SİYASƏT
Qədim Xanəgah kəndi müasir yaşayış məntəqəsinə çevrilib
Culfa, 9 sentyabr, AZƏRTAC
Culfa rayonunun Xanəgah kəndi muxtar respublikanın qədim tarixə malik yaşayış məskənlərindəndir. Orta əsrlərdə Şərqin əsas elm və mədəniyyət mərkəzi olan bu kənddə son illər geniş quruculuq işləri aparılıb. Regionların sosial-iqtisadi inkişafı dövlət proqramının icrası nəticəsində kəndin siması tamamilə dəyişib, Xanəgah müasir Azərbaycan kəndinə çevrilib.
Xanəgah kənd həkim ambulatoriyası
istifadəyə verilib
Naxçıvan Muxtar Respublikasının kəndlərində aparılan quruculuq işlərinin əsas xarakterik cəhətlərindən biri də insanların sağlamlığına xidmət edən müasir səhiyyə müəssisələrinin tikilib istifadəyə verilməsidir.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, sentyabrın 9-da Xanəgah kənd Həkim Ambulatoriyasının açılışı olub.
Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.
Xanəgah kənd inzibati ərazi dairəsi üzrə nümayəndə Ramin Paşayev çıxış edərək deyib ki, Culfa rayonunun digər kəndləri kimi, Xanəgah kəndi də günü-gündən inkişaf edir. Kənddə əhalinin rahat yaşayışı və rifahının yaxşılaşdırılması istiqamətində ardıcıl tədbirlər görülür. Bu il kənddə həkim ambulatoriyası üçün yeni bina tikilib, məktəb binası yenidən qurulub, Xanəgah abidə kompleksi təmir olunub. Həmçinin elektrik və rabitə xətləri yenilənib, yollar yenidən qurulub. Bütün bunlar kənd yerində insanların sağlamlığına və təhsilinə, eləcə də xalqımızın tarixinə və mədəniyyətinə, tarixi dəyərlərimizin yaşadılmasına göstərilən qayğının parlaq ifadəsidir. Ramin Paşayev bu diqqət və qayğıya görə kənd əhalisi adından minnətdarlıq edib.
Naxçıvan Muxtar Respublikası Ali Məclisinin Sədri Vasif Talıbov Xanəgah kəndində aparılan quruculuq işləri münasibətilə sakinləri təbrik edərək deyib: Ölkəmizdə qəbul olunan dövlət proqramları uğurla icra olunur, kəndlər abadlaşır, insanların yaşayış səviyyəsi yaxşılaşır, məskunlaşma artır. Bütün bunlar ölkəmizin gələcək inkişafına xidmət edir. Çünki inkişafın olduğu, məskunlaşmanın ilbəil artdığı, dövlət-xalq birliyinin təmin olunduğu ölkənin gələcəyi də etibarlı olur. Azərbaycanda bu tədbirlərin əsası ümummilli liderimiz Heydər Əliyevin ölkəmizə rəhbərliyi dövründə qoyulmuşdur. Hazırda bu siyasət ölkə Prezidenti cənab İlham Əliyev tərəfindən uğurla davam etdirilir. Xanəgah kəndində həyata keçirilən kompleks quruculuq tədbirləri də ölkəmizin inkişafı sahəsində görülən işlərin nəticəsidir.
Qeyd olunub ki, Xanəgah kəndi tarixdə iz qoyan yaşayış məntəqəsidir. Bu ərazidəki Əlincəqala ölkəmizdə ümumilikdə əyilməzlik simvolu kimi tanınır. Eyni zamanda, hürufiliyin banilərindən olan Fəzlullah Nəiminin türbəsi də bu kənddə yerləşir. Kənd tarixən elm, təhsil və mədəniyyət mərkəzi olubdur. Quruculuq işləri aparıldıqdan sonra kənddə müasirliklə tarixiliyin vəhdəti yaradılıb. Həkim ambulatoriyasının, məktəb binasının, kənd və xidmət mərkəzlərinin tikilməsi, Xanəgah abidə kompleksinin və Əlincəqalanın bərpa olunması, yolun yenidən qurulması, içməli su xəttinin çəkilməsi və digər quruculuq tədbirlərinin həyata keçirilməsi kəndi abadlığa qovuşdurub, insanların rahat yaşayışı təmin olunub.
