REGİONLAR
Qəbələnin otel və mehmanxanaları 6 ayda 37 mindən çox turistə xidmət göstərib
Qəbələ, 16 iyul, Mustafa Dadaşov, AZƏRTAC
Bu ilin birinci yarısında Qəbələ rayonundakı otel və mehmanxana tipli müəssisələrə 37 min 473 nəfər yerli və əcnəbi turist yerləşdirilib. Onların 36 min 2 nəfəri və ya 96,1 faizi Azərbaycan, 1471 nəfəri və ya 3,9 faizi xarici ölkə vətəndaşı olub.
Bu barədə AZƏRTAC-ın bölgə müxbirinə Qəbələ Rayon Statistika İdarəsinin rəisi Ayaz İsgəndərov məlumat verib.
İdarə rəisinin sözlərinə görə, koronavirus pandemiyası səbəbindən 2020-ci ilin mart ayından etibarən ölkələr arasında əlaqələrin məhdudlaşdırılması, həmçinin Azərbaycanda xüsusi karantin rejiminin tətbiq olunması Qəbələnin turizm sektoruna da öz mənfi təsirini göstərib. Xüsusilə, əcnəbi turistlərin sayında əvvəlki illə müqayisədə xeyli azalma müşahidə olunub.
Ümumiyyətlə, 6 ayda Qəbələnin otel və mehmanxana tipli müəssisələrinə yerləşdirilən yerli və əcnəbi turistlərin sayı 2020-ci ilin eyni dövrü ilə müqayisədə 5 min 546 nəfər və ya 17,3 faiz artıb. İlin birinci yarısında yerli turistlərin sayı ötən ilin müvafiq dövrü ilə müqayisədə 12 min 713 nəfər və ya 54,6 faiz artsa da, əcnəbi turistlərin sayında 7 min 167 nəfər və ya 82,9 faiz azalma qeydə alınıb.
İdarə rəisinin sözlərinə görə, cari ilin yanvar-iyun aylarında Qəbələyə gələn əcnəbi turistlər arasında Türkiyə vətəndaşları üstünlük təşkil edib. Belə ki, ötən müddətdə bu ölkənin 386 vətəndaşı Qəbələdə olub. Ümumiyyətlə, cari ilin 6 ayında bu qədim diyara Rusiyadan 222 nəfər, ABŞ-dan 78, Qazaxıstandan 74, Böyük Britaniyadan 71, Ukraynadan 67, Gürcüstandan 50, İrandan isə 48 nəfər turist gəlib. Qəbələyə gələn əcnəbi turistlərin 475 nəfəri isə digər ölkələrin vətəndaşları olub.
Ötən dövrdə Qəbələnin turizm obyektlərində 922 işçi çalışıb. Onlardan 195 nəfərini qadınlar, 58 nəfərini turizm və otelçilik üzrə təhsil alan mütəxəssislər, 12 nəfərini isə əcnəbi işçilər təşkil edib.