Bakı, 26 iyun, AZƏRTAC

Xalqımız builki Milli Qurtuluş Günündə daha bir bayram sevinci yaşadı. İyunun 15-də “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalandı. Şuşada qardaşlığın rəmzi olan Bəyannamənin imzalanması çox əlamətdar hadisədir. Prezident İlham Əliyevin “Şuşada müttəfiqlik bəyannaməsini imzalayarkən əcdadımıza sadiqliyimizi nümayiş etdiririk və gələcək nəsillərə yol göstəririk” ifadəsi iyunun 15-də imzalanmış sənədin mahiyyətini çox dəqiq ifadə edir.

Bunu AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva deyib.

Q.Paşayeva qeyd edib ki, Şuşa Bəyannaməsi iki qardaş ölkə arasında möhkəm münasibətləri bir daha təsdiqləyərək, gələcəyimizin üfüqlərini müəyyənləşdirir. Müttəfiqlik haqqında Bəyannamə iki qardaş, dost və qonşu ölkə arasında əlaqələri ən yüksək səviyyəyə qaldırır. Bu sənəddə göstərilən müddəalar keyfiyyətcə daha yüksək işbirliyinin təminatıdır. Bu təminatlı gələcəyə imza atmaq siyasi iradə, cəsarət, beynəlxalq vəziyyəti və geostrateji reallıqları qiymətləndirmək və gələcəyi görmək bacarığı tələb edirdi. 2021-ci il iyunun 15-də imzalanan Şuşa Bəyannaməsi ilə ən yeni dövr tariximizin, Qafqaz tarixinin, Türk dünyası tarixinin yeni mərhələsinin əsası qoyuldu!

Komitə sədri bildirib ki, Bəyannamədə ulu öndər Heydər Əliyevin və Türkiyə Cümhuriyyətinin qurucusu Mustafa Kamal Atatürkün kəlamları yer alıb. XXI yüzillikdə azad edilmiş Şuşada müttəfiqlik haqqında Bəyannamənin imzalanması müdrik rəhbərlərin yanaşma və fəlsəfəsinin əbədiləşdirilməsinin təsdiqi, təsbitidir. Strateji önəm daşıyan bütün işbirliyi istiqamətlərini əhatə edən Şuşa Bəyannaməsində ölkələrimiz arasında siyasi, hərbi münasibətlər, iqtisadi-ticari əlaqələr, mədəniyyət, təhsil, idman, gənclər siyasəti, beynəlxalq müstəvidə işbirliyi öz əksini tapıb. Bəyannamədə, həmçinin enerji təhlükəsizliyi, Cənub Qaz Dəhlizinin Türkiyə, Azərbaycan və Avropa üçün önəmi göstərilib.

Sənəddə müdafiə sahəsində işbirliyi və qarşılıqlı hərbi yardım məsələlərinin əksini tapması tarixi uğurudur. 44 günlük Vətən müharibəsində qardaşlığın təntənəsini və gücünü bütün dünyaya göstərən Azərbaycan və Türkiyə dövlətləri bundan sonra da bir yerdə olacağımızı Şuşa Bəyannaməsi ilə dosta da, düşmənə də göstərdi. Əslində, biz kiminsə düşməni deyilik. Şuşada imzalanan Bəyannamə də, imzalanmadan sonra mətbuata verilən açıqlamada deyilənlər də aydın şəkildə göstərdi ki, Azərbaycan-Türkiyə işbirliyindən bölgəyə, qonşulara yalnız xeyir, fayda gələ bilər.

