SİYASƏT
Qəbələnin Nic qəsəbəsində “Azərbaycan multikulturalizminin ədəbi-bədii qaynaqları” kitabının təqdimatı olub
Qəbələ, 7 mart, Şahnəzər Bəşirov, AZƏRTAC
Azərbaycan Respublikasının Millətlərarası, multikulturalizm və dini məsələlər üzrə Dövlət müşaviri xidməti Qəbələ rayonunun Nic qəsəbəsində “Azərbaycan multikulturalizminin ədəbi-bədii qaynaqları” və 25 dildə, o cümlədən udi dilində nəşr olunmuş “Henrix Fridrix fon Dits. Homerinki ilə müqayisədə yeni aşkar edilmiş oğuz siklopu. Kitabi-Dədə Qorqud. Basat Təpəgözü öldürdüyü boyu bəyan edər” kitablarının təqdimatını keçirib.
AZƏRTAC xəbər verir ki, tədbirdə rayon icra hakimiyyəti başçısının birinci müavini Abil Ağasəfov çıxış edərək, bu görüşün udilərin bütün dünyada yığcam halda yaşadığı və Alban-Udin xristian dini icmasının əsrlər boyu fəaliyyət göstərdiyi yeganə yaşayış məskəni olan Nic qəsəbəsində keçirilməsinin əhəmiyyətindən danışıb. O, tədbirin Azərbaycan Respublikasının Millətlərarası, multikulturalizm və dini məsələlər üzrə Dövlət müşaviri xidmətinin, Azərbaycan Ağsaqqallar Şurasının, “Azərbaycan” qəzetinin və Qəbələ Rayon İcra Hakimiyyətinin birgə təşkilatçılığı ilə Qəbələ Mədəniyyət Mərkəzində “Multikulturalizm ili” çərçivəsində keçirilən “Multikulturalizmin Azərbaycan modeli: dünyanın mükəmməl nümunəsi” mövzusunda konfransın proqramına uyğun olaraq təşkil edildiyini vurğulayıb.
Tədbirdə Dövlət müşaviri xidmətinin məsləhətçisi Sərraf Hüseynov təqdim olunan nəfis tərtibatlı kitablarda xalqımızın ən qədim dövrlərdən mənəviyyatına, düşüncəsinə hopmuş tolerantlığın əksi olan ədəbi-bədii nümunələrin toplandığını qeyd edərək, hər iki nəşrin ideya müəllifi və elmi redaktoru, Dövlət müşaviri, akademik Kamal Abdullayevin salamlarını qəsəbə sakinlərinə çatdırıb.
AMEA-nın Dilçilik İnstitutunun direktoru Möhsün Nağısoğlu, Dövlət müşaviri xidmətinin baş məsləhətçisi, professor Etibar Nəcəfov, Alban-Udin xristian dini icmasının sədri Robert Mobili, udin icmasının təmsilçiləri çıxış edərək kitabların əhəmiyyətindən, məziyyətlərindən danışıblar. Udinlər Azərbaycanın tam hüquqlu sakinləri olduqları üçün qürur hissi duyduqlarını vurğulayaraq, Qafqaz Albaniyasının etnik və dini varisləri olan udinlərin qayğılarına xüsusi həssaslıqla yanaşıldığına görə Prezident İlham Əliyevə təşəkkür ediblər.
Çıxışlarda tədbirin keçirildiyi və ən müasir tələblərə cavab verən tam orta məktəb binasının Heydər Əliyev Fondunun vəsaiti ilə inşa olduğu qeyd edilib.
Azərbaycan Respublikasının Prezidenti yanında Bilik Fondunun ölkədaxili layihələr sektorunun müdiri Hacı Abdulla çıxış edərək Nic məktəblilərinin “Qardaşlaşmış məktəblər”, “Qafqaz Albaniyası intibahı” layihələrində, foto, inşa, rəsm müsabiqələrində xüsusi fəallıq göstərdiyini vurğulayıb, yerli sakinlərin istəyi nəzərə alınaraq yaxın günlərdə Nicdə “Azərbaycan dilini öyrənirik” layihəsinin icrasına başlanılacağını bildirib. Udin yeniyetmə və gəncləri pulsuz kurslarda Azərbaycan dili ilə birlikdə ingilis dilini, kompyuter biliklərini də öyrənəcəklər. Artıq 50-dən çox gənc bu kurslarda iştirak etmək arzusunda olduqlarını bildiriblər.
Tədbirin sonunda Nicdəki 3 orta məktəbin şagirdləri Azərbaycan, rus və udi dillərində hazırladıqları musiqili-ədəbi kompozisiyanı təqdim ediblər. Dədə Qorqud dünyasına və Azərbaycan multikulturalizminin ədəbi-bədii qaynaqlarına ayna tutan səhnəciklər, ifa edilən mahnılar, rəqslər, şeirlər yerli sakinlərə və qonaqlara xoş anlar yaşadıb, alqışlarla qarşılanıb. Hər 3 orta məktəbin kitabxanasına və dini icmaya təqdimatı keçirilən kitabların nüsxələri hədiyyə edilib.
Sonda qəsəbədəki “Cotari” Alban-Udin kilsəsində yerli ziyalılarla, dindarlarla görüş keçirilib.