Qəbələ, 28 iyun (AZƏRTAC). İyunun 28-də Qəbələdə gənc xilasedici və yanğınsöndürənlərin ümummilli lider Heydər Əliyevin anadan olmasının 91-ci ildönümünə həsr edilmiş III respublika birinciliyi və gənc xilasedicilərin II Beynəlxalq yarışı başa çatmışdır.

AZƏRTAC xəbər verir ki, Fövqəladə Hallar Nazirliyinin təşkilatçılığı, Təhsil, Gənclər və İdman nazirliklərinin birgə dəstəyi ilə keçirilən yarışın bağlanış mərasimində fövqəladə hallar naziri, general-polkovnik Kəmaləddin Heydərov, təhsil naziri Mikayıl Cabbarov, gənclər və idman nazirinin müavini İsmayıl İsmayılov iştirak etmişlər.

Əvvəlcə FHN-in Fövqəladə Halların Xəbərdar Edilməsi Baş İdarəsinin rəisi, general-mayor Elşad Hüseynov nazir, general-polkovnik Kəmaləddin Heydərova raport vermişdir.

Sonra nazir Kəmaləddin Heydərov yarışın keçirildiyi çadır düşərgəsində bütün komandaların üzvləri ilə görüş keçirərək onların geyimi, fiziki və taktiki hazırlığı, və qidalanması üçün yaradılmış şəraitlə tanış olmuş, xilasedici və yanğından mühafizə komandalarının fövqəladə hallara hazırlıq vəziyyəti, onların təlimləri, müxtəlif texnikalardan istifadə etmək bacarıqları ilə maraqlanmışdır.

Komandalar şərti olaraq yük avtomobilində və yaşayış evində baş verən yanğının söndürülməsi, zəlzələ və torpaq uçqunu köməksiz qalan insanların xilas edilməsi əməliyyatını uğurla başa vurmuş, qısa vaxt ərzində yanğını dəf etməklə insanları müxtəlif vasitələrin köməyi ilə xilas etmişlər. Komandalar “Axtarış-xilasetmə işi” üzrə keçirilən mərhələdə kinoloqların dəstəyi ilə əməliyyatları nümayiş etdirmişlər.

Sonra Kəmaləddin Heydərov və Mikayıl Cabbarov “dəyirmi masa” ətrafında müxtəlif ölkələrdən gəlmiş gənc xilasedicilərin suallarını cavablandırmışlar. Onlar bildirmişlər ki, belə yarışların keçirilməsi gənclərin fövqəladə hallara qarşı mübarizədə təcrübə əldə etmələrinə geniş imkanlar açacaqdır. Əcnəbi gənc xilasedicilər bu cür yüksək səviyyəli tədbirin keçirilməsi üçün Azərbaycanın fövqəladə hallar nazirinə təşəkkür etmişlər.

Sonra Qəbələ Mədəniyyət Mərkəzində yarış iştirakçılarının mükafatlandırılması mərasimi keçirilmişdir. Mərasim gənc xilasedicilərin səhnələşdirdikləri və iştirak etdikləri təbii və texnogen mənşəli fövqəladə hallara dair kompozisiya ilə başlamışdır. Yarışlar haqqında FHN-in hazırladığı videoçarx da nümayiş etdirilmişdir. Sonra yarışda iştirak edən yerli və xarici komandaların öz milli rəqs və mahnılarını ifa etmələri mərasimə xüsusi rəng qatmışdır.

Tədbirdə fövqəladə hallar naziri, general-polkovnik Kəmaləddin Heydərov, təhsil naziri Mikayıl Cabbarov, gənclər və idman nazirinin müavini İsmayıl İsmayılov çıxış edərək bildirmişlər ki, bu yarışın əsas məqsədi yeniyetmə və gənclərin fövqəladə hallara hazırlıq səviyyəsinin yüksəldilməsi, məktəblilərə şəxsi və ictimai təhlükəsizliyə məsuliyyətli yanaşma hissinin və gənc nəslə hərbi vətənpərvərlik ruhunun aşılanması, sağlam həyat tərzinin təbliğindən ibarətdir. Yeniyetmə və gənclər bu yarış vasitəsilə fövqəladə hallar zamanı necə davranmaq qaydalarını öyrənirlər və onlarda bu sahəyə böyük maraq yaranır.

Qeyd edilmişdir ki, ölkəmizin müxtəlif bölgələrində keçirilmiş zona yarışlarında yüksək yer tutan komandalar finala vəsiqə qazanmışlar. Məlumat verilmişdir ki, bu yarışın iştirakçısı olan 16 şəhər və rayonun komandası, eləcə də Azərbaycan, Türkiyə, Rusiya, Qazaxıstan, Qırğızıstan, Belarus və Gürcüstandan olan təmsilçilər beş mərhələdə - “Maneələr zolağı”, “Kombinə edilmiş yanğın estafeti”, “Axtarış-xilasetmə işi”, “Komandaların təqdimatı” və “Gənc ekspertlər” üzrə birincilik uğrunda mübarizə aparmışlar.

Kəmaləddin Heydərov ümumrespublika yarışlarının qalibi adını qazanan Siyəzən rayon komandasına və beynəlxalq yarışların iştirakçısı olan Türkiyə, Gürcüstan, Belarus, Qazaxıstan, Rusiya və Qırğızıstan komandalarına mükafatları təqdim etmiş, gənc yanğınsöndürən və xilasedicilərə uğurlar diləmişdir.

Məlumat verilmişdir ki, beynəlxalq yarışda birinci yeri Rusiya, ikinci yeri isə Azərbaycan komandaları tutmuşlar.