Ali Məclisin Sədri deyib: Xanəgah kəndində tarixi abidələrin yerləşməsi, eləcə də aparılan quruculuq işləri onun turizm potensialını artırır. Kəndə gələn qonaqların sayı ilbəil artır. Ona görə də kənd sakinləri daim kəndin abadlığına, təmizliyinə diqqət yetirməli, tikilənlər, qurulanlar qorunub saxlanılmalıdır.
Ali Məclisin Sədri bir daha sakinləri təbrik edib, kəndin abadlaşmasında əməyi olanlara təşəkkürünü bildirib, açılışı bildirən lenti kəsib.
Bildirilib ki, ambulatoriya 11 otaqdan, o cümlədən baş həkim, stomatoloq üçün kabinə, palata, doğuş, peyvənd, mama, manipulyasiya, aptek, qeydiyyat, tibb bacısı və təsərrüfat otaqlarından ibarətdir. Binada istilik sistemi quraşdırılıb, həyətdə abadlıq işləri aparılıb.
Həkim ambulatoriyası kənddə səhiyyə xidmətinin səviyyəsini xeyli yaxşılaşdıracaq. Hazırda tibb işçiləri peyvənd və hamilə qadınlara patronaj işinin təşkilini diqqətdə saxlayırlar. Bu il kənddə 8 uşaq doğulub. Hazırda 4 hamilə qadın ambulatoriyada qeydiyyatdadır.
Ali Məclisin Sədri tibbi xidmətin təşkili ilə bağlı müvafiq tapşırıq və tövsiyələrini verib.
Həkim ambulatoriyası ilə tanışlıqdan sonra kənd sakinləri ilə görüş olub.
Xanəgah kənd sakini, ziyalı Akif Səfərov deyib: Kəndin inkişafına böyük diqqət göstərilir. Son illər yeni sosial obyektlər tikilərək istifadəyə verilib. Müasir məktəb binası uşaqların yaxşı təhsil almasına, savadlı gənclər yetişdirilməsinə imkan verəcək. Xanəgah abidə kompleksinin, Əlincəqalanın bərpa olunması kəndi turizm mərkəzinə çevirib. Mənzillərimizdə sürətli internetdən istifadə edirik. Kənddaxili yollara asfalt örtük salınıb, rahat hərəkət təmin edilib. Aparılan quruculuq işləri nəticəsində kənddə yeni iş yerləri açılıb. Hazırda Xanəgahda müasir evlər tikilir, şəxsi avtomobillərin sayı artır. Bu da ölkəmizdə insanların rifahının yaxşılaşdırılması sahəsində görülən işlərin nəticəsidir. Sakinlər yaradılan şəraitdən səmərəli istifadə edərək təsərrüfatlarını genişləndirirlər. Dövlətimizin kənd adamlarına göstərdiyi qayğının nəticəsidir ki, heyvandarlıq, arıçılıq, meyvəçilik, əkinçilik əsas məşğuliyyət sahəsinə çevrilib. Akif Səfərov yaradılan şəraitə görə kənd sakinləri və ziyalılar adından minnətdarlıq edib.
Ali Məclisin Sədri deyib: Muxtar respublikanın hər bir kəndi abadlaşır. İnsanların rahat yaşayışı üçün tədbirlər görülür. Dağ və sərhəd kəndlərində yeni məktəb binaları tikilir, yollar çəkilir, dövlət qurumları üçün binalar, həkim ambulatoriyaları istifadəyə verilir. Bundan sonra da kəndlərin abadlaşdırılması sahəsində görülən işlər davam etdiriləcəkdir. Yaradılan şəraitin nəticəsidir ki, bu il Xanəgah kənd tam orta məktəbinin məzunlarından 5-i ali məktəblərə qəbul olub, 1-i 500-700 arası bal toplayıb. Bir sözlə, tikilənlər, qurulanlar sakinlər üçündür. Ona görə də sakinlər qurulanları qorumalı, yaşıllıqları artırmalı, kəndin inkişafına öz töhfələrini verməlidirlər.