Deputat vurğulayıb ki, haqqı, ədaləti, birgəyaşayışı, sülhpərvər siyasəti təmsil edən Azərbaycan və Türkiyə ikitərəfli münasibətlərini inkişaf etdirməklə 3+3 formatı üçün də qapı açmış olur. Dialoqa, əməkdaşlığa, beynəlxalq hüquq normalarına, iqtisadi-ticari əlaqələri gücləndirməyə qarşı olmayan hər kəsin keçə biləcəyi qapıdan söhbət gedir. Hazırda o qapı Zəngəzur dəhlizinə açılır. Zəngəzur dəhlizi Azərbaycan-Ermənistan-Rusiya üçtərəfli Bəyanatında öz əksini tapmışdı və Şuşa Bəyannaməsi ilə bir daha gündəliyə gəldi. Zəngəzur dəhlizində işlərin müxtəlif bəhanələrlə ləngidilməsinə çalışan Ermənistan rəhbərliyi anlamalıdır ki dəhlizin qarşısını almaq mümkün deyil, ləngimələrsə, ilk növbədə, Ermənistanın özünə ziyandır. Çünki bölgənin ən kasıb, ən gəlirsiz, ən balaca, ən perspektivsiz ölkəsi odur. Üstəlik, Ermənistan işğalçılığı, terroru açıq dövlət siyasəti halına gətirmiş və məğlub olmuş ölkədir, üzərində Xocalı soyqırımının məsuliyyəti və bir çox başqa müharibə cinayətləri var. Ermənistan əvvəl-axır Azərbaycana təzminat ödəməli olacaq və sair. Belə olan halda, Zəngəzur dəhlizinin iqtisadi, siyasi və digər qazancları Ermənistana daha çox lazımdır.

Beynəlxalq önəm daşıyan bir layihə olmaq etibarı ilə Zəngəzur dəhlizi böyük geosiyasi, iqtisadi əhəmiyyətə malikdir. Bu layihənin həyata keçirilməsi Şərqdən Qərbə hər kəsin istifadə edə biləcəyi yeni bir ortaq iqtisadi dəhlizin açılması deməkdir.

“Bir daha vurğulamaq istərdim ki, hərbi sənaye sahəsindəki işbirliyi tərəfdaşlığın önəmini və ölkələrimizin qüdrətini artıran çox mühüm amildir. 44 günlük Vətən müharibəsində PUA-ların böyük rol oynadığı sirr deyil. Müdafiə sənayesi sahəsində bağların inkişafı ölkələrin hərbi qüdrətini daha da artıracaq. Azərbaycan bu prosesdə istehsal mərkəzi kimi inkişaf edəcək.

Prezident İlham Əliyevin vurğuladığı kimi, Şuşa Bəyannaməsi Azərbaycanla Türkiyənin qardaşlığını bütün dünyaya bildirən bir mesajdır. Şuşada dalğalanan ay-ulduzlu müqəddəs bayraqlar ölkələrimizin birliyini nümayiş etdirir. Bu, dosta sevinc, qürur, düşmənə göz dağıdır”, - deyə Qənirə Paşayeva qeyd edib.

Mədəniyyət komitəsinin sədri diqqətə çatdırıb ki, Türkiyənin Bakıda səfirliyi, Gəncə və Naxçıvanda Baş konsulluqları fəaliyyət göstərir. Artıq bu sıraya yeni bir ünvan da əlavə olunacaq Türkiyə Respublikasının Şuşa Baş konsulluğu. Bu, diplomatik münasibətlərimizin yeni səviyyəsi deməkdir. Bu qərar, iki ölkə arasında münasibətləri dərinləşdirməklə yanaşı, Türkiyənin işğaldan azad olunmuş ərazilərdə aparılacaq bərpa-quruculuq işlərində oynayacağı rolun da aydın ifadəçisidir: “Bir sözlə, Azərbaycanla Türkiyənin qardaşlıq əlaqələri bütün müstəvilərdə inkişaf edir. İşğaldan azad olunmuş ərazilərin bərpası prosesi sürətlə həyata keçirilir. Vətən müharibəsində olduğu kimi, işğaldan azad olunmuş ərazilərdə aparılan yenidənqurma, təmir-bərpa, habelə minalardan təmizlənmə və digər işlərdə də Azərbaycanla Türkiyə arasında sıx işbirliyi mövcuddur”.