrüfatı sahəsində ən yeni təcrübə, texnika və metodlarla tanış etmək əsasında onların bilik və bacarıqlarını gücləndirməkdir.

Təlim nəzəri və praktik hissədən ibarət olub. Nəzəri hissədə əhatə olunan məzmun ED VET layihəsi çərçivəsində pilot peşə məktəbləri ilə müəssisələr arasında razılaşmaya əsasən müəssislərin ərazilərində salınmış 3 nümayiş sahəsində (“Gilan Diary Farms” MMC, “Gilan Qəbələ Aqrotexservis” MMC və “Park Agro” MMC) əyani olaraq iştirakçılara çatdırılıb.

Təlimdə Qəbələ Dövlət Peşə Tədris Mərkəzinin, Qax Peşə Liseyinin, İsmayıllı Peşə Tədris Mərkəzinin mühəndis-pedaqoji heyəti ilə yanaşı, pilot ixtisaslardan seçilmiş 15 qabaqcıl tələbə də iştirak edib.

Xatırladaq ki, ED VET layihəsi Avropa İttifaqı ilə Almaniya Federal İqtisadi Əməkdaşlıq və İnkişaf Nazirliyi (BMZ) tərəfindən maliyyələşdirilir və Almaniya Beynəlxalq Əməkdaşlıq Cəmiyyəti (GIZ) tərəfindən icra olunur. Layihənin məqsədi Qəbələ, İsmayıllı və Qax rayonlarında 3 peşə təhsili müəssisəsində kənd təsərrüfatı və turizm sahələrində duala bənzər PTT pilotlarının yaradılması ilə peşə təhsili və təliminin cəlbediciliyini, həmçinin əmək bazarının tələblərinə uyğunluğunu artırmaqdır.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.