Kənd məktəbinin binası yenidən qurulub
Sentyabrın 9-da Naxçıvan Muxtar Respublikası Ali Məclisinin Sədri Vasif Talıbov Xanəgah kənd tam orta məktəbində yaradılan şəraitlə tanış olub.
Məlumat verilib ki, məktəb binası yenidən qurulub, müasir tədris avadanlıqları quraşdırılıb, binanın həyətində bufet və qazanxana tikilib. 198 şagird yerlik 2 mərtəbəli məktəbdə 3-ü elektron lövhəli olmaqla 11 sinif otağı, kimya-biologiya və fizika laboratoriyaları, hərbi kabinə, şahmat otağı, kompüter otağı, müəllimlər otağı, kitabxana, bufet, idman zalı və açıq idman qurğuları şagirdlərin istifadəsinə verilib. Məktəbin kitabxana fondunda 3575 dərslik və bədii ədəbiyyat var. Həmçinin məktəb elektron dərsliklərlə də təmin olunub.
Məktəbdə informasiya texnologiyalarının tətbiqi diqqətdə saxlanılıb, 18 kompüter quraşdırılıb və internetə qoşulub. Elektron lövhəli siniflər yeni tədris ilində distant təhsilin tətbiqinə və dərslərin daha mütəşəkkil keçirilməsinə imkan verəcək.
Ali Məclisin Sədri məktəbdə müəllim-şagird münasibətlərinin qarşılıqlı hörmət və tələbkarlıq əsasında qurulması, eləcə də tədrisin keyfiyyətinin daha da yüksəldilməsi barədə tapşırıqlar verib.
Xanəgah abidə kompleksi bərpa olunub
Naxçıvanda tarixi-mədəni irsimizə qayğı ilə yanaşılır, əcdadlarımızın miras qoyub getdiyi mədəni sərvətlərimiz gələcək nəsillər üçün qorunub saxlanılır. Xanəgah abidə kompleksinin bərpası da bu sahədə görülən işlərin davamıdır.
Sentyabrın 9-da Naxçıvan Muxtar Respublikası Ali Məclisinin Sədri Vasif Talıbov Xanəgah abidə kompleksinə gəlib, burada görülən işlərlə tanış olub.
Məlumat verilib ki, abidədə geniş bərpa işləri aparılıb, türbənin dam örtüyü yenilənib, işçilər üçün otaq yaradılıb, həyət abadlaşdırılaraq yeni işıqlandırma sistemləri quraşdırılıb. Naxçıvan memarlıq məktəbinin daha bir nümunəsi olan abidə 12-15-ci əsrlərə aid edilir. Arxiv materiallarında Xanəgahın 18-ci əsrdə də fəaliyyət göstərdiyi qeyd olunur. Abidənin giriş baştağında Möminə xatın türbəsinin elementlərindən istifadə olunub. Hürufilik təliminin banilərindən olan Fəzlullah Nəimi 1394-cü ildə Əlincədə qətlə yetirildikdən sonra müridləri onun cənazəsini burada dəfn ediblər. Xanəgah uzun müddət yaşayış, ibadət və zikr yeri olub, tarixin müxtəlif dövrələrində isə həm də elm, təhsil və mədəniyyət mərkəzi kimi fəaliyyətini davam etdirib. Abidə turistlərin böyük marağına səbəb olur.
Ali Məclisin Sədri abidənin qorunub-saxlanılması, ziyarətçilərə onun tarixi haqqında dolğun məlumatlar verilməsi barədə tapşırıqlar verib.
***
Xanəgah kəndində abadlıq işləri də görülüb. Kənddaxili avtomobil yollarına 1300 metr məsafədə asfalt örtük salınıb, 20 su keçidi qoyulub. Həmçinin kənddə 350 metr məsafədə fiberoptik kabel, 500 metr müxtəlif tutumlu rabitə və 400 metr elektrik xətti çəkilib. Kənddəki mövcud kaptaj və içməli su xətlərində də təmir işləri aparılıb.